دیہاڑی ردیک – ٹی بی پی سرگپ
ہفتدہ جنوری نا بیگہ نا حب چوکی ٹی بلوچ زنک ایسری نا یات گاری دے (25 جنوری) آ دالبندین ئٹ اڈ تروک جلسہ کن بلوچ یکجہتی کمیٹی نا چاہنداری مہم برجاء ئس۔ اندا وخت آ بلوچ یکجہتی کمیٹی نا راہشون، سمی دین بلوچ آ سلہہ بند جلہو نا کوشست کننگا، ہرانا سوب آن اِرا شکبر بندغ دزگیر مسر۔ اوفتیان سلہہ، شناختی کارڈ و پروفائلنگ کن برانزی تا ویڈیو و عکس آک خننگار۔ دا بندغ آتا تعلق پاکستانی ڈھکوک ادارہ تیان پاننگک۔
داڑان مالو گوادر ئٹ بلوچ راجی مچی نا وخت آ بلوچ یکجہتی کمیٹی نا بنجاہی سروک ڈاکٹر ماہ رنگ بلوچ آ جلہو نا کوشست کننگاسس، ہراٹی ملٹری انٹیلی جنس نا اسہ کارندہ اس دزگیر کننگا۔
پاکستان نا مقتدر طاغت آک، بلوچ یکجہتی کمیٹی نا ریاستی تادی و زوراکی نا بیگواہی تا ایسری کون آ جائز خواست آتے پورہ کننگ نا جاگہ غا، بلوچ راہشون تیا چرجوئی ئٹ ایف آئی آر نوشتہ کریسہ، پرامن مُچی تیا لٹ و کٹ و بلوچ زالبول تا دزگیری کون آ چم آتے کاریم ئٹ ہتنگ ءُ۔ دا غٹ گام آک تحریک ءِ ایسر کننگ نا بے سہب کوشست ءُ۔
پاکستان نا پالیسی ساز آک وار وار دیہاڑی ردی تے کریسہ ءُ و اندا تکرہ کہ بلوچ راہشون تا دزگیری یا اوفتے نسخان تننگ آن بلوچ راجی تحریک ایسر کننگ مریک۔ ولے گواچنی دادے کہ نہ ہنوک وخت ئٹ بلوچ راہشون تا کسفنگ آن دا تحریک ایسر مننگ کرے، و نئے کہ داسہ دن انگا اٹکل آک دادے ایسر کننگ کیرہ۔
پاکستان نا فوجی آمر جنرل پرویز مشرف پاریسس کہ بلوچ آتے اندنو جاگہ ئسے آن خلون کہ اوفتے سماء ہم تمپرو۔ ولے بلوچستان ئٹ لشکر کشی، زوراکی نا بیگواہی، لس خون و ریاستی تادی تیان پد ہم، اِرا دہائی آن بلوچ آتا آجوئی نا جہد نئے بیرہ برجاء ءِ بلکن وخت ئتون اوار داٹی ترندی و پوسکنی بسنے۔
پاکستان نا مقتدر ادارہ غاک دیہاڑی ردی تیان سبخ ہلنگ نا جاگہ اوفتے ولدا کننگ ئٹ اختہ ءُ، و دا رویہ ریاست کن بھاز بھیم بش کروک نتیجہ تا سوب پاش مننگ کیک۔
