مکران نا وکیل تنظیم آک ہدہ جیل کوئٹہ ئٹ بندی بلوچ زالبول آتیا بیدادی و بیبو بلوچ نا سی ٹی ڈی نا دو آن جیل آن برمتہ مننگ نا برخلاف اینو، 24 اپریل آ تیوہ عدالتی بائیکاٹ مریسہ ءِ۔

مکران ہائیکورٹ ایسوسی ایشن، کیچ بار ایسوسی ایشن، گوادر بار ایسوسی ایشن، و پنجگور بار ایسوسی ایشن نا پارہ غان شینک مروک اسہ اوار ءُ پڑو اسیٹی پاننگانے کہ ہدہ جیل ئٹ ڈاکٹر ماہ رنگ بلوچ، گلزادی بلوچ و بیبو بلوچ آ گمانی وڑ ئٹ ریاستی ادارہ غاتا پارہ غان بیدادی کننگ نا ترند مذمت ءِ کننگک۔

پڑو ئٹ بی وائی سی نا راہشون بیبو بلوچ نا سی ٹی ڈی نا دو تیان برمتہ ءِ غیر قانودی و و نمن پن کریسہ پاننگانے کہ دا گامک بندغی حق آتا پاش برخلافی ءُ۔

پڑو ئٹ اینو 24 اپریل آ تیوہ مکران ئٹ عدالتی کارروائی تا بائیکاٹ و برانز نا پڑو کریسہ ذمہ وار کالخواہ تے خبردار کننگانے کہ بلوچ زالبول آتا برخلاف بے قانودی و بیداد آ گام تے یلہ کیر، نئے گڑا ایلو دروشم تیٹ وکیل آتا تنظیم آک ترند آن ترند گام ءِ دوئی کننگ آ بیوس مرور، ہرانا تیوہ ذمہ واری ریاستی ادارہ غاتیا مرو۔

بلوچستان نا علاقہ بارکھان آن پنچ بندغ زوراکی ئٹ بیگواہ اندن شش بندغ آجو کننگار۔

شابیتی حوال تا ردئٹ برجاء سال 3 اپریل آ بارکھان رکھنی نا بنجاہی بازار آن چمالنگ ڈھڈر نا ہندی محمدانی مری خاہوت نا پنچ بندغ ءِ پاکستانی لشکر دزگیر کننگ آن پد زوراکی ئٹ بیگواہ کرے۔

زوراکی ئٹ بیگواہ کننگوک بندغ آتیان میاندار نا مار بختیار ءِ دزگیر ئٹی بھاز بیدادی نا گواچی کننگا ہرادے ہفت دے آن پد آجو کننگا۔ واہم بھاز بیدادی نا سوب آن او دراخ مننگ کتو و ساہ تس۔

ایلو 4 بندغ دائسکان بیگواہ ءُ ہرافتیان اسٹ ئسے نا چاہنداری میاندار نا مار موسیٰ نا پِن ئٹ مسنے، اندن ایلو 3 بندغ نا چاہنداری دائسکان مننگ کتنے۔

ایلو پارہ غان برجاء سال 4 اپریل آ دوزان ڈھاڈر آن پاکستانی لشکر نا دو آن زوراکی ئٹ بیگواہ محمد انور نا مار محمد عمر، غلام سرور نا مار عبدالوہاب، پائند خان نا مار سراج احمد، غلام سرور نا مار بسم اللہ، پائند خان نا مار شاہجان و سائیں داد نا مار صدام حسین قوم کرد ہند دشت مستونگ آجو مریسہ تینا اُرا تیا سر مسر۔

قلات ٹی سلہہ بند بندغ آک پاکستانی لشکر ءِ جلہو ئٹ ٹک کریسہ پوسٹ نا رکھوک چوکی تے کوزہ کریر ۔

قلات نا علاقہ شیخڑی ٹی موڑگند نا ہند آ سلہہ بند بندغ آک پاکستانی لشکر نا آٶٹ پوسٹ آتا رکھوک چوکی تیا جلہو کریسہ کوزہ کریر ۔ جلہو ٹی فورسز ءِ جانی نسخان آتیتون مون تروئی تما ۔

ذرائع ٹی بی پی ءِ پارے کہ تدینی استو مس ہراڑے سلہہ بند بندغ آک بھلو کچ ئسیٹ اسہ وخت آ مورچہ غا جلہو کریر ۔

ذرائع نا پاننگ ئس کہ گھنٹہ غاتیان برجاء مروک جلہو تیٹ جلہوک کروک آک رکھوک مورچہ آتیا کوزہ کننگ ٹی سر سہب مسر ۔

کوالخواہ دائسکان دا بابت ئٹ ہچو شابیتی احوال ئس فراوان کتنے ۔ علاقہ ٹی بلوچ سلہہ بند آزاتی دوست تنظیم آک اوار ءُ واہم جلہو نا زمہ واری ءِ دائسکان کس ارفتنے ۔

بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹ پارے کہ سرمچارک 21 اپریل نا نن ہشت بجہ نا وختا خاران شار ئٹ گْواش روڈ آ ساڑی کوزہ گیر پاکستانی لشکر نا چیک پوسٹ آ خودکار سلہہ تیٹ جلہو کریر۔

او پارے کہ دا جلہو ئٹ سرمچارک اول چیک پوسٹ نا مورچہ نا مونا سلوک ایف سی کارندہ غاتے سمکاری کرسا مرگ ئنا گواچی کریر ہراکان گڈ حکمت عملی نا رد ئٹ سمکاری ءِ جھٹ ئس توریر۔ وختس دشمن کارندہ غاک تینا کہوکا سنگت آتا جون تے ارفنگ کن مُچ مسُر تو سرمچارک خود کار سلہہ تیٹ اوفتے ٹک کریر ہراڑا دشمن لشکر ءِ پین جانی و مالی نسخان ہرفوئی تما۔

او ایسر ئٹ پارے کہ بی ایل ایف دا جلہو نا ذمہ واری ءِ ارفک و بلوچستان نا آجوئی اسکان کوزہ گیر لشکر و اونا تنصیب آتے ٹک کرسا کرو۔

بلوچستان نا ضلع گوادر نا علاقہ پسنی آن تعلقداری تخوک 19 سالی ایف ایس سی میڈیکل نا خوانندہ میار بلوچ ءِ دوشمبے و سئے شمبے نا نیامیکو نن اونا اُراغان زوراکی ئٹ بیگواہ کننگانے۔

میار بلوچ نا خاہوت نا پاننگ ءِ کہ او تینا اُرا، وارڈ نمبر 1 پسنی ٹی ساڑی اسک ہراتم نادرست آ بندغ آک اودے زوراکی ئٹ ہرفِسہ تینتو دریر۔

خاہوت نا پاننگ ءِ کہ اونا بیگواہی ٹی پاکستانی ڈھکوک ادارہ غاتا دو ارے۔

بلوچ یکجہتی کمیٹی نا بنجاہی راہشون ڈاکٹر صبیحہ بلوچ پارینے کہ اینو ہمو ہم تینے بلوچ آتا دوست خواہ پاریسہ ءُ، ہرا شانزدہ سال ئنا معصوم آ چناتے بندی تخانو۔ او چنا تا امتحان آتیٹی بیرہ اسہ دے ئسے پین، ولے کوئٹہ ڈپٹی کمشنر نا کڑدار دا وخت تیوہ وڑ آ ریسسٹ و فاشسٹ ئسے آن بار ءِ۔ تھری ایم پی او آن بار انگا تہار آ قانود ئٹ نئے چناتا سن ئنا خیال ءِ کریسہ ءُ، نئے اوفتا خواننگ نا۔

او پارے کہ نن دا ظلم ءِ است ئنا ہب ئٹ سگیسہ اُن، تینا راہشون آتا یلہ کننگ کن ننا سیاسی و قانودی جہد برجا ءِ۔ ولے دا چنا تیکن است دتر نا خڑینک ہوغک ہرافتے خواننگ نا حق آن پدماندہ تخسہ ءُ۔ کوئٹہ نا ڈی سی اینٹی بلوچ رویہ دیہاڑ ئٹ اسہ مونو داغ ئسے نا وڑ آ یات تخنگو۔

او پارے کہ ننا معصوم آ چناتا دتر ءِ وہفنگا، ننا سنگت آتے بے دادی آ کیز ئٹ تخنگا، و ننے خواننگ آن بار انگا بنیاتی حق آن ہم مر تخسہ ءُ۔ دا کلے اندا سوب کریسہ ءُ کہ نن تینا راجی پجار، حق و انصاف نا ہیت ءِ کینہ۔

ڈاکٹر صبیحہ بلوچ پارے کہ ننا بروکا زنک دا ظلم آتے وختس ہم گیرام کروف۔ دا ظالم کالخواہ تا تروکا ڈکھ، ننا نفرت ءِ ساندہ زندہ تخو۔

بلوچستان نا ضلع کیچ و ڈیرہ بگٹی آن پاکستانی لشکر 9 بندغ ءِ دزگیر کریسہ نادرست ہند آ سر کرے۔

شابیتی حوال آتا رد ئٹ بلوچستان نا علاقہ تربت آپسر آن تعلق تخوک 37 سال نا سیفا ولد مولا بخش استو زوراکی ئٹ بیگواہی نا گواچی کننگا۔

تدینی 20 اپریل 2025 آ نن ئنا 9 بجہ غا مون آ بس۔ علاقہ نا بندغ و خن خنوک شاہد آتا رد ئٹ سیفا ءِ اونا اُرا نا خڑک آن زور ئٹ گاڑی ٹی شاغسہ نادرست ہند آ دننگانے۔

پن کروک بندغ پیشہ نا بابت ئٹ ڈریور ئسے۔ اونا خاہوت والاک دوبہ خلکنو کہ اودے ملٹری انٹیلیجنس نا کارندہ غاک برمتہ کرینو۔

اوفتا پاننگ ءِ کہ تدینی آن گڈ سیفا نا ہچو حوال اف ہرانک و ہرا حالیت ئٹ ءِ۔

خاہوت سیفا نا دمدستی یلہ کننگ نا خواست ءِ کریسہ پارے کہ اگہ اوڑا اسہ دوبہ اس ارے گڑا اودے عدالت ئٹ مون آ ہتیر، دن بیگواہ کننگ بندغی حق آتا برخلاف ءِ۔

ڈیرہ بگٹی آن رسینگوک حوال آتا رد ئٹ سی ٹی ڈی غلہ و دال ئنا کاروبار کروک کیہی واپار آتے دزگیر کرینے۔

ہندی بندغ آتا رد ئٹ اوفتان بھلو زر اس ڈنڈ ئٹ خواہس۔ ہرا بندغ آک دا زر ءِ تننگ نا لائخ ئسر، اوفتے یلہ کننگا، ولے ہرا غریب آک دا زر ئنا بست و بند ءِ کننگ کتوس، او زوراکی ئٹ بیگواہی نا گواچی مسور۔

ہرافتا چاہنداری گل محمد ولد جمعہ بگٹی، گوڑو ولد بخت علی خان بگٹی، مرید ولد خدا بخش بگٹی، علی خان ولد عمر بخش بگٹی، گولا لالہاں بگٹی، مہندرا بگٹی، بھلا بگٹی و جاوید ولد عرض محمد بگٹی نا پن تیت مسونے۔

ڈیرہ بگٹی ٹی بھلو کچ اسیٹ سلہہ بند بندغ آک پترینگار و کسر تے تفیسہ اسہ بندغ ئسے دزگیر کریر۔

حوال تا ردئٹ بلوچستان نا ضلع ڈیرہ بگٹی ٹی سلہہ بند بندغ آک بھلو کچ اسیٹ سُغاری و گوپٹ نا علاقہ تیٹ کسر تے تفیسہ ڈیرہ بگٹی ءِ ایلو بلوچستان و سندھ ئتون گنڈوک کسر تے بند کریر و ٹریفک ءِ توریسہ پَٹنگ بنا کریر۔

دا وخت آ سلہہ بند بندغ آک شار نا تہٹی عدل خان کالونی ٹی پترینگار و بازار ئٹ چرینگنگ آن پد سرفراز بگٹی نا ذاتی رکھوک بندغ ءِ دزگیر کریسہ تیتون دریر۔

گڈیکو حوال تے اسکان شار ئٹ بھلو کچ اسیٹی سلہہ بند بندغ آتا ساڑی مننگ نا حوال آک رسینگانو۔

یاتی مرے ڈیرہ بگٹی ساڑی آ صوبائی وزیر اعلیٰ سرفراز بگٹی نا باوہ پیرئی علاقہ ءِ اندن بلوچستان نا وزیر اعلیٰ نا دفتر نا پارہ غان دائسکان دا بابت ہچو معلومداری اس فراوان کننگتنے۔

بلوچستان ئٹ آجوئی دوست سلہہ بند تنظیم آک ہڑدے جتا علاقہ تیٹ پترینگسہ تینا چیک پوسٹ آتے ٹہفرہ اندن کوئٹہ، کراچی تون اوار بلوچستان ءِ افغانستان تون گنڈوک بنجاہی کسر تیا گاڑی تے پَٹیرہ۔

اندا وڑ استو سلہہ بند بندغ آک بلوچستان نا ضلع کیچ ئٹ ہوشاپ و تربت نا نیامئی علاقہ ٹی کسر ءِ تفیر اندن دا وخت آ بولان و بیلہ غان خڑک ہم سلہہ بند بندغ آتا ساڑی مننگ، ہن و بر و کسر تا تفنگ نا حوال آک رسینگانو۔

کیچ ئٹ ہمو وخت آ سلہہ بند بندغ آک کسر ءِ تفیسہ گاڑی تا پٹنگ ءِ بنا کریر اندن کارروائی کریسہ ہوشاپ لیویز تھانہ غا کوزہ کریسہ ہموڑے ساڑی سرکاری سلہہ تے ہم دوئی مسوسر۔

بلوچستان ئٹ ہر وخت دا وڑ نا تدینی تا ذمہ واری ءِ بلوچ آجوئی دوست سلہہ بند تنظیم آتا پارہ غان ارفنگک واہم دا تدینی تا ذمہ واری ءِ دائسکان ہچو تنظیم اس ارفتنے۔

بلوچستان حکومت ڈاکٹر ماہ رنگ بلوچ و بیبو بلوچ نا مُسہ ایم پی او نا ردئٹ نظر بندی ٹی پین 30 دے نا ودکی کرینے۔

تدوکا ہفتہ بلوچستان ہائی کورٹ ماہ رنگ بلوچ کیس نا پیشی نا وخت آ اونا ضمانت ءِ رد کریسہ گیشتر کارروائی کن سیکریٹری داخلہ بلوچستان آ رادہ کریسس۔

تدوکا ہفتہ عدالتی کارروائی آن پد اینو ایڈیشنل چیف سیکریٹری داخلہ نا پارہ غان شینک کروک نوٹیفکیشن نا ردئٹ، ہڑتوم آ راہشون تا نظربندی نا وخت پورا مننگ آن پد دوارہ 30 دے اکن ودفنگانے۔

ڈاکٹر ماہ رنگ بلوچ و بیبو بلوچ نا وکیل عمران بلوچ نا ردئٹ اونا مؤکل آک مالو آن تدوکا 30 دے آن دزگیر ئٹی ءُ، و داسہ حکومت نا پارہ غان شینک کروک پوسکنا فرمان نا ردئٹ اوفتا نظر بندی نا وخت ودفنگانے۔

یاتی مرے پنی آ بلوچ حق آتا جہدکار ڈاکٹر ماہ رنگ بلوچ، و بیبو بلوچ ءِ 22 مارچ 2025 آ کوئٹہ ٹی اسہ پرامن برانز ئسے نا وخت آ بلوچ یکجہتی کمیٹی نا ایلو راہشون تیتون اوار دزگیر کننگا، اوفتا برخلاف تھری ایم پی او (3MPO) نا ردئٹ مقدمہ نوشتہ کننگا، ہرا پاکستان ئٹ بھازی سیاسی باسک آتے بیدس اسہ باقاعدہ ٹرائل ئسے آن دزگیر کننگ کن کاریم ئٹ ہتنگک۔

ڈاکٹر ماہ رنگ بلوچ و بیبو بلوچ تون اوار بلوچ یکجہتی کمیٹی نا گل زادی بلوچ، شاہ جی صبغت اللہ و بیبرگ بلوچ تون اوار بی وائی سی نا پین کیہی باسک آک پولیس نا دزگیر ئٹی ءُ ہرافتے جتا وخت آتیٹ دزگیر کننگاسس۔

بلوچ خوانندہ غاتے بھیم ئنا گواچی کننگ، پروفائلنگ و ہاسٹل آتیان کشنگ آ بلوچ اسٹوڈنٹس کونسل پنجاب نا خلیس نا درشانی۔

بلوچ اسٹوڈنٹس پنجاب تینا شینک کروک بیان ئٹ پنجاب یونیورسٹی لاہور ئٹ بلوچ خوانندہ تے بھیم ئنا گواچی کننگ، پروفائلنگ و ہاسٹل آتیان زور ئٹ کشنگ آ ترند خلیس نا درشانی ءِ کرینے۔

ترجمان نا پاننگ ئس کہ دا عمل ریاستی تعلیم دژمن و بلوچ خوانندہ غاتے کتاب آتیان مر تخنگ نا چم ئنا بشخ ئسے۔

بیان ئٹ پاننگانے کہ بلوچستان ئٹ سال آتیان برجا خوانندہ آتا برخلاف کریک ڈاؤن و زوراکی ئٹ بیگواہی تا لڑ داسا پنجاب نا خوانوک ادارہ آتے اسکان تالان مسونے ہراتم بلوچ خوانندہ غاک حالیت آتا زوراکی آن پیشتمسہ جوانو تعلیم اسیکن پنجاب آ مون کیرہ گڑا داڑے ہم اوفتے تون فرخی سلوک ہڑدے نا اس جوڑ مسونے۔

ترجمان نا رد ئٹ پنجاب یونیورسٹی ئٹ بیرہ پن ئنا ڈسپلنری کمیٹی پردہ ٹی ڈکوک ادارہ غاتے تیوہ آزاتی تننگانے او ادارہ آتا کارندہ غاک خوانندہ آتا کسر ءِ توننگ ئٹ یا گڑا کلاس و ڈیپارٹمنٹ آتیٹ ہنیسہ اوفتے سیاسی کاریم تیان پد مننگ نا تڑی ایترہ داسا یونیورسٹی نا ماحول اسہ تعلیمی درسگاہ اسے نا جاگہ غا اسہ فوجی چھاؤنی اسے نا دروشم ءِ ایتک۔

پین پاننگانے کہ بلوچ خوانندہ آتے زور ئٹ ویڈیو جوڑ کرفیسہ یونیورسٹی بست و بند نا سفت ءِ کننگ آ بیوس کننگسہ ءُ و اوفتے ہاسٹل آتیان کشیسہ خلیس نا حالیت اس ودی کننگ ءُ تاکہ او خواننگ ءِ النگ آ بیوس مریر۔

او پاریر کہ بیدس تعلقدار بندغ آتا پارہ غان یونیورسٹی ئٹ ساڑی بلوچ خوانندہ آتیان اوفتا خیال و تنظیم آتا بابت ئٹ سوج کننگ و سوج کننگ ہم ہڑدے ئی گڑاس مسونے۔

بیان ئٹ بلوچ خوانندہ آتا حالیت ءِ پین بھیم بش کروک پن کریسہ پاننگا کہ اوفتے زبان و پچ آتا بنیات آ ٹک کریسہ ءُ اگہ منہ خوانندہ غاتے اوار خننگا گڑا اوفتے تڑی خط تننگک۔

ترجمان کل خوانندہ تنظیم سول سوسائٹی و بندغی حق آتا ادارہ آتیان خواست کرے کہ او دا ترند و افسوز انگا حالیت آتا برخلاف توار بُڑز کیر انتئے کہ بلوچ خوانندہ غاتے خواننگ آن مر تخنگ اسہ بے منوک عمل ئسے ہرا نا ترند مذمت ءِ کننگے۔