سردار اختر مینگل نا سروکی ٹی بلوچستان نیشنل پارٹی نا لانگ مارچ ءِ کوئٹہ ئٹ پیہنگ آن توننگا، بی این پی تیوہ بلوچستان ئٹ شٹر ڈاؤن و پہیہ جام ہڑتال نا پڑو کرینے۔

پارٹی نا باسک آتے پنت تننگانے کہ او ہراڑے ساڑی ءُ ہموڑے تولوک برانز بنا کیر، اندن لکپاس نا تولوک برانز برجاء مرو۔

اختر مینگل نا ردئٹ لانگ مارچ ہڑاند آتا سوب لکپاس آ توننگانے و ہموڑے تولوک برانز برجاء مرو، او پارے کہ اینو آن بلوچستان نا غٹ ضلع تیٹ پارٹی نا باسک آک تولوک برانز بنا کرور ایسکان کہ لانگ مارچ ءِ کوئٹہ نا پارہ غا برجاء تخنگ نا موکل رسینگتنے لکپاس آ برانز برجاء مرو دہ دے لگے یا توہ۔

او پین پارے کہ اگہ ننا اسہ ہم باسک ئسے نسخان رسینگا گڑا دانا ذمہ واری ریاستی ادارہ تیا و صوبائی حکومت آ مرو، پارٹی نا باسک آک ہراڑے گٹ مروک ءُ ہموڑے تولوک برانز کیر اینو آن تیوہ بلوچستان ئٹ شٹر ڈاؤن و پہیہ جام ہڑتال کننگو۔

بلوچستان نیشنل پارٹی مینگل نا لانگ مارچ ڈاکٹر ماہ رنگ بلوچ تون اوار بی وائی سی راہشون تا دزگیری نا برخلاف اینو کوئٹہ نا پارہ غا مارچ کننگ ئس ہرادے حکومت لکپاس ٹنل آ کنٹینر تخیسہ کوئٹہ نا تہہ ئنا کسر تے بند کرینے۔ حوال تا ردئٹ کوئٹہ ئٹ ساڑی بی این پی نا کم آن کم بیست باسک دزگیر کننگانو۔

بلوچستان حکومت درشان کرینے کہ اگہ اختر مینگل کوئٹہ ئٹ پیہنگ نا کوشست کرے گڑا اودے دزگیر کننگو، حکومت لانگ مارچ ءِ توننگ کن جتا ہند آتیا کڈ خُتسہ ہڑاند بش کرینے و کوئٹہ تون اوار ایب کیب ئنا علاقہ تیٹ موبائل نیٹ ورک بند کننگانے۔

بی این پی نا ردئٹ حکومت تولوک برانز نا ہند آ فورسز آتا بھلو کچ اس سلفینے و خُلیس پاش کرینے کہ حکومت تولوک برانز آ کریک ڈاؤن کریسہ پرامن برانزی تے دزگیر کرو۔

بی این پی نا راہشون و لانگ مارچ نا سروکی کروک اختر مینگل پارینے کہ اوفک ہر حال ئٹ کوئٹہ نا پارہ غا مارچ کرور اگہ اودے و اونا سنگت آتے نسخان رسینگا گڑا اونا تیوہ ذمہ واری بست و بند و صوبائی حکومت آ مرو۔

اندن بلوچستان نا حکومت نئے بیرہ کوئٹہ آن خڑک کسر تے بند کرینے بلکن نوشکے و گوادر آن مستونگ نا پارہ غا بروک قافلہ تے ہم توننگانے گوادر ئٹ دفعہ 144 نافذ کریسہ شاری تے اُرا تیٹ مننگ نا پنت تننگانے۔

ایلو پارہ غان حب بھوانی نا ہند آ بی این پی نا باسک آک کراچی – کوئٹہ کسر آ برانز کریسہ ہن و بر ءِ تورینو۔

بلوچستان نا علاقہ پسنی و قلات آن اِرا ورنا نا جون آک خننگانو۔

پسنی آن ورنا ساحل ولد گلاب نا جون اینو خننگا۔ جون پسنی وارڈ نمبر 1 ئٹ شاہ جان ہوٹل نا پد آن جِر بوچ آتیان خننگا۔

حوالکار تا رد ئٹ پن کروک ورنا تدوکا دے تیٹ بیگواہ مسوسس۔ جون ئنا خننگ آن پد اودے دمدستی آر ایچ سی ہسپتال آ سر کننگانے۔

پسنی پولیس تدینی نا پٹ و پول ءِ بنا کرینے تاکہ دا سما تمنگ کے کہ ورنا نا مرگ امر مس۔ خاہوت نا پارہ غان پسنی پریس کلب نا مون آ برانز کریسہ ءُ کہ پولیس زوت آن زوت دا تدینی ٹی اوار انگا بندغ آتے دزگیر کے۔

ایلو پارہ غان قلات نا علاقہ کپوتو آن ورنا ئسے نا جون خننگانے ہرانا چاہنداری امداد اللہ نا پِن ئٹ مسنے۔

کہوک ورنا عئید ئنا نن تینا اُرا پندران آ ہنیسہ ئس کہ گاڑی تون اوار بیگواہ مسوسس۔

نیشنل پارٹی نا راہشون و بندی بی وائی سی باسک بیبو بلوچ نا باوہ ماما غفار قمبرانی ءِ پاکستانی لشکر دزگیر کریسہ بیگواہ کرینے۔

اونا مار ئنا ردئٹ کنا باوہ غفار قمبرانی ءِ کوئٹہ غان بیگواہ کننگانے اندن بیبو بلوچ کنا ہیڑ قید ئٹ ءِ۔ نن پاکستانی حکومت نا دا گام آتا ترند مذمت ءِ کینہ۔

یاتی مرے داڑان مالو پاکستانی لشکر بی وائی سی نا راہشون ڈاکٹر صبیحہ بلوچ نا باوہ ءِ ہم حب چوکی آن دزگیر کریسہ بیگواہ کریسُس۔ اونا یلہ کننگ کن مسڑ نا تینے دزگیر کرفنگ تون تفنگا۔

کنا سیاسی جہد ئنا سزا کنا باوہ و خاہوت ءِ تریسہ ءُ۔ ڈاکٹر صبیحہ بلوچ

بلوچ خوانندہ راہشون و بلوچ یکجہتی کمیٹی نا سروک ڈاکٹر صبیحہ بلوچ دوبہ خلکنے کہ اونا باوہ میر بشیر احمد ءِ حب سپریڈنٹ پولیس آفس آ دننگانے و اودے پاننگانے کہ اونا آجوئی ہمو وخت اسکان مننگ کپک ہرا وخت اسکان ای صبیحہ بلوچ تینا دزگیری تتنوٹ۔

چاگڑدی حوالکاری تلہ غا شینک کروک بیان اسیٹی ڈاکٹر صبیحہ بلوچ پارے کہ کنا باوہ ءِ اسہ ڈوہ اسیکن آخہ بلکہ کنا سیاسی جہد ئنا بنداو آ ارفنگانے و دا قانود اس اف بلکن سیاسی بلیک میلنگ ئسے۔

او پین پارے کہ اونا کاریم تا سوب اونا خاہوت ءِ مالو ہم کیہی وار بھیم ئنا گواچی کننگانے ہراتم ریاست اسہ سیاسی توار ئسے چپ کرفنگ کتئو گڑا اونا سیال آتے ٹک کیک۔

او پارینے کہ ولے ریاست گیرام کیک کہ نظریہ غاک ہمو اُرا تیٹ مفسہ ہرافتیا چھاپہ خلنگ مریک او ہمو اُست آتیٹ جاگئی ءُ ہرا کاٹم ءِ شیف کننگ آن نمن کیرہ و دن انگا کاروائی تیان نن چپ مروفن۔

یاتی مرے اینو سہب ئنا بلوچستان حکومت نا ترجمان ڈاکٹر صبیحہ بلوچ نا برخلاف گمانی ریاست نا برخلاف کروک تران کننگ آ کاروائی نا پڑو کریسس۔

بلوچستان حکومت نا ترجمان شاہد رند اینو کوئٹہ ئٹ میڈیا تون ہیت کریسہ دعویٰ کرے کہ صبیحہ بلوچ درو تولوک برانز ئٹ صوبائی حکومت و ریاست نا برخلاف ہیت کرے ہرادے حکومت سوبری ئٹ اُننگ ءِ و اونا برخلاف کاروائی کرو۔

حکومت دا پڑو آن پد صبیحہ بلوچ نا باوہ ءِ دزگیر کریسہ ایس پی آفس آ دننگانے۔

ترجمان صوبائی حکومت شاہد رند پارینے کہ ڈاکٹر صبیحہ نا ریاست مخالف تران نا برخلاف کاروائی کننگو۔

بلوچ خوانندہ راہشون و بلوچ یکجہتی کمیٹی نا ڈاکٹر صبیحہ بلوچ نا درو بلوچستان نیشنل پارٹی نا تولوک برانز ئٹ اواری و تران آن پد حکومت زالبول باسک نا برخلاف کاروائی کننگ نا پڑو کرے۔

بلوچستان حکومت نا ترجمان شاہد رند ہفتہ نا دے کوئٹہ ٹی میڈیا تون ہیت کریسہ پارے کہ صبیحہ بلوچ درو برانز ئٹ صوبائی حکومت و ریاست مخالف ہیت کرے ہرادے حکومت سوبری ئٹ ہریسہ ءِ و اونا برخلاف کاروائی کرو۔

شاہد رند پارے کہ ریاست کس اسے ہم ریاست مخالف تران کننگ نا موکل تننگ کپک و صبیحہ بلوچ نا برخلاف کاروائی کننگو۔

بلوچستان حکومت نا ترجمان شاہد رند لکپاس نا خُڑک بی این پی برانز نا بابت ئٹ پارینے کہ اختر مینگل اگہ ریڈ زون ئٹ برانز نا ضد آ سلیس گڑا حکومت تون پین کسر ارے۔

او پین پارے پارینے کہ بی این پی ریڈ زون ئٹی برانز کننگ خواہک ولے اونا اجازت ءِ تننگپرو۔ برانز ہراڑے و اخس اُرے اسکان مرو دا بست و بند فیصلہ ءِ کرو۔

ترجمان پارے کہ تیوہ صوبہ ئٹ دفعہ 144 نافذ ءِ، اگہ برخلافی کننگا گڑا قانود کارم ئٹ ہتنگو۔ اگہ اختر مینگل ریڈ زون برانز نا ضد آ سلیس گڑا حکومت تون پین کسر ہم ارے۔

پاکستانی لشکر مُسہ دزگیر ئٹ مروک بندغ آتے کسفینے۔

مشکے آن حوال آتا رد ئٹ مُسہ بندغ نا جون آک خننگانو ہرافتے فورسز آک دروغ نا مون تس ئٹ کسفنگ آن پد بِٹینے ہرافتا چاہنداری ظہور ولد حضور، شاہنواز ولد جلال و حبیب ولد عیدو نا پن تیٹ مسونے۔

علاقائی حوالکار آتا رد ئٹ ظہور و شاہنواز ءِ استو مشکے نا علاقہ شردوہی آن پاکستانی لشکر دزگیر ئٹ ہلکسُس اندن حبیب ولد عیدو بیست دے مالو پاکستانی لشکر نا دو آن زوراکی ئٹ بیگواہی نا گواچی مسوسُس۔

اینو اوڑتون اوار مُسہ بندغ نا جون آک خننگانو ہرافتے بیدادی آن پد سُم خلیسہ کسفنگانے۔

یاتی مرے کہ درو ہم خضدار آن مُسہ بندغ نا جون آک خننگاسر ہرافتے پاکستانی لشکر دروغ نا مون تس تون کسفنگ نا دعویٰ کریسُس ہرافتا چاہنداری پدان زوراکی ئٹ بیگواہ مروک آتیان مسوسُس۔

بلوچستان نا جتا انگا ضلع آتیان دا وخت اسکان ہشت 8 بیگواہ بندغ آتا دروغ نا مون تِس ئٹ خلنگ نا تدینی تا حوال آک رسینگانو اندن کیہی بندغ آتا چاہنداری دائسکان مننگ کتنے۔

بلوچ یکجہتی کمیٹی نا بنجاہی راہشون ڈاکٹر صبیحہ بلوچ پارینے کہ نن مالو ہم پاریسہ بسونن و داسا ہم پانہ کہ نن کس اسیکن اسہ ہم ویل اس ودی کریسہ افن۔ نن راج ئسے نا دروشم ئٹ آزات، شریف و پرامن زند اس گدارینگ نا اُست خواہی تخنہ ولے ہرا زند ءِ ریاست ننے آن پُھلانے، او ننے خلنگ خواہک، ہر وخت ننا عزت نفس ءِ چیلنج کننگک ننے ارفنگک، ننا جون آتے بیابان تیٹ بِٹنگک۔

او پارے کہ اینو قلات نا علاقہ کوہنگ آن تعلق تخوک آ 28 سال ئنا عبدالمالک ولد محمد یوسف، ہرادے یانزدہ اکتوبر 2024 آ تربت آن پاکستانی لشکر زوراکی ئٹ بیگواہ کریسس، اسہ دروغ نا مون تِس اسیٹ شہید کننگا۔

او پارے کہ ویل بیرہ اسٹ ءِ” ہرا زند ءِ ریاست نن کہ گچین کرینے، اودے نن منیپنہ”۔ ریاست نا گچین کروکا زند دادے کہ او خلیسہ کائے و نن چُپ مرین، بیدادی جاہ تیٹ تیوہ زند بند کننگے و نن چُپ مرین، تینا بندغ آتیکن درپدر نا ڈکھ کُننگ آ بیوس کننگے و نن چُپ مرین، ہر وخت مرگ و بیگواہی نا خلیس نا سیخا ٹی تخِنگے و نن چُپ مرین۔ نن دا زند ءِ اسل منیپنہ۔

مستی پارے کہ اگہ ریاست سرپند مریک کہ ویل ماہ رنگ ءِ، صبیحہ ءِ، شاہ جی ءِ یا بیبگر ءِ گڑا ریاست رد سرپند مریک۔ ویل تینٹ ریاست ءِ، انتئے کہ اسکان ریاستی دہشتگردی، ظلم و زوراکی برجا مرو، نن مرین یا مفن، اسہ نہ اسٹ اس الم مرو۔ انتئے کہ اسہ نہ اسٹ سے بش مروئی تمو۔ اندا سوب ویل ننے ٹی اف، ریاست ئٹی ءِ۔ نن تو حق آٹن۔ نن ڈکھ، ظلم و زوراکی، مرگ و بیگواہی نا خلیس آن آزات، پرامن و خوشحال ءُ زند اس خواہنہ۔

کوئٹہ تون اوار بلوچستان نا کیہی ضلع آتیٹی موبائل انٹرنیٹ سروس دائسکان بند ءِ ہرا نا سوب آن بندغ آتے سختی تیتون مون تروئی تمنگ ءِ۔

کوئٹہ ٹی تدوکا تو ئٹ بلوچ یکجہتی کمیٹی نا برانز نا وخت کیہی دے اسکان انٹرنیٹ سروس بند کننگا و داسا بلوچستان نیشنل پارٹی نا لانگ مارچ آن پد ہم موبائل انٹرنیٹ سروس نا بند کننگ نا لڑ برجا ءِ۔

کوئٹہ و مستونگ ئٹ یکم اپریل آن دائسکان موبائل فون انٹرنیٹ بند ءِ، واہم پی ٹی سی ایل و لینڈلائن انٹرنیٹ سروس کاریم کریسہ ءِ۔ حکومت نا پارہ غان انٹرنیٹ سروس نا بند کننگ نا سوب رکھ ئنا خلیس پاننگسہ ءُ۔

واہم بی این پی راہشون آتا دعویٰ ءِ کہ انٹرنیٹ سروس و کسر تا بند کننگ نا گام آک برانز آتے بے سہب کننگ نا کوشست نا بشخ ءُ۔

انٹرنیٹ سروس نا بند کننگ نا سوب آن شاری تے عئید ئنا وخت آ تینا بندغ خاص وڑئٹ پیشن ڈیہہ تیٹ ہندی مروک آتون حوال ئٹ سختی تون مون تروئی تما۔

یاتی مرے بلوچ یکجہتی کمیٹی نا برانز آ کریک ڈاؤن و ڈاکٹر ماہ رنگ بلوچ تون اوار ایلو سیاسی باسک آتا دزگیری آن پد بلوچستان نا کیہی ضلع تیٹ انٹرنیٹ سروس ہمو وخت بند کننگا ہراتم بی این پی کوئٹہ نا پارہ غا بی وائی سی نا راہشون تا دزگیری نا برخلاف تینا لانگ مارچ نا پڑو کرے۔

بلوچستان نا ضلع ڈیرہ بگٹی آن پاکستانی لشکر اسہ بندغ اس دزگیر کریسہ بیگواہ کرینے۔

بیگواہ مروک بندغ نا چاہنداری قدیر ولد نورحسن بگٹی نا پنا مسونے۔

حوال تروک آتا رد ئٹ اینو سہب ئنا پاکستانی لشکر پن کروک بندغ ءِ زوراکی ئٹ بیگواہ کرے۔