ضلع کیچ نا بنجائی شار تربت نا سیٹلائٹ ٹاٶن آن اسہ ورنا ئسے نا درست بندغ آک زوراکی ئٹ بیگواہ کریر ۔
خن خنوک شاہد آتا ردئٹ اینو دے نیمروچ نا درست گاڑی ٹی مروک بندغ آک زکریا آسمی ءِ گاڑی ئٹ خلکر ہراڑان او موٹرسائیکل آن تما ۔ اوکان گڈ سلہہ بند بندغ آک زوراکی ئٹ اودے گاڑی ٹی شاغیسہ تینتون دریر ۔
زکریا آسمی نا خاہوت نا ردئٹ او اسہ خوانندہ ئسے ہرا سہب ئنا اسکول آ کائک و شام ئٹ دکان آ کاریم کیک ۔ خاہوت کیچ بست و بند آن خواست کننگ ءِ کہ او زکریا نا زوت ئٹ آجوئی کن زیم تخوک گام ارفر ۔
ڈاکٹر ماہ رنگ بلوچ تون اوار بلوچ یکجہتی کمیٹی نا باسک آتا دزگیری نا برخلاف بلوچستان ئٹ برانز آتا لڑ برجا ءِ۔
اندا رد ئٹ یک شمبے نا دے قلات شار ئٹ بلوچستان نیشنل پارٹی نا پارہ غان اسہ ریلی اس کشنگا ہرا ولدا برانز نا دروشم ءِ دوئی کرے۔
برانز ٹی تران کریسہ بلوچستان نیشنل پارٹی نا سروک آک ڈاکٹر ماہ رنگ بلوچ و بی وائی سی نا راہشون و باسک آتا دزگیری نا مذمت ءِ کریر۔
تران کروک آتا پاننگ ئس کہ مالو بلوچستان آن ورنا و پیر انگاتے ارفیرہ۔ ولے داسا زالبول آتے ایم پی او نا رد ئٹ دزگیر کننگ نا لڑ ءِ بنا کننگانے۔
اوفتا پاننگ ئس کہ اندن بلوچستان نا زالبول حکومتی ظلم ئنا برخلاف اسہ طاغتور توار اس جوڑ مسوسر اندا سوب ریاستی ادارہ غاک اوفتا توار ءِ بند کننگ کن اوفتے دزگیر کننگ ءِ بنا کرے۔
تران کروک آک ڈاکٹر ماہ رنگ بی وائی سی نا ایلو راہشون و باسک آتا یلہ کننگ نا خواست ءِ کریر۔
یاتی مرے کہ بی این پی داکان مالو بلوچ یکجہتی کمیٹی نا زالبول راہشون و باسک آتا یلہ کرفنگ کن ضلع مستونگ نا علاقہ لکپاس آ 20 دے اسکان تولوک برانز کرے۔
بلوچستان نا ضلع خضدار نا علاقہ اورناچ ئٹ استو سلہہ بند ڈیتھ اسکواڈ نا کارندہ غاک اسہ اُرا ئسے آ جلہو کریر۔
حوالکار تا ردئٹ جلہوکار آتا مسخت اُرا ٹی ساڑی اسہ ورنا ئسے برمتہ کننگ ئس، واہم خاہوت نا پارہ غان ترند مزاحمت نا سوب اوفتا دا کوشست بے سہب مس۔
ہندی حوالکار آک پاریر کہ ہراتم خاہوت برمتہ نا کوشست ءِ بے سہب کننگ کن مزاحمت کرے گڑا جلہوکار آک تینا مون سم کاری کریر۔ جلہوکار آتا سم کاری آن اوفتا تینا ہی سنگت ہمو ہند آ مرگ ئنا گواچی مس۔
تدینی آن پد ایلو جلہوکار آک تینا سنگت نا جون ءِ اِلیسہ ہند آن نرنگ ئٹ سرسہب مسر۔ کوالخواہ تا پارہ غان دا بابت دائسکان ہچو ہیت اس مونا بتنے اندن جون دائسکان ہموڑے تموک ءِ۔
خیال ئٹ مرے بلوچستان ئٹ پاکستانی لشکر نا سروکی ٹی سلہہ بند ٹولی جوڑ کننگانے ہرافک السی بولی ئٹ ”ڈیتھ اسکواڈ“ نا پِن ئٹ چائنگرہ۔
راج دوست آتا پاننگ ءِ کہ دا ٹولیک نئے بیرہ سیاسی و چاگڑدی باسک آتے کسفنگ و بیگواہ کننگ ئٹ اوار ءُ بلکن نشہ، زر اکن برمتہ، و ایلو ڈوہ تیٹ ہم اوار ءُ۔ دا ٹولی تے ریاستی ادارہ تا پارہ غان تیوہ مُخ تفی دوئی ءِ و کوالخواہ تا پارہ غان دافتے تیوہ آزاتی تننگانے۔
پنی آ احوالکار نیاز بلوچ دا ہیت ءِ پاش کریسہ پارینے کہ او زو دے تیٹ اندن آ بندغ آتا زر اٹ بسونے ہرا تینے سوشل میڈیا غا ریاستی ڈھکوک ادارہ غاتا کارندہ پاش کریسہ اودے ترند نتیجہ آتا تڑی تریسہ ءُ۔ دا تڑی تیٹ اودے زوراکی ئٹ بیگواہ کننگ نا تڑی ہم اوار ءِ۔
نیاز بلوچ نا پاننگ ءِ بلوچستان ئٹ احوالکار، ماسٹر، ڈاکٹر، وکیل، ادیب، گلوکار، خوانندہ و سیاسی باسک اسکان کس رکھوک اف۔ ہرا ہم ظلم و زوراکی نا برخلاف ہیت کننگ نا کوشست کرینے، اودے یا بیگواہ کنِنگک، یا گڑا نادرست بندغ آتا دو تیان کسفنگک۔ دہنا بندغ آتے”ڈیتھ اسکواڈز” نا پن تننگک، ہرا پاش خلیس تالان کریسہ ءُ۔
احوالکار نیاز بلوچ عالمی جہدکار، اقوام متحدہ و بندغی حق آتا کل تنظیم آتیان خواست کرینے کہ اوفک بلوچستان ئٹ بندغی حق آتا برخلافی آ دمدستی نوٹس ہلیر۔
او پارے کہ چھپی پین دتر وہفنگ نا سوب جوڑ مرو۔ بلوچستان نا مظلوم انگا اُلس انصاف و رکھ ئنا خواست ئنا خواست ئٹی ءُ۔ وخت بسونے کہ عالمی ضمیر سما کے و مظلوم آتا توار ءِ بنہ۔
یاتی مرے کہ بلوچستان ئٹ تدوک منہ سال ئٹ بلوچستان ئٹ کیہی احوالکار کسفنگ و بیگواہ کننگانو، بلوچستان ئٹ آزادتی ئٹ درشانی تیوہ وڑ ئٹ ایسر مسونے۔
بلوچستان نا ضلع دکی ٹی پاکستانی لشکر سی ٹی ڈی نا دروغ نا مونتس ئٹ کسفنگوک اِرا بندغ نا چاہنداری مالو آن زوراکی ئٹ بیگواہ بندغ تیان مس ہرافتے جتا وخت آتیٹ بیگواہ کننگانے۔
سی ٹی ڈی نا دروغ نا مونتس ئٹ کسفنگوک اسہ بندغ ئسے نا چاہنداری محمد دین مری نا پِن ئٹ مسنے ہرادے چار توہ مُست، دسمبر 2024 ئٹ ضلع ہرنائی آن پاکستانی لشکر دزگیر کریسہ زوراکی ئٹ بیگواہ کریسس۔
اونا بیگواہی نا حوال ءِ 19 جنوری 2025 آ بندغی حق آتا باسک آک و سوشل میڈیا ءِ کاریم ئٹ ہتوک آک لس کریسر، ہرافتیٹی اونا آجوئی نا خواست ہم کننگاسس۔
پن کروک سی ٹی ڈی نا دروغ نا مونتس ئٹ کسفنگوک اسہ پین بندغ ئسے نا چاہنداری بیگواہ بندغ ئسے نا دروشم ئٹ مسنے ہرادے پاکستانی لشکر قلات نا علاقہ منگچر آن 12 اپریل 2025 آ دزگیر کننگ آن پد زوراکی ئٹ بیگواہ کریسس۔
دروغ نا مونتس ئٹ کسفنگوک بندغ نا چاہنداری خدا بخش نا مار اعجاز ہند منگچر نا پِن ئٹ مسنے۔
اعجاز بلوچ نا بیگواہی نا حوال ءِ اونا خاہوت 16 اپریل آ میڈیا ءِ تریسہ پک کریسس۔ خاہوت نا ردئٹ اعجاز ءِ 12 اپریل 2025 آ پاکستانی لشکر اونا اسہ پین سنگت عابد خان نا مار زید ہند سریاب شال ئتون اوار دزگیر کریسس ہراڑان پد ہڑتوم آتے بیگواہ کننگا۔
اینو اونا خاہوت دا ہیت ءِ پک کرینے کہ عکس ئٹی خننگوک جون اعجاز بلوچ نا ءِ۔
یاتی مرے اینو، 19 اپریل آ سی ٹی ڈی دعویٰ کرے کہ دکی ٹی کاروائی نا وخت آ پنچ شکبر بندغ خلنگار۔ واہم اوفتیٹ محمد دین مری و اعجاز بلوچ نا چاہنداری دا گمانی مونتس ءِ اسہ ”دروغ نا مونتس“ اس گوندنگ نا بنداو فراوان کرینے۔
بندغی حق آتا گل آک، سیاسی باسک و چاگڑدی کڑدہ غاک دا تدینی نا ترند مذمت کریسہ پارینو کہ بلوچستان ئٹ دا وڑ نا تدینیک پوسکنو ہیت اس افس۔ ہنوکا وخت ئٹ ہم زوراکی ئٹ بیگواہ کننگوک بندغ آتے دروغ نا مونتس تیٹ کسفنگ نا دوبہ غاک ریاستی ادارہ تیا لگسہ بسنو۔
بندغی حق آتا تنظیم آک دا وڑ نا کاریم ءِ بیدس عدالت خون پِن کریسہ دادے بندغی حق آتا ترند لتاڑ پارینو۔
دا مونتس ئٹ ایلو مُسہ بندغ نا چاہنداری دائسکان مننگ کتنے واہم بندغی حق آتا ادارہ غاک اندا خُلیس نا درشانی کننگ ءُ کہ ایلو مُسہ بندغ ہم بیگواہ ءُ بندغ مننگ کیرہ۔
پنجگور نا علاقہ سیدان ئٹ اُرائی آ شرہ ئٹ نشہ نا آماچ سالم تینا اِلہ ءِ چنکو ہیت ئسے آن گڈ سم کاری کریسہ کسفے۔
لیویز حوالکار آتا رد ئٹ دوبہ دار محمد شریف، ہرا نشہ کیک، تینا اِلہ مراد بخش ولد عرض محمد تون ہیت ئسے نا زی آ جیڑہ کرے۔ شرہ ترندی دوئی کرے ہرا نا سوب دوبہ دار بے سگ مریسہ سم کاری کرے، ہرا نا نتیجہ ئٹ مراد بخش وخت آ بیران مس۔
تدینی آن گڈ دوبہ دار ہند آن نرنگ ئٹ سرسہب مس۔ حوال رسینگ آ لیویز کارندہ غاک وخت آ سر مسور و جون ءِ قانودی کارروائی کننگ آن گڈ خاہوت ءِ تننگا۔
گوادر ئٹ کوسٹل ہائی وے ءِ پک اپ یونین برانز کریسہ ہر وڑ ئنا ہن و بر کن بند کرینے۔
برانز کروک آتا پاننگ ءِ کہ کوسٹ گارڈز آک بیدس سوب اوفتا گاڑی تے توریسہ ہلیسہ ءُ۔
پک اپ یونین نا نمائندہ غاک میڈیا تو ہیت کریسہ پاریر کہ اوفک پر امن وڑ ئٹ مزوری کریسہ ءُ، ولے کوسٹ گارڈز آتا پارہ غان اسہ رنگ دو شاغنگ اوفتا زرگزرانی خون ءِ کننگے۔ نن مالو آن وام تیٹ ٹبوک اُن، پدا ننا گاڑی تے ہلیسہ ننے پین بھس کننگسہ ءُ۔
پک اپ یونین نا پاننگ ءِ کہ کوسٹ گارڈز آک نن ئنا تارمئی ئٹ ہندی پک اپ گاڑی تے بیدس نوٹس یا اسہ سوب ئسے آن دزگیر کریر۔
یونین نا رد ئٹ، دا گاڑی تیٹی بلوچستان حکومت نا باقاعدہ اجازت ئٹ 600 بوٹ آتیا تالان قانودی ڈیزل ساڑی ئسر، ہرا ٹہیفوک و جائز کسر ئٹ تینا مزل نا پارہ غا ہنارہ۔
یونین نمائندہ غاتا پاننگ ءِ کہ نن کوسٹ گارڈ نا کرنل زین العابدین تو اوڑدئی مسون۔ کرنل انصاف نا یخین ترفے و قول کرے کہ گاڑی و ڈیزل تے واپس کننگو، ولے بیرہ گاڑی تے خالی واپس کننگا و نرخی آ ڈیزل تے دزگیر کننگا۔ یونین دا گام تے غریب اُلس تون ترند ناانصافی پاننگا۔
ڈریور نا پاننگ ءِ کہ اوفک وام ہلیسہ تیل لوڈ کیرہ، کیہی سختی تون مون تریسہ سفر کیرہ، و دے و نن ئنا خواری تیان گڈ سختی ئٹ منہ ہزار روپئی دوئی کیرہ۔ دہنی آ اگہ سرکاری ادارہ غاک اوفتا مزدوری آ دو شاغر گڑا دا غریب نا باہ آن باخو ءِ پُھلنگ نا ڈول ءِ ۔
یونین درو وخت تسوسس کہ اگہ اینو نن اسکان ڈیزل آتے واپس کننگتو گڑا پگہ سہب 11:00 آ وے چاہوک وخت ئسے اسکان برانز تننگو۔ اُلس و گاڑی والا تیان خواست کننگانے کہ اوفک وے المی ءُ سفر کپس۔
برانز نا سوب ہن و بر تیوہ وڑ ئٹ بند مسونے و گاڑی تا بھلو لین اس لگانے۔
ہندی بندغ آتا پاننگ ءِ کہ دا رویہ غاک گوادر نا دیمروی ئی آ دعویٰ آتیا سوالیہ نشان اس بش کرینے۔ سی پیک نا اہم بنجاہ مننگ آن گڈ ہم، گوادر نا اُلس ءِ مزوری کروک انگا بنیاتی آسراتیک ملنگ افس۔ رکھ ئنا پن آ ہندی بندغ آتا زرگزرانی کاریم تیا پابندی خلیسہ ءُ۔
بلوچستان نا ضلع دکی ئٹ انسداد دہشت گردی ڈیپارٹمنٹ (سی ٹی ڈی) اسہ شکبر مون تس اسیٹی پنچ بندغ ءِ خلنگ نا دعویٰ ءِ کرینے۔
سی ٹی ڈی نا پاننگ ءِ کہ خلنگوک بندغ آتا تعلق سلہہ بند تنظیم آن ئس و اوفک ریاست برخلاف انگا کاروائی تیٹ اوار مسوسر۔ واہم، دا کاروائی آ بندغی حق آتا ادارہ و تنظیم و ہندی حوالکار آتا پارہ غان سوج ارفنگسہ ءِ۔
سی ٹی ڈی نا ترجمان نا رد ئٹ، “ڈھکوک حوال آ کاروائی کننگا۔ ورندی کارروائی ئٹ پنچ بندغ خلنگار، اندن اوفتا کوزہ غان سلہہ و تراکی مواد ہم خننگا۔”
واہم، سی ٹی ڈی نا کاروائیک تدوک وخت ئٹ شکبر مسونو۔ تدوک سال تیٹ جتا انگا علاقہ آتیٹ سی ٹی ڈی نا پارہ غان شکبر مون تس آک پدان شرہ ئی پاش مسونو۔ بھاز آ مون تس آتیٹی خلنگوک آ بندغ آک مالو آن بیگواہ مروک بندغ ئسر، ہرافتے دزگیر کننگ آن گڈ مون تس آتون کسفنگا۔
بلوچستان ئٹ کاریم کروک بندغی حق آتا باسک و بیگواہ بندغ آتا خاہوت آک دا تدینی ءِ ہم شکبر گوندرہ۔
اوفتا پاننگ ءِ کہ دا اولیکو وار اف کہ سی ٹی ڈی دا نوعیت نا دعویٰ کروک مرے۔ ننے خلیس ءِ کہ دا ہم اسہ دروغ نا مون تس اس مننگ کیک۔
دائسکان خلنگوک آتا چاہنداری مون آ بننگ کتنے۔ واہم، ہندی حوالکار آتا پاننگ ءِ کہ کہوک آک بیگواہ بندغ مننگ کیرہ۔
بلوچستان ئٹ ودوک آ زوراکی نا بیگواہیک و دروغ نا مون تِس آک اُلس نا تہٹی رکھوک مفننگ و بے باوری ءِ ودی کننگ ءِ۔
سیاسی کڑدہ غاتا پاننگ ءِ کہ اندا پالیسی تا سوب ئٹ بلوچستان نا ہر تدینگوک دے ئتون اوار بلوچ اُلس ئٹ ریاست نا برخلاف نفرت ودیسہ ءِ و ریاست بلوچستان ئٹ اُلسی مخ تفی ءِ ایسر کریسہ ءِ۔
تربت نا علاقہ ڈنک ئٹ سم کاری نا اسہ تدینی اسیٹ اسہ بندغ اس بیران مس۔
حوالکار آتا رد ئٹ نادرست سلہہ بند بندغ آک سم کاری کریسہ امان ولد غلام، ہند دشت ءِ کسفیر۔ مرگ ئنا گواچی مروک دا وخت گوگدان ئٹ ہندی ئس۔
پولیس تدینی نا پٹ و پول ءِ کریسہ پارے کہ سم کاری آن گڈ جلہو کار آک نرار، ہرافتا پٹنگ کن کارروائی برجا ءِ۔
واہم تدینی نا سوب آک دائسکان سما تمنگ کتوس۔
بلوچستان نا ضلع کیچ نا علاقہ دشت آن اینو پاکستانی لشکر اسہ کاروائی اسیٹی شش بندغ دزگیر کریسہ بیگواہ کرینے۔
علاقائی حوالکار تا ردئٹ، فرنٹیئر کور (ایف سی) و ڈھکوک ادارہ تا کارندہ غاک دشت نا علاقہ درچکو ٹی کیہی اُرا تیا چھاپہ خلکر۔ ہندی بندغ تا پاننگ ءِ کہ فورسز آک شش بندغ ءِ خن تیا ڈی تفیسہ تینتون دریر، و اوفتا حالیت و ہند ئنا بابت ہچو معلومداری تننگتنے۔
بیگواہ مروک آتیٹ دائسکان چار ئنا چاہنداری برکت نا مار لہداد، بشیر نا مار وسیم، احمد نا مار ایاز، و فقیر نا مار شکیل نا پِن تیٹ مسنے اندن اِرا بندغ نا چاہنداری دائسکان متنے۔
بلوچستان ئٹ زوراکی نا بیگواہیک اسہ بھلو مسئلہ ئسے ءُ، منہ دے ئٹ دافتیٹی اسہ وار پدا ترندی خننگنگ ءِ۔ اندن برجاء ہفتہ بلوچستان ئٹ پاکستانی لشکر نا دو آن بیگواہ مروک ورنا تا دزگیر ئٹ بیدس عدالت کسفنگ نا تدینیک رپورٹ مسنو۔
