اواری تون رکھ – ٹی بی پی سرگپ
پاکستان نا بنجائی اسمبلی نا قائمہ کمیٹی برائے منصوبہ بندی نا مجلس ئٹ چینی شاری تا رکھ اکن اہم گامگیج و رپورٹس آک مونا ہتنگار و مجلس ئٹ چین و پاکستان نا اوار انگا سکیورٹی کمپنی نا جوڑ کننگ نا سَلاہ غا پام کننگا۔
چین پاکستان اقتصادی راہداری نا ڈٹ بندی تیا اِرا ہزار ہفت سد چینی شاریک کاریم کننگ ءُ، ہرافتا رکھ اکن پاکستانی لشکر نا خاص سکیورٹی ڈویژن و اسپیشل سکیورٹی یونٹ آک سلیفنگانو۔ چین پاکستان اقتصادی راہداری و چین نا ایلو ڈٹ بندی تیتون تفوک انجینئرز و سرمایہ کار آتیا چار سال ئٹی بلوچ لبریشن آرمی و ایلو سلہہ بند تنظیم آتا چانڑدہ جلہو ئٹ بیست چینی شاری مرگ ئنا گواچی و سی و چار ٹپی مسنو۔
چین نا انجینئر و سرمایہ کار آتیا بھیم بش کروک جلہو تا توننگ کن پاکستانی لشکر سالانہ ہزار آ انٹیلیجنس بنداؤ آ لشکر کشی تے کننگ ءِ، بیرہ سال اِرا ہزار بیست و چار نا یانزدہ توہ ئٹی ہفت ہزار نو سد و ہشتاد و چار انٹیلیجنس بنداؤ آ لشکر کشیک کننگار، ہرافتیٹ دو سد و شش بندغ کسفنگار و اسہ ہزار سئے سد و دوانزدہ بندغ زوراکی ئٹ بیگواہ و دزگیر کننگار۔
بلوچستان ئٹ چین پاکستان اقتصادی راہداری و سیندک نا ڈٹ آ بھاز نغدکاری مننگسہ کرے کہ دا لُٹ و پل کروک ڈٹ بندی ئسے۔ دا ڈٹ آتے بلوچ مڈی تا لٹ و پل ئتون تشبیہ تننگک، ہرانا سوب آن چین نا برخلاف بلوچستان ئٹ سیاسی دروشم ئٹ سخت ءُ ہیت کاریم ئٹ ہتنگک، و بلوچستان نا آجوئی نا جہد ئتون تفوک سلہہ بند تنظیم آک چین نا ڈٹ بندی و سرمایہ کار آتیا بھلو جلہو کننگ ءُ۔
دا ڈٹ بندی تا سکیورٹی آ بھلو کچ اسیٹی خرچہ مننگ ءِ، ہرانا سوب آن ڈٹ ئنا خڑچ ئٹ ودکی مسنے ہرا چین نا کمیونسٹ حکومت کن فریشانی نا ہیت ئسے و ایلو پارہ غا چین نا شاری تیا مرگ ئنا گواچی کروک جلہوک ہم چرجوئی ئٹ مننگ ءُ۔ چین و پاکستان نا اوار انگا سکیورٹی ڈٹ بندی آن لاگت گیشتر ودنگ تون اوار اوفتیا مرگ ئنا گواچی کروک جلہو تیٹ ہم ودکی مرو انتئے کہ استحصالی پن کروک ڈٹ بندی تے بند کپننگ آ بلوچ سلہہ بند تنظیم آتا چین نا مفاد آتیا بروک وخت ئٹ ترند جلہو تا خُلیس ساڑی مرو۔
