بولان میڈیکل کالج (بی ایم سی) نا بند مننگ و ہاسٹل آتیا پولیس کوزہ نا برخلاف بلوچستان نا خوانندہ تنظیم آک کالج نا بنجاہی در ئنا مونا اسہ برانزی کیمپ ئسے نا بنا ءِ کرینو۔

خوانندہ تا پاننگ ءِ کہ دا برانزی کیمپ کالج و ہاسٹل آتا دوارہ بحالی اسکان برجاء مرو۔

خوانندہ تا سیوت نا پارہ غان اڈ تروک دا برانز ئٹ بھلو کچ اسیٹی خوانندہ غاک اوار ءُ، ہرافک خوانندہ تیا پولیس نا بیدادی و تعلیمی کاریم تا بند مننگ آ نغد کریر۔

خوانندہ راہشونک پاریر کہ پولیس بیدس سوب آن ہاسٹل آ جلہو کرے، خوانندہ تے دزگیر کرے و تعلیمی ماحول ءِ خراب کننگ نا کوشست کرے۔

برانزی کیمپ نا خواست آتیٹ دزگیر کننگوک خوانندہ تے دمدستی یلہ کننگ، کالج و ہاسٹل آتے دوارہ ملنگ، تدینی ٹی اوار مروک پولیس و بست و بند نا برخلاف کارروائی اوار ءِ۔

خوانندہ تنظیم آک پولیس کارروائی ءِ بلوچ و پشتون خوانندہ تا نیام ئٹ اختلاف ودی کننگ نا چم اس گوندار و پاریر کہ دا عمل تعلیمی ادارہ تے عسکری مسخت آتیکن کاریم ئٹ ہتنگ نا کوشست ئسے۔ خوانندہ راہشون تا پاننگ ئس کہ ”نن تعلیمی ادارہ تے امن و ایمنی نا بنجاہ خننگ خوائنہ نئے کہ پولیس کارروائی نا میدان۔“

یاتی مرے کہ تدوکا دے تیٹ بی ایم سی ہاسٹل آ پولیس نا جلہو نا وخت خوانندہ تے دزگیر کننگاسس و کیہی خوانندہ غاک ٹپی یا بے ہوش مسوسر۔

خوانندہ تنظیم آک خبڑدار کرینو کہ اگہ اوفتا خواست آتے پورہ کننگتو گڑا برانز شابیت کننگو و تیوہ غا بلوچستان ئٹ برانز کننگو۔

بلوچستان نا ضلع تربت ٹی درے استو ٹپی مروک بندغ ءِ فورسز کارندہ آک دزگیر کننگ نا وخت کسفیر۔

شابیت حوال تا ردئٹ استو تربت ٹی پاکستانی فورسز سم کاری کریسہ اسرار پنی ورنا ئسے ٹپی کرے ہرادے ٹپی مروک حالیت ٹی فورسز کارندہ غاک اسپتال آ دریر ۔

اسپتال ذرائع نا ردئٹ ہراتم ورنا ءِ اسپتال آ ہتنگا او وخت او خلیس نا حالیت آن پیشن ئس ہرادے فورسز اوکان گڈ تینتون اوار درے ۔

خاہوتی ذرائع نا پاننگ ءِ کہ نن نیمہ غا ننے پولیس فون کریسہ پارے کہ نما اسہ جون ئس اسپتال ٹی تخوک ءِ ۔

دا وخت اسکان فورسز کارندہ غاک جون ءِ خاہوت نا حوالہ کتنو اندن اوفتیا زور شاغنگ ءُ کہ او اسہ فارم ئسے آ دستخط کیر ۔

سیاسی حلقہ غاتا ردئٹ ورنا ءِ دزگیر کننگ نا وخت کسفنگا و داسا خلیس پاش مننگ ءِ کہ فورسز خاہوت آ زور شاغیسہ دا منفنگ خواہک کہ او منیر ورنا مونتس ئٹ کسفنگانے ۔

بلوچستان نا ضلع قلات ئٹ پاکستانی فورسز آک لشکر کشی ٹی اختہ ءُ، فورسز آتا دو آن چِل ئنا کچ بندغ تا زوراکی ئٹ بیگواہی نا حوال آک رسینگانو۔

ٹی بی پی ءِ رسینگوک حوال تا ردئٹ قلات شار، اسکلکو، یوسفی و ہربوئی نا علاقہ تیان چِل ئنا کچ بندغ تے زوراکی ئٹ بیگواہ کننگانے۔

حوالکار تا ردئٹ ہربوئی نا ہندی ہشت بندغ ءِ پاکستانی لشکر ہمو وخت دزگیر کریسہ نادرست ہند آ درے ہراتم او قلات شار آن بریسہ تینا اُرا تیا ہِننگ ئسر۔

اندن اسکلکو و یوسفی آن بھلو کچ اسیٹی بندغ تے زوراکی ئٹ بیگواہ کننگانے۔

علاقہ ئٹ لشکر کشی و حوالکاری نظام نا بند مننگ نا سوب بیگواہ بندغ تا بابت شابیتی حوال رسینگتنے۔

کوالخواک دائسکان دا بابت ہچو ہیت اس مونا ہتنو۔

نظم

نا ہجر ئٹی سنگت

نوشت: عتیق مزار

نی پاریسہ ای نیتوان اُٹ
ہمو وخت اسکہ کنا جون پالوانے
نی پاریسہ گواڑخ آک بائے ملور
ای و نی چلتن نا سیخا ٹی
اسٹُو خیری اسیٹی مچا دے ءِ تیر کرون
کرون کچاری مجلس
نی مخیسہ کنتون دو لخی مروس
دستی ئس گواڑخ آتا نیکن ای بنوٹ
اسٹ اسٹ آ نا ارمان تا درمان مروٹ
مروٹ اوڑدئی نیتون
دولخی ٹی ساعت ئس مخون ساعت ئس ہوغسہ ہنوک آ وخت ءِ یات کرون

ولے نی افیس

کنا سمبل
ہتم نا مد بس
راسکوہ ہم خرن مس
گواڑک آک بائے ملار
اپڑس پھل شنکی کیک
نرومب ہم شاد مس
انجیر ہم پھل کرے
ہولی ہم آھگور کیک

ولے نی افیس

اسٹُو خیری اسیٹی تینا وجود ءِ کورانٹ
نا گند ئکن سکِوہ ای
پوغ آتے ای شنسہ
گڈیکو ساعت نا یات ئٹ
نا ہجر ئٹی سنگت
ملی ءِ جوغن ئٹ کُٹوہ
رغتے کشکِسہ اف ساہ نا بکار

دڑد آک خازہ مرسہ ءُ
ٹپ آتے ای شُرسہ اُٹ
دستی ئس گواڑخ نا نیکن ای بنانٹ

ولے نی افیس سنگت، ولے نی افیس۔۔۔

بلوچ یکجہتی کمیٹی نا سروکی ٹی شہید بالاچ مولا بخش نا سال دے آ سیمینار اس اڈ تننگا۔

بلوچ یکجہتی کمیٹی نا سروکی ٹی شہید بالاچ مولا بخش نا اولیکو سال دے آ اسہ سیمینار اس  شہید فدا چوک آ اڈ تننگا، ہراٹی جتا تپہ تا بندغ آک، وکیل آک، و مخلوق نا بھلو کچ اس اوار مس۔ تربت سیمینار ئٹ کوئٹہ تون اوار بلوچستان نا ایلو علاقہ تیان بلوچ یکجہتی کمیٹی نا راہشونک، وکیل، سیاسی راہشون و باسک آک اوار مسر۔

دا وخت آ سیمینار ئٹ تران کریسہ بلوچ یکجہتی کمیٹی نا بنجاہی آرگنائزر ڈاکٹر ماہ رنگ بلوچ پارے کہ ریاست بلوچ الس نا مڈی تا لٹ و پل و زنک ایسری نا پالیسی تیا کاریم کننگ ءِ، او پارے کہ تدوکا اِرا دہک آتیان بلوچستان ئٹ ہڑدے جونک خسنگسہ ءُ۔

ڈاکٹر ماہ رنگ بلوچ پارے کہ شہید بالاچ نا جون ءِ بے وارث تکسہ خسنگاسس، ولے اونا خاہوت چُپ مننگ نا جاگہ غا برانز نا کسر ءِ ہلک 23 نومبر آن 6 دسمبر 2023 اسکان تربت ئٹ جون ئتون اوار تولوک برانز کننگا، ہراڑان پد نن تربت آن اسلام آباد اسکان لانگ مارچ کرین۔

او پارے کہ ریاستی ظلم آتیان پد ہم بلوچ الس ءِ تینا جہد ءِ برجاء تخوئی مرو تدوکا اسہ سال اسیٹی 200 آن زیات ورنا بیگواہ کننگانو، اندن ہر بلوچ اُرا دڑد ئنا گواچی مسنے۔

سیمینار ئٹ مکران ہائی کورٹ نا صدر محراب خان گچکی ایڈووکیٹ پارے کہ بندغ آتے زوراکی ئٹ بیگواہ کننگ اسہ بھلو ڈوہ ئسے، ہرا نہ بیرہ ملکی راہبند بلکن جہانی قانود آتا ہم برخلافی ءِ۔

او پارے کہ ہنوکا وخت ئٹی بنگال ئٹ دا آزموندہ نا بھس کروک نتیجہ پیشتمار، و داسہ اندا آزموندہ بلوچستان ئٹ مننگسہ ءِ۔

کیچ بار نا صدر عبدالمجید شاہ ایڈووکیٹ ریاست نا برجاء لشکر کشی تیا نغد کریسہ پارے کہ 70 سال آن کننگوک اسہ ہم لشکر کشی اس جوانی ہتنے، بلکن حالیت آک گیشتر خراب مسنو۔

بلوچ یکجہتی کمیٹی نا راہشون صبغت اللہ شاہ جی پارے کہ شہید بالاچ نا شہیدی ننا جہد ءِ پوسکنو تحریک اس تسنے۔ او مخلوق آن سیوتی ءِ برجاء تخنگ و ریاستی چم آتے بے سہب کننگ نا خواست کرے۔

دا وخت آ عبدالمجید دشتی ایڈووکیٹ پارے کہ بلوچ یکجہتی کمیٹی ءِ نہ بیرہ ہندی بلکن جہانی تلہ غا بلوچ ویل آتے درشان کننگ نا گرج ءِ۔ او سَلاہ تس کہ اسہ اندنو ٹیم اس جوڑ کننگ مرے ہرا جہانی عدالت انصاف ئٹ بلوچ آتا مقدمہ تے چلفنگ کے۔

سیمینار ئٹ شہید بالاچ نا ایلم یونس بلوچ و مجیب رحیم شعر تا ذریعت ئٹ شہید آتے دروت ندر کریر۔ تران کروک آک عہد کریر کہ بلوچ الس نا حق و انصاف نا جہد برجاء تخنگو۔

تران کروک آک ایسر ئٹ پاریر کہ سیمینار دا ہیت ئنا درشانی ءِ کہ شہید بالاچ مولا بخش نا قربانی بلوچ الس نا اُست آتیٹ جہد ئنا پوسکنو جوزہ اس ودی کرینے، ہرا ظلم آتا برخلاف اسہ سوگو و ہمکوپہ ءُ السی تحریک ئسے نا سوب جوڑ مننگ ءِ۔

آواران بست و بند معاملہ تے ایسر کننگ نا جاگہ غا ننے بھیم ئنا گواچی کننگ ءِ۔ خاہوت نا شکائست

آواران آن پاکستانی لشکر نا دو آن زوراکی ئٹ بیگواہی نا گواچی دلجان بلوچ نا آجوئی کن تولوک برانز اینو ہفتمیکو دے ہم برجاء ءِ، دا تولوک برانز 18 نومبر آ بناء مسوسس و دائسکان برجاء ءِ۔

برانز کروک و بست و بند نا نیام کیہی گپ و ترانک بے سہب مسنو، برانزیک تولوک برانز ءِ برجاء تخنگ نا پڑو کرینو۔

برانزی تا پاننگ ءِ کہ تولوک برانز نا سوب آواران ئٹ تیوہ کرفیو خلنگانے، و اوفتے دیر و خوراک آن پدماندہ کننگسہ ءُ۔ خُلیس ءِ کہ بست و بند وار وار نیٹ ورک ءِ بند کریسہ تولوک برانز ءِ بے سہب کننگ نا کوشست کننگ ءِ۔

استو فورسز آک تولوک برانز ءِ تیوہ غا گھیڑ کریر و برانزی تے تڑی تسر کہ اگہ تولوک برانز ایسر کننگتو گڑا اوفتیا لٹ و کٹ کننگو۔ برانزی تا دا ہم پاننگ ءِ کہ اوفتا شناختی کارڈ و موبائل فون تے پُلنگ نا کوشست کننگا، اندن برانز کروک آتے ہچ وڑ ئنا رکھ فراوان کننگ افس۔

یاتی مرے کہ آواران نا تہہ و پیشن نا کسرک تدوکا شش دے آن جتا ہند آتیان بند ءُ۔ تولوک برانز کروک آتا پاننگ ءِ کہ دا برانز دلجان نا آجوئی اسکان برجاء مرو و کسرک بند مرور۔

برانز ئٹ زالبول، چنا و پیر انگاک ہم اوار ءُ۔ برانزیک پاش کرینو کہ آنسو گیس کاریم ئٹ ہتنگہ، لٹ و کٹ کننگہ یا گولہ باری کننگہ ولے دا برانز دلجان بلوچ نا آجوئی اسکان ایسر مفرو۔

برانز کروک آک وکیل، خوانندہ گل و بندغی حق آتا گل آتیان خواست کرینو کہ اوفک دلجان بلوچ نا حق ئٹ توار بڑز کیر و برانزی تا رکھ اکن گام ارفر۔ اوفتا پاننگ ءِ کہ اوفتا اسٹ انگا خواست اسہ بے گناہ ئسے نا آجوئی ءِ۔

پاکستان ئٹ پولیو نا کیس تیٹ گیشتر ودکی مسنے۔ اینو بلوچستان آن اِرا پوسکنو کیس و خیبر پختونخوا غان اسہ پوسکنو کیس ئسے مونا بننگ آن پد برجاء سال پاکستان ئٹ پولیو کیس تا جمعی کچ 55 مسنے۔

بلوچستان ئٹ پولیو کیس تا کچ 26 اندن خیبر پختونخوا ٹی 24 مسنے۔

بلوچستان ئٹ محکمہ جانجوڑی نا ردئٹ، پوسکنا کیسز آک جعفر آباد و ژوب نا ضلع تیان رپورٹ مسنو۔ دا کیسز آک اندنو وخت ئسے آ مونا بسنو ہراتم پولیو نا ایسری کن ایمرجنسی ٹہفنگانے، ولے داڑان بیدس کیس تا کچ ئٹی چرجوئی ئٹ ودکی خننگ ئٹ بسنے، ہرا پولیو ایسری نا مہم نا بے سہبی ءِ پاش کیک۔

چاہندار تا ردئٹ بلوچستان ئٹ پولیو نا کیس تیٹ ودکی نا اہم سوب آتیٹ بیکار ڈٹ بندی، بے زیم حوالکاریک، و صوبہ ئٹ خراب امن و ایمنی نا حالیت آک اوار ءُ۔

یونیسیف، جہانی جانجوڑی نا ادارہ (ڈبلیو ایچ او)، و صوبائی محکمہ جانجوڑی آ دا نغد مننگسہ ءِ کہ بھلا مالی وسائل آتیان پد ہم اوفک دا ناجوڑی نا تالانی ءِ توننگ ئٹ بے سہب مسنو۔

محکمہ جانجوڑی نا کوالخواک پولیو ایسری نا مہم ءِ پوسکن شون تننگ و ویکسین آن نمن و سر مننگ ئٹ ہڑاند کون آ ویل آتے دمدستی ایسر کننگ آ زور تسنو تاکہ ڈیہہ ئٹ نزور آ چناک دا گندہ غا ناجوڑی آن رکھنگ مننگ کیر۔

یاتی مرے بلوچستان ئٹ پولیو نا ودوکا کیسز آک و جعلی ویکسینیشن رپورٹنگ نا معاملہ غاک وختی آن پولیو ایسری نا مہم نا شفافیت آ سوالیہ نشان خلکنو۔

نوشکے ٹی لشکر کشی نا وخت آ پاکستانی لشکر ہشت بندغ ءِ زوراکی ئٹ بیگواہ کرینے۔

تدوکا دے تیٹ بلوچستان نا ضلع نوشکے نا مَشی آ لڑ تیٹ پاکستانی لشکر مُسہ دے اسکان لشکر کشی ٹی اختہ مس۔ لشکر کشی ٹی گن شپ و ایلو ہیلی کاپٹر آک بشخ ہلکر۔ دا وخت آ جتا ہند آتیا کارندہ غاک ہم دڑفنگار۔

حوال تا ردئٹ لشکر کشی نا وخت آ فورسز آک ہشت بندغ ءِ زوراکی ئٹ بیگواہ کرینو ہرافتیٹ ملا نذیر سمالانی، فقیر محمد سمالانی، جان محمد سمالانی، جان محمد سمالانی نا مار ظفراللہ، محمد وارث سمالانی و سید خان ساسولی نا مار ہاشم اوار ءُ اندن اِرا راہگیر تے ہم زوراکی ئٹ بیگواہ کننگا ہرافتا چاہنداری مننگ کتنے۔

خیال ئٹ مرے لشکر کشی نا وخت آ فوجی کارندہ تا پارہ غان ہندی بندغ تا اُرا تے ہُشنگ تون اوار آباتی آ مارٹر گولہ خلنگ نا حوال آک ہم رسینگاسر۔

لشکر کشی ٹی اختہ کارندہ تے پنچ شمبے نا نن بلوچ لبریشن آرمی اسہ جلہو اسیٹی ٹک کرے۔ جلہو نا ذمہ واری ءِ ارفسہ ترجمان جیئند بلوچ پارے کہ سرمچار آک بھلا سلہہ تیٹ جلہو کریسہ دژمن آ گرنیڈ لانچر نا کیہی گولہ خلکر، جلہو ئٹ اِرا دژمن کارندہ ہند آ مرگ ئنا گواچی و کم آن کم چار ٹپی مسر۔

کوالخواک مُسہ دے اسکان برجاء مروک لشکر کشی نا بابت دائسکان ہچو شابیتی حوال فراوان کتنو۔

حکومت بلوچستان امن و ایمنی نا حالیت نا سوب آن تیوہ بلوچستان ئٹی دفعہ 144 خلکنے۔

محکمہ داخلہ بلوچستان نا کنڈ آن شنگ کروک نوٹی فکیشن نا رد ئٹ پیشن سلہہ دروک ہنوک و 5 آن زیات بندغ آتا مچی آ تیوہ رکھ خلنگانے۔

نوٹی فکیشن ئٹی پاننگانے کہ دفعہ 144 خلنگ نا وختا ہر وڑ ئنا بے قانودی مچی و سلہہ کاریم ئٹ ہتنگ آ سختی ئٹ کاروائی کننگو۔

خیال ئٹ مرے کہ آواران ئٹی زوراکی ئٹ بیگواہ کننگوک دلجان بلوچ نا وے آجو مننگ نا برخلاف تولوک برانز برجاء ءِ و کوئٹہ ئٹی سرینہ چوک آ بیگواہ کننگوک خوانندہ محمد مصور نا آجوئی کن تولوک برانز تدوکا نُہہ دے آن برجاء ءِ۔

داکان بیدس 25 نومبر آ آل پارٹیز تیوہ بلوچستان ئٹی پہیہ جام ہڑتال نا پڑو ہم کرینو۔