کوئٹہ غان پاکستانی لشکر اسہ ورنا خوانندہ ئسے زوراکی ئٹ بیگواہ کرے۔

استو 12 بجہ نا وخت آ بلوچستان نا بنجاہی شار کوئٹہ نا اے ون سٹی آن پاکستانی لشکر، سی ٹی ڈی و پولیس کارندہ غاک بہزاد دلاوری پنی ءُ ورنا ئسے زوراکی ئٹ بیگواہ کریر۔

برکت دلاوری نا مار بہزاد دلاوری نا تعلق پنجگور نا علاقہ خدابادان آن ءِ۔

بہزاد ءِ داڑان مالو 30 نومبر 2021 آ پنجگور آن زوراکی ئٹ بیگواہ کننگاسس ہرادے پدان یلہ کننگا۔

حوالکار تا ردئٹ پن کروک ورنا پبلک سروس کمیشن نا تیاری تیٹ اختہ ئس۔ کوالخواک دائسکان دا بابت ہچو شابیتی حوال فراوان کتنو۔

بلوچستان ئٹ زوراکی نا بیگواہی تا تدینیک ہڑدیئی بنداو آ رپورٹ مریسہ ءُ۔ زوراکی ئٹ بیگواہ کننگوک بندغ آتیٹ بھازی خوانندہ غاک ءُ۔

زوراکی ئٹ بیگواہ دلجان بلوچ نا آجوئی کن آواران ئٹ ڈی سی آفس نا مونا تولوک برانز اینو چارمیکو دے ہم برجاء ءِ، برانز کروک آک آواران بیلہ کسر ءِ جتا ہند آتیا تیوہ ہن و بر اکن بند کرینو۔

دا وخت آ دلجان بلوچ نا خاہوت نا پاننگ ءِ کہ اوفتا خواست آتیا ہچو جوان ءُ پیش رفت مننگ اف، و کوالخواہ تا پارہ غان گپ و تران کن اسہ جوان ءُ گام اس خننگپک۔

برانز کروک آک پارینو کہ دلجان بلوچ نا آجوئی اسکان تولوک برانز ایسر مفرو۔

واہم، برانزی تا ردئٹ، درو اسہ گپ و تران کروک ٹولی اس اوفتیتون اوڑدہی کن بسنے ہرافتیتون ہیت و گپ برجاء ءِ۔ گپ و تران کروک ٹولی ئٹ میونسپل کمیٹی آواران نا چیئرمین عابد حسین، وائس چیئرمین میر حبیب اللہ محمد حسنی، میر ہاشم، میر محمد یعقوب، نیشنل پارٹی تحصیل آواران نا صدر شمیم نصرت، قادر بخش، و بی ایس او پجار نا بنجاہی کمیٹی نا باسک شفیق مہر اوار ءُ۔

برانزیک گپ و تران نا عمل ئٹ پیش رفت نا امیت پاش کرینو ولے تینا ہیت آ سلسہ پارینو کہ ہراتم اسکان دلجان بلوچ یلہ کننگتنے، تولوک برانز برجاء مرو۔

خاہوت و برانز کروک آک پارینو کہ اوفتیتون مروک زیاتی تے ایسر کننگ و زوراکی ئٹ بیگواہ بندغ تا یلہ کننگ اوفتا بنداوی حق ءِ۔ اوفک مخلوق آن خواست کرینو کہ او اوفتا برانز ئٹ اوار مریسہ ہمکوپئی نا درشانی کیر۔

بلوچستان ئٹ زوراکی نا بیگواہی تا لڑ برجاء ءِ، جتا علاقہ تیان پین پنچ بندغ نا زوراکی ئٹ بیگواہی نا حوال آک رسینگانو۔

بلوچ نینشل موومنٹ نا بندغی حق آتا ادارہ پانک نا ردئٹ، برجاء توہ ئٹ بلوچستان نا ضلع کیچ ئنا علاقہ دشت کڈھان ئٹ اِرا بندغ ءِ جتا وخت آتیٹ زوراکی ئٹ بیگواہ کننگا۔ 10 نومبر آ محمد ابراہیم نا مار امیر بلوچ ءِ زوراکی ئٹ بیگواہ کننگا، اندن 11 نومبر آ مزور حکیم بلوچ زوراکی ئٹ بیگواہی نا گواچی کننگانے۔

پانک نا ردئٹ، برجاء توہ ئٹ کیچ آن پین مُسہ بندغ نا زوراکی ئٹ بیگواہی نا حوال آک رسینگانو۔ 11 نومبر آ لیاقت نا مار سلمان بلوچ ءِ برمتہ کننگا، 19 نومبر آ محمود نا مار علی آغا ءِ گمانی برمتہ کننگا، اندن مجیب نا مار حبیب ہم زوراکی ئٹ بیگواہی نا گواچی کننگانے۔

پانک نا ردئٹ، دا تدینیک بلوچستان ئٹ بندغی حق آتا لتاڑنگ نا چرجوئی ءُ، و خاہوت آتیتون اوار بندغی حق آتا باسک آک پاکستانی لشکر و اوفتا مُخ تف ڈیتھ اسکواڈ آتیا لس شاری و باسک آتے زوراکی ئٹ بیگواہ کننگ نا دوبہ خلیرہ۔

رپورٹ آتا ردئٹ، برجاء توہ زوراکی نا بیگواہی تیٹ اسہ وڑ ودکی مننگ ءِ، ہراڑے 35 آن زیات بندغ بلوچستان نا جتا ضلع تیان زوراکی ئٹ بیگواہ کننگانو۔

پانک رپورٹ نا ردئٹ، تدوکا توہ بلوچستان تون اوار کراچی و پاکستان نا ایلو شار تیٹ 110 آن زیات زوراکی نا بیگواہی تا تدینیک رپورٹ مسر، ہرافتیٹی بلوچستان نا جتا ضلع تیان شش بیدس عدالت خون ہم اوار ئسر۔

بلوچستان ئٹ زوراکی نا بیگواہی تیا کاریم کروک تنظیم آک، دنکہ بلوچ یکجہتی کمیٹی و وائس فار بلوچ مسنگ پرسنز، دا کچ و حساب ءِ پک کیرہ۔ دا تنظیم آک جہانی برادری آن خواست کرینو کہ اوفک اوار مریر و بلوچستان ئٹ بندغی حق آتا لتاڑنگوک حالیت ءِ توننگ ئٹ کمک فراوان کیر۔

بلوچستان نا ضلع مستونگ ئٹ پاکستانی لشکر نا قافلہ غا جلہو، مُسہ کارندہ مرگ ئنا گواچی، جلہو نا ذمہ واری ءِ بی ایل اے ارفے۔

شابیتی حوال تا ردئٹ مستونگ نا علاقہ اسپلنجی ٹی سلہہ بند بندغ آک پاکستانی لشکر نا قافلہ ٹی اوار گاڑی تیا بمب جلہو آن پد راکٹ و ایلو سلہہ تیٹ جلہو کریر۔

ہندی حوالکار تا ردئٹ تراک آن پد ترند سم کاری و گیشتر تراک آتا توار بِننگا۔

حوالکار تا پاننگ ءِ کہ جلہو ئٹ فورسز آتے نسخان تیتون مون تروئی تمانے واہم کوالخواک دائسکان ہچو ہیت اس مونا ہتنو۔

اندن پن کروک جلہو نا ذمہ واری ءِ آجوئی دوست سلہہ بند تنظیم بلوچ لبریشن آرمی ارفینے۔

بی ایل اے نا ترجمان جیئند بلوچ تینا بیان ئٹ پارینے کہ سرمچار آک مستونگ ئٹ اسہ جلہو اسیٹی کوزہ گیر پاکستانی لشکر نا مُسہ کارندہ ءِ مرگ ئنا گواچی و پنچ ٹپی کریر۔

ترجمان پارے کہ سرمچار آک اسپلنجی ٹی پاکستانی لشکر نا گاڑی تا اسہ قافلہ ئسے ریموٹ کنٹرولڈ آئی ای ڈی جلہو ئٹ ٹک کننگ آن پد راکٹ و ایلو بھلا سلہہ تیٹ ٹک کریر۔

او پارے کہ دژمن لشکر نا بکتر بند ئتون اوار مُسہ گاڑی جلہو نا دک ئٹ بسر، ہرانا سوب کم آن کم مُسہ دژمن کارندہ مرگ ئنا گواچی و پنچ ٹپی مسر۔

ترجمان پارے کہ بلوچ لبریشن آرمی دا جلہو نا ذمہ واری ءِ ارفک۔

کنا توفک

نوشت: سنگت شاہموز بلوچ

دی بلوچستان پوسٹ

نن تا چُپی ٹی وختس کہ تیوہ جہان تغ نا پلویڑ ئٹ مریک گھاٹ آ تولوک ای و کنا توفک سما اُن۔ او کنا کوپہ ٹی اسے وفادار ءُ سنگت ئسے نا وڑ ٹنگوک مریک۔ کنا دُو تا باسنی ہرساعت اودے زند بشخسا کیک۔ و اونا آہن نا پدینی کنا جوزہ آتے پین سوگوْ کیک۔

دا اسے لس توفک اس اف ہرا اسے اُرا ئسے نا کنڈا اسیٹی جھوک تروک مریک بلکن دا کنا شعور نا سنگت ءِ۔ دا کنا قصہ آتا مصنف ءِ۔ دا کنا آزاتی نا ضامن ءِ۔ دا و نا کنا بھاز زیبا ءُ سنگتی ئسے ولے دا سنگتی اسے شونق یا ایڈینچر نا بشخ افس۔ دا نا بڈ کننگ نا سوب دا اف کہ کسے خولیفوہ یا دا نا طاغت اٹ اسے لس بندغ ئسے آ بھیم شاغیوہ بلکن دا توفک ءِ ہرفنگ نا سوب کنا راجی غلامی ءِ۔

ہراتم اولی وار دا توفک ءِ ہرفیٹ بھاز کڑمب ءُ خیال اسیٹی ہناٹ کہ دا دے ہرفنگ اُٹ دانا حق ءِ ہم پورہ کننگ کروٹ! دا کنے اولی نظر ٹی دوست بس۔ صفا کنا زیبا نا وڑ شوخ لگا کنے۔ اونا گروشک تون کنا است نا درپہ تو اوار ناچ کننگ ءِ بناء مس۔ اونا باریم کنا ارادہ آتے پین کبینی بشخا۔

دا کنے جنگ کننگ نا حوصلہ تس۔ کنا است آن خلیس ءِ ہم کشا۔ جنگل آتا تنک انگا کسر تیٹ مریو یا مَش تا خُمب اٹ مریو یا کہ دشمن نا مونا سلوک مریو دا توفک کنے رکھک ہم و دشمن ءِ دک ہم خلیک۔

ہر ہر سُم کہ ای دانا نل آن کشانوٹ او آہن نا اسے ٹکر اس متنے بلکہ کنا عزم تا ارادہ آتا توار مسونے۔ ہر ڈیمبہ کہ دا نا تہا آن بش مسونے او اسے لس ءُ توار اس متنے بلکہ کنا تغ تا چیہانٹ مسونے۔ او اسے آزات ءُ جہان ئسے نا توار مسونے۔ اسے برابری نا چاگڑد اس مسونے۔ اسے اندنو بست و بند اسیکن مسونے اراڑے ظلم و ناانصافی نا پن و توار مفہ۔

ولے دا کنا توفک نا تعلق تنیا جنگ سے تو تفوک اف۔ دا اسے شعور ئسے نا تابع اسے ہمراہ ئسے۔ وخت وخت کہ جنگ نا شور شرابا جَھٹ ئسے کہ توریک تینے۔ ہر کُنڈا اسی چُپی اس تالان مریک تو ای تینا توفک ءِ اُریوا دا نا بھٹ، دانا بند نا زیہا کنا زند نا کیہی نشانی اریر۔ گڑاس دتر نا نشان و گڑاس کنا اومیت آتا عکس آک ءُ۔

دا اسے سلہہ ئسے آن زیات کنا ارادہ آتا نشان ءِ۔ دا کنا دوست انگا سنگت ءِ۔ ای اود تنیائی ٹی اسے ایلو تو ہیت کینہ۔ تینا است آتے سبک کینہ۔ دشمن کہ نفرت بشخینہ۔ وا بش مرینہ۔ سر ہلینہ۔ منزل ءِ اُرینہ۔ وعدہ کینہ۔ ہراتم اسکان دم ارے دا ننا سنگتی مدام مرے انتئے کہ غلام آتے کہ جنگ آن بیدس پین کسر سلتنے۔ دا سنگتی مدام برجاء سلے۔ ای تینا مسخت کہ جنگ کرسا کیوک۔

و ہراتم ہمو دے بسک کہ ای تینا مسخت تو یاری کرسا خلنگاٹ تو کنے باور ءِ کہ دا توفک کنا قصہ آتے بیان کروکا ورنا تا دُو ٹی مرو۔ او ورنا جنگ ءِ موستی درسا کرو۔

دا توفک کنا سنگت ءِ، کنا زیبا ءَ، کنا تغ تا ہمراہ ءِ۔ کنا شعور نا گواہ ءِ۔ دا بیرہ ہمو وخت ٹھکا کیک ہراتم انصاف نا چُپی سگنگ مفروک مرے۔ دا توفک ظلم نا خلاف ایسری آ دلیل ءِ۔ دا بیرہ بندغ کھسفنگ کہ خاخر شلیپک بلکن ہر سُم امن نا کُنڈا اسے گام اس مریک۔ کنا توفک نا ٹِک اسے فرد اس اف بلکن ظلم، زوراکی، زنک ایسری نا ہمو موننگا سیخاک ءُ ہرا کنا قوم ءِ غلام جوڑ کرینو۔

بس ننا قصہ نا زیبائی ہم اندا دے۔

دلجان بلوچ نا خاہوت و ہندی بندغ آک برانز کریسہ کراچی آواران کسر ءِ بند کرینو۔

زوراکی ئٹ بیگواہ دلجان بلوچ نا آجوئی کن اونا خاہوت و ہندی بندغ آتا برانز برجاء، برانز کروک آک آواران نا ڈپٹی کمشنر (ڈی سی) نا دفتر نا مونا تولوک برانز کننگ ءُ اندن دا وخت آ آواران آن کراچی بنجاہی کسر ءِ بیدی نا ہند آ بند کرینو۔

برانزی تا ردئٹ او ترند یخ تون پاش آسمان نا شیف آ تولوک برانز کننگ ءُ انتئے کہ ٹینٹ خواجہ غاک ریاستی تڑی تا سوب برانزی تے آسراتی تننگ آن نمن کرینو۔

برانز کروک آتا ردئٹ، پاکستانی لشکر و پولیس چرجوئی ئٹ بھیم ئنا گواچی کننگ ءُ تاکہ برانز ءِ ایسر کرفنگ کیر، ولے اوفک ہموتم اسکان برانز ءِ برجاء تخور ہراتم اسکان دلجان بلوچ آجو متنے۔

یاتی مرے دلجان بلوچ ءِ 12 جون 2024 آ پاکستانی لشکر آواران آن دزگیر کریسس، و اونا بیگواہی آن پد اونا خاہوت 3 اکتوبر 2024 آ ڈی سی آفس آواران نا مونا چار دے تولوک برانز کریسس۔

خاہوت نا ردئٹ ہمو وخت ڈی سی آواران و ایلو ضلعی کوالخواک معاہدہ کریسر کہ دلجان بلوچ ءِ 10 دے ئٹی یلہ کننگو، ولے اینو اسکان ہچو گام اس ارفنگتنے۔ خاہوت نا پاننگ ءِ کہ دروغ وعدہ و دروہ تننگ نا سوب او دوارہ برانز کننگ آ بیوس مسنو۔

برانز کروک آک دا وخت آ ٹرانسپورٹ خواجہ غاتیان و لس مخلوق آن خواست کرینو کہ او اوفتا برانز ئٹ اوار مریسہ ظلم ئنا برخلاف سیوتی نا درشانی کیر، برانزی تا پاننگ ءِ کہ اگہ تولوک برانز ئٹ اوار مروک آتے اسہ نسخان اس رسینگا گڑا اونا ذمہ واری ضلعی بست و بند و ساڑی آ حکومت آ مرو۔

دلجان بلوچ نا خاہوت گیشتر پارے کہ ہنوک وخت ئٹ برانز ءِ ایسر کرفنگ کن دروغ دلاسہ تننگا، ولے داسہ اوفک باوری ترفنگ آن بیدس برانز ءِ برجاء تخور۔

اوفتا پاننگ ءِ کہ دلجان بلوچ نا آجوئی اوفتا بنداوی خواست ءِ و اوفک ہچو دروشم اسیٹ داڑان پدی مروفس۔

بلوچ جند ندر رفیق بزنجو نا باوہ پین مُسہ سیال آتیتون اوار پاکستانی فورسز و ڈھکوک ادارہ تا کارندہ تا دو آن زوراکی ئٹ بیگواہ کننگانے۔

ٹی بی پی نیوز ڈیسک ءِ رسینگوک حوال تا ردئٹ کوئٹہ ئٹ ’جند ندری جلہو‘ ئٹ پاکستانی لشکر نا کارندہ تے ٹک کروک محمد رفیق بزنجو بلوچ عرف وشین نا باوہ مراد علی و مُسہ سیال غلام قادر نا مار اسماعیل، غلام قادر نا مار طارق و گل حسن ءِ پاکستانی عسکری ادارہ تا کارندہ غاک زوراکی ئٹ بیگواہ کرینو۔

حوالکار آک ٹی بی پی ءِ پاریر کہ پن کروک بندغ آتے 9 نومبر آ میر مولا بخش گوٹھ، دارو ہوٹل حب آن پاکستانی لشکر و ڈھکوک ادارہ تا کارندہ غاک دزگیر کریسہ بیگواہ کرینو۔

پن کروک بندغ تا بابت دائسکان ہچ وڑ ئنا حوال رسینگتنے۔

دیہاڑی عمل نا جوڑشت

ڈاکٹر مبارک علی| مٹ : برناز بلوچ

دی بلوچستان پوسٹ

دیہاڑی عمل نا جوڑشت ئٹ کیہی عناصر آک بشخ ہلیرہ۔ ہندن کہ بندغ نا علم دیمروی کرسا ءِ اوڑتون اوار ہی دیہاڑ نا اودیم مروک پہلوک مونا برسا ءُ۔ داٹی آرکیالوجی بھلو کڑدار اس مونا ہیسنے۔

پوسکنا وخت ئٹ کیہی انقلاب آک دیہاڑ نا باروٹ ننا نظریہ غاتے مٹ کرینو۔ اولیکو انقلاب بندغی دیمروی نا مراحل آتا ءِ ، ہرادے ڈارون تینا کتاب On The Origin of Species ئٹ ہرا 1859 ئٹ شینک مسوسس، ٹی درشان کرینے۔ ارٹمیکو اہم ئنگا انقلاب اَرکیالوجی نا شعبہ ٹی کاربونیٹنگ نائے، ہرانا کمک ئٹ متکن ئنگا گڑا تا باروٹ دا ٹہیفنگک کہ دا اراتم یا ارا کرن ئٹ جوڑ مسوسر۔ مسٹمیکو انقلاب DNA نائے، ہرا بندغی گروہ تا نسل نا تعین ءِ کیک۔

دا مسٹ ئنگا انقلاب آک آرکیالوجی نا علم ئٹ ودکّی کرسا اودے شابیت تسر۔ مثیل ئسے نا خل یا کانسی نا وخت ئنا قبرستان آتیا تحقیق کرسا قبر آتیٹی کھڈ مروک بندغ نا ازباب و سلہہ غاک دو بسر۔ دافتا کمک ئٹ چاہندار آک او وخت نا چاگڑدی دیہاڑ ءِ جوڑار۔ ہراتم آرکیالوجی نا علم ءِ سائنسی بنداو آ جوڑ کننگا گڑا داڑان تدوکا وخت ئتون تفوک بےکچ معلومات دُو بس، ہمو تہذیب آک کہ ہرا دا وخت اسکان کھڈ ئسر۔ اوفک دیہاڑ نا سرحال جوڑ مسر۔

متکنا وخت نا عمارت و کھنڈرات آتا پٹ و پول آن فنِ تعمیر ئٹ بندغی علم نا باروٹ معلوم مس مثیل ئسے نا احرامِ مصر نا عمارت آک اینو ہم ہُروکا تے ہبکہ کیرہ۔ ہراتم اول احرام نا بنیات تخنگا، گڑا او ریک آتیٹی بھس ہنا۔ اوکان پد مصر نا ماہرِ تعمیرات آک اول سوگو پلیٹ فارم ئسے نا بنیات ءِ تخار تاکہ او عمارت نا باریم ءِ سگنگ کے۔ احرام آتا تفنگ آن متکنا مصر نا تہذیب نا گمان مریک۔ ہرا تنیا فنِ تعمیر آخہ بلکن ریاضی و جیومیٹری ٹی ہم ماہر ئسر۔ اوفک Mummification نا وسیلہ ئٹ مرگ ئتون مون تسر کہ اوفک دوارہ ہندا جہان ئٹ برور و ہڑدے ئی زند گدریفور۔

بندغی دیہاڑ ئٹ راج آتا نیامٹ جنگ آک مرسا بسنو۔ ہندا خاطران ہر راج ئٹی جہدکار آتا بھلو شرف اس مسکہ۔ انتئیکہ دافک تنیا تینا راج ءِ رکھیتورہ بلکن ایلو راج آتیا جلہو کرسا اوفتا ڈغار تیا قوضہ کریرہ و مالِ غنیمت ءِ لٹ و پل کرسا ہیسرہ۔ ہندا خاطران جہدکار آتے اوفتا بہادری و بھلن حوصلہ آتیکن چاگڑد ئٹ بھلو مقام اس تننگاکہ۔ ہمرکہ بخال آتیٹی کشتری ذات آ فرض ئس کہ او جنگ کے۔ یورپ ٹی نائٹس نا تپہ ہم جہدکار یا جنگجو مننگ نا سوب آن پنی ئس۔ ہندا خاطران متکنا وخت ئٹ ہر راج تینا بندغ آتے جوڑ و طاغتور خننگ خوائسکہ۔ تاکہ اوفک جنگ ئنا پڑ آ ثابت قدم رہینگر۔

متکنا وخت نا حکمران آتے دا ہیت آ گمر ئس کہ اوفک جنگ آتے کھٹانو و دژمن آتا لس خون ءِ کریر۔ تینا دا کارنامہ غاتے اوفک خل تیا نوشتہ کرفسہ نصب کرفیر۔ ہندنکہ تاریخ نویسی آ اوفتا اجارہ داری ئس۔ ہندا خاطران ظلم و بربریت نا تدینیک اوفتا کارنامہ جوڑ مسر و دیہاڑ ئٹ اوفتے عظیم جوڑ کرسا مونا ہتنگا۔ ولے گواچن ئٹ اوفک ہیرو آخہ بلکن دیہاڑ نا ڈوہ دار ءُ ۔

دیہاڑ ئٹ مَٹی نا اسہ اہم ءُ وسیلہ اس بندغ آتا اہمیت ءِ ۔ بندغ آک اسہ جاگہ غان ایلو جاگہ غا ہمو وخت ہنپ بٹ کریرہ ہراتم ڈھکال، خشک سالی، ناجوڑیک و ڈنی جلہوکار آتا خُلیس مسکہ۔ ہنپ بٹ نا عمل بھاز ڈکھیا و ساہ ہلوک مسکہ۔ مثیل ئسے نا ہراتم چین آن قبائلی جنگ آتا سوب آن کُشن قبیلہ ہنپ بٹ کرے و ازبکستان ئٹ بس آبات مس۔ گڑا اوفک اسہ بھلو سلطنت ئسے نا بنداو ءِ تخار۔

کُشن خاہوت نا حکمران آک اوغانستان و پنجاپ ئٹ تینا حکومت جوڑ کریر۔ اوفک بُدھ مذہب ءِ گچین کریر۔ حکمران کنشک نا وخت ئٹ ہندوستان ئٹ بدھ مذہب نا منّوک آتا کیہی کانفرینس آک مسر، ہرافتیٹی چین و جاندم دےٹک ایشیاء نا بندغ آک شرکت کریر۔ دا مذہبی اشتماع تیٹی بدھ مت اِرا فرقہ ٹی بشخ مس۔ اسٹ مہایان یعنی بھلا پہیہ والا و ارٹمیکو بُنیان یعنی چنکا پہیہ والا۔ دا عہد ئٹ بدھ مت وسعتِ ایشیاء ، اوغانستان، کشمیر، سندھ و قطب دے کہی ہندوستان ئٹ تالان مس۔

دیہاڑ ئٹ دود و ربیدہ و تہذیب راج آتا پجار نا چیدہ رہینگانو۔ دود ربیدہ قبائل یا برادری تیٹی رُدیک، ہرافک مَش یا جنگل آتیٹی آزاتی ئٹ زند گدریفیرہ۔ ہندا خاطران اوفتا عادت و سوچ ئٹی بھاز مچٹ مَٹی بسکہ و دافک تینا قبائل یا برادری نا دود و ربیدہ آتا پابند مسرہ۔ دا حالیت اینو ہم برصغیر نا قبیلہ و برادری تیٹی ساڑی ءِ ہرافک تینا دود ربیدہ آتا پابند ءُ ۔

دانا مقابلہ ٹی تہذیب شار آتیٹی ودی مریک و وخت ئتون اوار بریبر مٹ مرسا کیک۔ بلکن کیہی دود ربیدہ غاک ہم تہذیب نا بشخ جوڑ مریرہ۔ تہذیب نا پن آ جہان ئٹ تعصب و خار ودی مس۔ جنگ آک مسر و دترچری نا وسیلہ ئٹ تہذیبی برتری ءِ ثابت کننگا۔

دیہاڑ نا جوڑشت ئٹ سیاست ، علم و ادب، آرٹ، مجسمہ تراشی و پوسکنو فلسفی ءُ فکر و خیال آک مریرہ، ہرافک دیہاڑ ءِ ہنوکا وخت آن کشیسہ آخبت نا کنڈ آ دیرہ۔ ہندا خاطران دیہاڑی عمل ءِ سرپند مننگ کن بندغ نا جوزہ، اونا فطرت، اونا خیال و سوچ ءِ خواننگ المی ءِ ۔ دیہاڑی عمل ئٹ تہو و چرک نا ہم بھلو کڑدار اس ارے ہراڑے بندغ فطرت تون مقابلہ کیک و تینا وجود ءِ برجا تخک۔

بلوچستان نا ضلع نوشکے ٹی بھلو کچ ئسے آ لشکر کشی برجاء ءِ۔ گن شپ ہیلی کاپٹر آتیتون اوار فورسز آتا کیہی گاڑیک مَشی آ لڑ ئنا پارہ غا ہِنوک خننگانو۔

حوال تا ردئٹ اینو سہب ئنا پاکستانی لشکر نوشکے نا مَشی آ لڑ دو سہہ و ایب کیب ئٹ لشکر کشی بناء کرینے ہراڑے ہیلی کاپٹر آتا بال اسہ وڑ برجاء ءِ۔

حوالکار تا ردئٹ دئے ئنا کچ گاڑی تیٹ پاکستانی لشکر نا کارندہ تے پن کروک علاقہ نا پارہ غا گام خلیسہ خننگانے۔

دا وخت آ علاقہ ئٹ حوالکاری نظام محدود کننگانے۔ کوالخواک دا بابت دائسکان ہچو شابیتی حوال فراوان کتنو۔