کُلہوّ ئس

نوشت: پُلھین بلوچ

برک ساہ ئنا ٹیک
دلبر کنا ساہ ءُ جان
مِہر ئنا کسّر ئٹ مُستی
گام ئس خَلین اینو بر
دلبری نا اے ٹُل آتیا
گوفِن سنگتی نا کِسہ
اسلمی آ امو چیدہ غاتے
دُروت تریسہ خنتا تخِن

برک کنا شینلو آ ساہ
گام تے تُرند کر نی
مُخ ءِ تف زیبلو داسہ
گر درمّان ئس خواسہ
ٹپّ آتے کودک آتا
آڑسِندہ غاتے لُمہ نا
چیہانٹ ءِ ھنینا ایڑو نا
خلق ئنا تہارمئی ءِ امو
ایسری کِن دا گڑتی تا
جارات ئس بشخنگ ئکن
وداری آ اے خزمُلی خنتے
گڑگیس ءِ تینا گدان نا
بر سوگوّ کین دیدہ کنا
اف پین درمان ٹپ ءِ
دُژمن نا بُنچخ ءِ کشِن
نُسخل ئٹ نُسین اودے
دا سیم آن ایپار خسِن

برک او کنا گِڑدلو آ پُل
دُو ءِ تینا ایت دُوٹی کنا
گام خلین نودگوار ئکن
مارگٹ نا مِش تے خوڑدہ کین
کابوئی ءُ نلّی نا سیبو ٹی
بُزگر ءِ تینا وتاخ کین
گواچن آ مِہر ئنا دود ءِ
پری جل نا خن تیٹی خُلِن
دوزان نا ساہ کش آ شک آتے
خُمب کین بر شتکو کنا
اُچ کمان نا زیبائی ٹی
سانگان ءِ دیدہ کین
ناگاؤ آن مچھُل کن دلبر آ
رادہ کین کُلہو مِہر و مابت نا
خلقی آ کچاری تے پدا امو
سارو نا سنگتی ٹی اوڑدہ کین
لکّی آ دلبند نا تیدار ءِ
دتر ئٹ بر ھِنام کین

برک لُمہ نا مڷ اے زیبُلی آ
بشخندہ ئٹ،آڑسندہ ئٹ مُستی
دُژمن ءِ دمدریفِن جَل خلّی
چیلِک تون گِروگی آ مُدامی
اُمیت آتا پینگُنی ٹی ساندہ
ٹاکّو تا پلویڑ ئٹ ساہ کنا
بولانی آ ندّارہ غان جوان
چسّ الیس او زیبل آ یار
یخّو و دلبند نا شَم تان
جم آن بارّڑی نا سیل کیس
ببر کچّ نا گُشاد آ مِہر ءِ
لُوڑ تیک امر اٹکل ئٹ
خن کشّ آ لکہڑ ءِ ھُرک

برک خنتا روشنائی کنا
خوانِن سبخ ءِ مجیدی آ
سگ ءِ جیجل آ یاسمین ئنا
شِست ءِ نُورا تون مُوغِن
ٹِک تیری ءِ دلجان ئنا
خن تیٹی تینا خُلِن پدا
بسوس داسہ نی ٹَک خلپیس
سیالی تے زند ئنا مُچا سنگت
تفِس تینا گُڈیکو سُم ئٹ
بیرہ آجوئی مسخت ءِ بِن
جیجا نا خنتا پُدینی اریس نی
مر چیدہ ئس داسہ سوگوّ
بروکا اے پدریچ ئکن ننا
ہنینی، گچینی، آسودئی تفوکو
اے چراغ ئتون گوربام ئنا
ھکل ئس تُرند آ دکّ ئتون
دتر ءِ دا زگر آ شولِن اے پُل
مَشمار مرین، مِشمار مرین
جندندر مرین، سینگار کین

آواران نا علاقہ مشکے ٹی تعمیراتی کمپنی نا کارندہ غا تِہ بمب جلہو ئٹ ٹک کننگانے۔

پولیس نا رد ئٹ اینو سہب ئنا مہالو تون مشکے نا کپور و لاکھی نا نیامیکو علاقہ ٹی تعمیراتی کمپنی M 8 روڈ آ کاریم کروک ڈمپر گاڑی آ آئی ڈی تراک ئس مس ہراڑان گاڑی ئے نسخان رسینگا۔

تراک ئٹ ہچو جانی نسخان نا حوال اف۔

کوہ سلیمان تونسہ نا جہی خوانندہ لاہور آن زوراکی ئٹ بیگواہ کننگانے۔

شابیتی حوال تا رد ئٹ خوانندہ جمیل بلوچ ءِ درو ننکان پاکستانی لشکر نا ڈھکوک ادارہ غا تا کارندہ غاک لاہور نا علاقہ سلطان ٹاؤن آن دزگیر کرسا بیگواہ کرینو۔

اندن بلوچستان نا علاقہ کیچ آن پاکستانی لشکر نا دو آن زوراکی ئٹ بیگواہ کننگوک ورنا ءِ یلہ کننگانے۔

یلہ مروک ورنا نا چاہنداری بالاچ حاصل نا پن ئٹ مسنے ہرا تربت ہوت آباد نا جہی ئسے۔

پنجگور نا قلم چوک نا ہند نا درست سلہہ بند موٹر سائیکل آ مروک تا سم کاری آن اسہ بندغ ئس کسک ۔

پن کروک بندغ نا چاہنداری سندھ نا ہندی شمن علی نا پن آن مسونے ۔

پولیس جون ءِ ارفیسہ اسپتال آ درے گیشتر سرو سوج بناء کرینو ۔

بلوچستان نا علاقہ تربت و گوادر آن پاکستانی فورسز 5 بندغ ءِ دزگیر کریسہ بیگواہ کرینو ۔ اندن اندافتیٹ اسٹ اوکان گڈ آجو مس ۔ و چار دائسکان بیگواہ ءُ ۔

زوراکی ئٹ بیگواہی تا گواچی مروک تا چاہنداری داد شاہ ولد ناصر، عرفان ولد شیر محمد، زمان ولد سپاھان، عبدالحسین رحمت، و الطاف بہرام نا پن آن مسونو ۔

زوراکی ئٹ بیگواہ کروک آتا بابت ئٹ پاننگیک کہ 16 دسمبر 2024 آ پاکستانی فورسز تربت آن زمان صفیان ، عبدالحسین رحمت و الطاف بہرام ءِ دزگیر کریر ، اوکان گڈ الطاف بہرام ءِ یلہ کننگا ولے زمان صفیان و عبدالحسین رحمت ہڑتمکاک دائسکان بیگواہ ءُ ۔

گیشتر بیگواہ کروک آتیٹ زمان ولد سپاھان ہرا کہ کیچ نا علاقہ بالگتر نا ہندی ئسے ، دا اولیکو وار اف کہ زمان ءِ زوراکی ئٹ بیگواہ کرینو بلکن داکان مالو ہم زمان بلوچ و اونا ایلم ماجد بلوچ ءِ 9 2020 آ زوراکی ئٹ بیگواہ کریر ہرادے شش تُو بھاز بےدادی نا گواچی کننگ آن گڈ یلہ کریر داکان بیدس اودے 10 فروری 2022 آ ہم تربت بازار آن زوراکی ئٹ بیگواہ کریر ۔ داسا مسٹمیکو وار پدا دزگیر کرینو ۔

حوال تا رد ئٹ کیچ ئنا علاقہ تمپ سرینکن تگران آباد نا ہند ئٹی زبیدہ جلال روڈ آ اِرا ایل پی جی ٹرالر گاڑی ءِ نادرست آ بندغ آک سم کاری کرسہ سخت نسخان تسنو۔

یات مرے کہ دا علاقہ ٹی داکان مُست ہم مڈی دروکا اُلاخ آتِہ آجوئی خواہوک سلہہ بند تنظیم آک ٹک کرینو۔

دا جلہو نا ذمہ واری ءِ دائسکان ہچو تنظیم ئس ہرفتنے۔

کیچ ئنا علاقہ کولواہ، رودکان ئٹ شکار کن بروکا عرب آتے رکھ تروک پاکستانی لشکر نا قافلہ غا سلہہ بند بندغ آک جلہو کرینو۔

جلہو ئٹ اسہ بندغ ئسے نا ٹپی مننگ نا احوال ءِ۔

واہم کالخواہ تا پارہ غان جلہو و جانی نسخان نا پک داسکان متنے۔

پاکستان نا اوغانستان تون گنڈوک قبائلی ضلع جاندمی وزیرستان ئٹ پاکستانی لشکر نا پوسٹ ئسے آ جلہو ئٹ ود و کم 16 کارندہ مرگ ئنا گواچی و ہشت ٹپی مسنو۔

پاکستان فوج نا شعبہ تعلقات عامہ آئی ایس پی آر دائسکان دا تدینی آ ہچو بیان ئس شینک کتنے۔ ولے ضلعی بست و بند، پولیس و ایلو ادارہ غاک جاندمی وزیرستان ئٹ ڈیوٹی کروک اوغدہ دار آک تدینی ءِ پک کرینو۔

بست و بند نا اوغدہ دار آتا پاننگے کہ سلہہ بند بندغ آک فورسز نا سیم سری پوسٹ لتا سر ئٹ جمعہ و ہفتہ نا اُرے ننکان جلہو کریر وختس کہ جلہو ئٹ پوسکنا و بھلا سلہہ تے کارمرز کریر۔

پوسٹ آ جلہو ئٹ مرگ ئنا گواچی مروکا تا جون و ٹپی تے خڑک ئنا اسپتال آ سر کننگانے۔

بلوچ وومن فارم نا سروکی ٹی بانک کریمہ بلوچ نا چارمیکو سال دے اڈ تننگا۔ دا مجلس ئٹ زالبول باسک آتیتون اوار زند ئنا جتا تپہ تیان تعلق تخوک بندغ آک بھلو کچ اسیٹی اوار مسر۔

تران کروک آک بانک کریمہ بلوچ نا زند، اونا تعلیم، جہد و قربانی تے درشان کریسہ اونا کڑد ءِ دروت ندر کریر۔

تران کروک آک پاریر کہ شہید کریمہ بلوچ، ہرا بی ایس او آزاد نا اولیکو زالبول سروک مسنے، او تینا جہد ئنا ذریعت ئٹ بلوچ زالبول ءِ بش کرے و بندغی حق آتیکن بھاز خواری کرے۔

مجلس ئٹ تران کروک آک پاریر کہ شہید کریمہ بلوچ نا جہد نہ بیرہ بلوچستان بلکن تیوہ جہان ئٹ مظلوم آ الس کن کسر شونی ئسے۔ اونا قربانیک ننے حق آتیکن جہد ئنا اہمیت نا تعلیم ایترہ۔

یاتی مرے بانک کریمہ بلوچ 2016 ٹی کینیڈا غا ہناسس، ہراڑے جلاوطنی نا وخت آ بندغی حق آتیکن کاریم کرے۔ 2020 ئٹ اونا ناگمان آ مرگ بندغی حق آتا کڑدہ تیٹ اسہ بھلو شرہ اس ودی کرے۔

مجلس نا ایسر ئٹ اوار مروک بندغ آک شہید کریمہ بلوچ نا جہد ءِ برجاء تخنگ نا درشانی کریر۔

دے کہی بلوچستان نا علاقہ راسک ئٹ اُرا ٹی بمب تراک آن زالبول تون اوار مُسہ بندغ کسکر و اسٹ اس ٹپی مس۔

راسک نا علاقہ مرتان ئٹ اُرا ٹی بمب تراک ئٹ سہیلہ آسکانی، زباد آسکانی، عماد الدین و و اوفتا باوہ مراد احمد کسکر۔

حوال تا ردئٹ بمب فوجی خبڑداری آن پد علاقہ ئٹ تما و اودے اسہ اُرا اسیٹی دننگا ہراڑے او ترخا۔

اندا سال اندا ڈول نا اسہ بمب تراک اسیٹی ہرمند ئٹ امین اللہ سالارزئی کسکوسس۔