پنجاب نا شار ملتان ئٹ اِرا درزن آ بندغ آک برانز کریسہ حکومت آن بلوچ لبریشن آرمی نا برخلاف کاروائی نا خواست کریر۔

دا برانز ئٹ بلوچ لبریشن آرمی نا دو آن کوزہ مروک ریل ئٹ مرگ ئنا گواچی مروک فوجی کارندہ آتا خاہوت آک اوار مسر و انصاف نا خواست ءِ کریسہ بی ایل اے نا برخلاف کاروائی کننگ نا خواست کریر۔

یاتی مرے کہ برجا سال مارچ ئٹ بلوچ لبریشن آرمی نا پارہ غان جعفر ایکسپریس آ جلہو کریسہ اودے کوزہ کننگاسس۔ کوزہ کننگ نا وخت بی ایل اے کُل ءِ شاری تے یلہ کرے و ریل ئٹ سوار 214 پاکستانی لشکر نا کارندہ آتے بندی کریسُس۔

بی ایل اے بندی تا یلہ کننگ ءِ قیدی تا ہڷ و تِس ئتون تفیسس و پاکستانی لشکر ءِ 48 گھنٹہ نا وخت تِس اندن ہمو وخت پاکستانی لشکر آپریشن ءِ بنا کرے و بی ایل اے کُل ءِ بندی تے مرگ ئنا گواچی کرے۔

دا جلہو آن پد، کوئٹہ غان پاکستان نا ایلو جاگہ تیکن ٹرین سروس سما مفروک وخت ئکن بند کننگا۔

بلوچستان نا شار حب چوکی آن پاکستانی لشکر بلوچستان یونیورسٹی نا لٹریچر ڈیپارٹمنٹ نا ارٹمیکو سیمسٹر نا خوانندہ ءِ دزگیر کریسہ نادرست ہند آ سر کرے۔

بیگواہ مروک ورنا نا چاہنداری کیا بلوچ ولد محمد اشرف، ہند مشکے کلر نا پن ئٹ مسونے۔

خاہوت نا بندغ آک اونا زوراکی ئٹ بیگواہی نا پک ءِ کریسہ دمدستی یلہ کننگ نا خواست کرینے۔

گر وَختس گپّ کہ مرے دلبری نا
ساہ ءِ صدخہ کروکا جندندری نا

کپّ کپّ کیک تینے او بشخندہ ئٹ
ھُر نی مہر ءِ دلبر آ اے فدائی نا

سمائی ئٹ او کُورِک دا بےسما ءِ
انت ءُ یار رازداری ئسے زرابی نا

جُوژ تیک دُژمن ءِ امر زیبا غا چُنا
ایسر ءِ اوڑان اینگ کِسہ زیبائی نا

گِروک نا وَڑ بدر آتے چٹّ اُشیک
ار نیمہ غا تالان ءِ رُژن شتابی نا

کُفر آباد ءِ مست آ،کرینو لاڈیک ابکّہ
ڈُب خنی ام خنا دک ءِ جوان کبابی نا

گودل آک اوار مجیدی ولر تون اریر
امر زیبا ءِ ٹولی جندندر آ شارُلی نا

گوادر نا گوڑاخ ماھلو ءِ زیبل آ
کسہ ءِ کین ریحان نا اے سمُلی نا

چُناتے لُمہ یاسمین نا دیر کٹنگ کیک؟
دا تو لشکر ءِ امو سرسوب آ اسلمی نا

پننگو لوز آک چٹ خُڑکا کنا بفسہ
کروٹ ای امر درشان ساہ صدخئی نا

پھلین بلوچ

ہزار ظلم ستم کرک
دا کاٹمے کلم کرک
نی مو نےتینا مون کر
دا زیبلا تے ارف در
اوتا کہ لا شے ہس تا کر
او بھگی اے نی چکسہ
او پین وخت اسو رہ
کہ ظلم تینانی کرک
برور وارثا ک ڈیھ ئنا
ترور جوژ خنتےنا
اونا پنے ختم کرور
ڈغار آسمان ئٹی
پنے نا کس اس الپرو
خاخر ترور بنچخ آن
کہ ماس کش کرور پدا
تپرو س ارا نگے کاو
اخس کہ وسے نا کرک
نی مو نے تینا مون کر
منپک کنا دا است نمے

باسط ہکلی

تھری ایم پی او نا ردئٹ دزگیر مروک سمی دین بلوچ آجو کننگا۔

سمی دین نا ہیڑ مہلب بلوچ پک کریسہ پارے کہ کنا ہیڑ، سمی دین، آجو مس۔

مہلب دین پارے کہ ای ایڈووکیٹ جبران ناصر و غٹ بندغی حق آتا باسک، سول سوسائٹی نا باسک و ہر ہمو بندغ ءِ اُست ئنا ہُب ئٹ منتوار پاوہ ہرا ننتون اوار سلیسر، تینا توار ءِ بڑز کریر، و انصاف کن جہد کریر۔

سمی دین نا وکیل جبران ناصر دادے پک کریسہ پارینے کہ سندھ حکومت سمی نا پِن ءِ MPO آن پدا ہلکنے و اودے آجو کننگانے و او دا وخت تینا خاہوت تون اوار ءِ۔

او پارے کہ سمی نا آجوئی ءِ یقینی جوڑ کننگ ئٹ الس و میڈیا نا زور شاغنگ اہم ئس۔ واہم لالا وہاب، شہداد رازق و سلطان (ہرا بالغ افس) نا ردئٹ ایم پی او دائسکان ہم ارے۔

او پارے کہ نن خواست کینہ کہ بی وائی سی نا ایلو باسک آتا برخلاف ایم پی او تیوہ وڑئٹ پدا ہلنگے ہرافتا ایمنی ئٹ برانز بنداوی و جمہوری حق ءِ۔

او پارے کہ سمی نا یلہ کننگ ریاست نا پارہ غان درست پارہ غا اولیکو گام ءِ۔ نن ماہ رنگ و بلوچستان حکومت نا دزگیر ٹی بی وائی سی نا غٹ باسک آتا دمدستی یلہ کننگ نا ہم خواست کینہ۔

سہب ننا ءِ

نوشت: درناز رحیم

دی بلوچستان پوسٹ

ہراتم قومی تحریک آک ہمو سند آ سر مریرہ کہ ہراڑے او ظالم، جابر، سامراج و کوزہ گیر ریاست نا روتہ غا تیٹ دو شاغنگ و اونا وجود ئے چیلنج کننگ ئٹ سرسہب مریرہ گُڑا سامراج و کوزہ گیر ریاست آک ہم تینا نہاری آ دروشم ئٹ بریسہ تینا رکھنگ نا بے سہب و گُڈیکو کوشست ئے کیرہ۔۔۔۔ ہئو۔۔۔ بے سہب کوشست۔۔۔ انتئے کہ دیہاڑ دا ہیت ئنا شاہدی ایتک کہ اسہ راج ئسے نا رضا آن چَپ، زوراکی ئٹ، ظلم ئٹ و تادی ئٹ ہچو زوراک ئس ہچو کوزہ گیر ئس تینے اُرے اسکان رکھنگ کتنے۔

اینو نا برجاء غا تحریک پوسکنو و ناگمان آ ودی مروکو تحریک ئس اف، بلکہ دا مزاحمت نا ہمو چرجوئی ءِ ہرا 27 مارچ 1948 آ بلوچستان آ پاکستان نا زور ئنا کوزہ غان گُڈ بناء مس۔ ہمو وخت آن بلوچ نا مزاحمتی تحریک آک بش مریسا کرینو چائے او آغا کریم، بابو نوروز، ہفتاد نا دہک ئٹ بناء کننگوک راجی کماش آتا تحریک مرے۔ ولے اینو نا ہرا برجاء غا تحریک ءِ دا غُٹ آن سوگو و منظم تحریک سرپند مننگک۔ داٹی بلوچ نہ بیرہ سلاہ بند پڑ آ بلکہ سیاسی پڑ آ ہم متحرک و منظم ءِ۔ دا تحریک ئٹ بلوچ نا نیاڑیک ہم ہڑتمو پڑ آ اسہ بنداوی کڑد ئس سر تننگ ءُ۔ اندا سوب ءِ کہ کوزہ گیر اینو تینا ایسر ئے خُڑک خنِسہ تینا زوراکی، بیدادی و تادی تِہ ہم ودفنگ ءِ۔

اینو ہزار آ بلوچ نرینہ، نیاڑی، چُنا و پیر و کماش آتا زندان تیٹ بندی مننگ دا ہیت ئنا پاش شاہدی ءِ کہ ریاست نا گُڈیکو ساہ ءِ، او تینا بچفنگ کن گُڈیکو وار نت و دو خلنگ ءِ۔ بلوچ نیاڑی تا راہشونی ٹی برجاء بلوچ نا سیاسی و پُرامن جہد ریاست ئے انداخس بیم و خُلیس نا گواچی کرینے کہ اینو او بلوچ نا چُنا نیاڑی تیا دو شاغنگ ءِ، اوفتے ہم ہمو وڑ زندان تا گواچی کننگ ءِ و بندی کننگ ءِ امر کہ او تدوکا وخت ئٹ نرینہ غا تے زندان تا گواچی کریکہ و اینو ہم کننگ ءِ۔

او کہ زندان تا گواچی ءُ او تو مزاحمت نا شمبلاخ آن ودی مروکا روشنائیک ءُ، ہمو روشنائیک ہرا تہار آ کوٹی تیٹ ہم نزور تمپسہ، بلکہ تینا روشنائی ئٹ مزاحمت نا کلہو ایترہ، ہمو مزاحمت ہرا ظالم، جابر و کوزہ گیر نا گُٹ ئٹ لوپ مریک و اودے چُھٹفک۔

دا ہیت دے آنبار روشن ءِ کہ بلوچ تینا مزل آن اخس خُڑک مس اودے کوزہ گیر نا کنڈ آن ہموخس زوراکی تتون مون تروئی تمو، و نن خننگ اُن کہ ریاست نا زوراکی تیٹ اخس کچ اسکان ودکی مننگ ءِ۔ اینو بلوچ قوم نا نیاڑیک ہم زندانی ءُ و ہمو زندان تا در و دیوال آک دا شاہدی تننگ ءُ کہ سہب ننا زندانی آ گودی تا ءِ، سہب ننا زندانی آ خواجہ غا تا ءِ، سہب ننا سنگر ہلوک لشکر نا ءِ، و سہب بلوچ راج ئنا ءِ۔

بلوچ یکجہتی کمیٹی نا سروک آتا برخلاف پاکستانی لشکر نا کریک ڈاؤن برجاء ءِ۔ پین اِرا زالبول باسک پاکستانی لشکر دزگیر کرینے۔

بلوچ یکجہتی کمیٹی نا ردئٹ ننا اِرا زالبول باسک ماہ زیب بلوچ و فوزیہ بلوچ ءِ پاکستانی لشکر دزگیر کرے۔ بلوچ باسک آتا برخلاف کریک ڈاؤن برجاء ءِ۔

بی وائی سی نا ردئٹ اینو اِرا زالبول باسک ماہ زیب بلوچ و فوزیہ بلوچ ءِ اوتھل برانز آن بننگ وخت آ گڈانی کراس آ فورسز آک دزگیر کرینو۔

او پارے کہ زالبول باسک آتے ریاست نا پارہ غان ٹک کننگ اونا بے جاراتی ءِ پاش کیک ولے بلوچستان سلوک ءِ، ہر دزگیری ننا ارادہ ءِ سوگو کیک۔

بلوچستان نا ضلع آواران ئٹ پاکستانی لشکر چار بیگواہ بندغ تے کسفسہ اوفتا جون تے گیاوان ئٹ خسانے۔

جون تا چاہنداری نیاز محمد نا مار ظہیر، عبدالواحد نا مار ارشاد، عبدالطیف نا مار سیف و عظیم نا مار توسیف نا پِن تیٹ مسنے۔

پن کروک ہر چار بندغ ءِ پاکستانی لشکر آواران نا علاقہ مشکے آن 28 فروری آ جتا علاقہ تیان دزگیر کریسس۔

خیال ئٹ مرے اوفتیتون اوار دزگیر مروک ایلو چار بندغ نا جونک مالو خسنگاسر۔ ہرافتا چاہنداری محمد عالم نا مار کامران، نیاز محمد نا مار معراج، اسلم نا مار مومن و حفیظ نا پن تیٹ مسنے۔ اوفتے زوراکی ئٹ بیگواہی نا اسہ دے ئسے آن پد کسفسہ گیاوان ئٹ خساسر۔