ندّر شتکو آ شوکت کِن
شاعر: پُلھین بلوچ
شنک مریوّہ، او شتکو، نا گام ئنا تُرندی آ
لاڈی،زیبا، پُلی دلبر نُما دا بالاد ئنا بُلندی آ
امر ناز، لاڈ و مِہر ئٹ کسّر آ کاہک صَدخہئ آ
صدخہ امو شین ئنا،اراکہ مِہر ءِ چٹ لُمہئی آ
امر نی کاسہ اے دلبرو زُوت ئس داخہ خُمار ئٹ
اف داڑے ہِچس، کنے ام در امو زیبا غا جمار ئٹ
شاد ءُ گل،مِہر و مابت،زیبل ٹاکو تون بشخِندہ ئس
دڑد آتا خُمب ئٹ لمبہ ہلوک کنتون بیرہ آڑسِندہ ئس
ندر نیکن کنا آھُو خنی، ابکّہ و گُنگ کرے دلبری نُما
بریسک پدا مرے کچاری، پالُن آ خن تون وداری نُما
بلوچستان نا ضلع دکی ٹی پاکستانی لشکر نا لشکر کشی برجاء ءِ۔
حوال تا رد ئٹ دکی نا علاقہ رباط و ایب کیب ئٹی پاکستانی لشکر اینو سوب آن زمینی آپریشن ئٹی اختہ ءِ۔ فورسز کارندہ غا تا بھلو کچ ئس ہند آ خننگ مسنے۔
کوالخواہ تا کنڈ آن دائسکان ہچو حوال فراوان کننگ متنے۔
خیال ئٹ مرے اِرا دے مُست اندا علاقہ ٹی بلوچ لبریشن آرمی اسہ آئی ای ڈی جلہو ئسیٹی فورسز آتا گاڑی ءِ ٹک کریسس ہراٹی کوالخواک چھار کارندہ ٹپی مننگ ءِ پک کریسر۔
بلوچستان نا بنجاہی شار کوئٹہ غان پاکستانی لشکر اِرا توہ مالو 5 ستمبر آ خوانندہ عطاء اللہ ولد جمعہ خان ءِ اونا اُرا کلی جمعہ خان آن زوراکی ئٹ بیگواہی نا گواچی کرے ہراڑان پد دائسکان او بیگواہ ءِ۔
بیگواہ کننگوک خوانندہ ہشتمی جماعت نا خوانندہ ئسے ہرا او وخت باقاعدئی ئٹ تینا کلاس آتے ہلنگ ئس۔
سیاسی و چاگڑدی کڑدہ تا پاننگ ءِ کہ پن کروک خاہوت بھلو وخت ئسے آن ریاستی تادی نا گواچی ءِ، اندا خاہوت آن تعلق تخوک محمد علی چپر ءِ قلات آن پاکستانی لشکر زوراکی ئٹ بیگواہی آن پد کسفیسس۔
خاہوت راج آن خواست کرینے کہ اوفتا چنا کن توار ارفر تانکہ اونا آجوئی ممکن مننگ کے۔
چھتر ئٹ زالبول تون اوار اِرا بندغ کسفنگانو۔
شابیتی حوال تا ردئٹ ضلع نصیر آباد نا تحصیل چھتر ئٹ تھانہ فلیجی نا حد گوٹھ بانڑی ٹی سلہہ بند بندغ آک سم کاری کریسہ زالبول تون اوار اِرا بندغ ءِ کسفیر تدینی نا سوب سیاہ کاری پاننگک۔
جون تے اسپتال آ دننگا و المی کاروائی آن پد اوفتے خاہوت نا دوٹی تننگا، گیشتر پٹ و پول پولیس کننگ ءِ۔
یاتی مرے پن کروک علاقہ تیٹ بھلو وخت ئسے آن سیاہ کاری نا دوبہ غا کسفنگ نا تدینیک مونا بسرہ ولے اندا منہ وخت آن دا وڑ نا تدینی تیٹ ودکی خننگ ئٹ بننگ ءِ۔
بلوچ یکجہتی کمیٹی نا مہم ”چپی ءِ پرغنگ: زوراکی نا بیگواہی تا برخلاف بش مننگ“ نا سرحال ئٹ دالبندین ئٹ برانز ریکارڈ کننگا۔
بلوچ یکجہتی کمیٹی نا کال آ دالبندین ئٹ بیگواہ بندغ تا خاہوت و شاری تا پارہ غان اسہ برانز مُچی اس کشنگا ہرا عرب مسجد آن بناء مریسہ شار ئنا بنجاہی کسر ئٹ مریسہ دالبندین پریس کلب نا مونا سر مس۔
برانزیک دالبندین پریس کلب نا مونا برانز کریر، ریلی ٹی بیگواہ بندغ تا خاہوت آک ہم اوار ئسر۔
ریلی ٹی بیگواہ غلام اللہ نا ایلم و عامر بلوچ تران کریسہ پاریر کہ بیگواہ بندغ تے دمدستی آجو کننگہ نن عدالت آتے منینہ ولے نم اوفتے لتاڑیرے دا وخت بلوچستان ئٹ ظلم و تادی برجاء ءِ بیگواہ بندغ تا خاہوت آک سڑک آتیا در پہ در ءُ ولے ننے ہچو انصاف اس رسینگنگ اف و بلوچستان آن گیشتر ورنا تے بیگواہ کریسہ ءُ۔
خاہوت آک خواست کریر کہ غٹ بیگواہ بندغ تے پاش کریسہ عدالت آتیٹ ہتنگہ اگہ اوفک ڈوہ کرینو گڑا اوفتے ٹرائل نا موقع تننگہ۔
بلوچ یکجہتی کمیٹی نا مہم ”چپی ءِ پرغنگ: زور الی نا بیگواہی تا برخلاف بش مننگ“ نا سرحال ئٹ بلوچستان نا جتا علاقہ تیٹ برانز آتا لڑ برجاء ءِ ہراڑے داکان مالو کراچی، حب چوکی، خضدار، تربت، پنجگور، خاران، کوئٹہ، نوشکے و اینو دالبندین ئٹ برانز کننگا۔
چارٹسٹ تحریک اخس سرسہب ئس؟
ڈاکٹر مبارک علی | مٹ: برناز بلوچ
دی بلوچستان پوسٹ
چارٹسٹ نوزدہ میکو کرن ئٹ برطانیہ ٹی مزور آتا پارہ غان چلیفنگوکا اولیکو السی تحریک ئس۔ دا تحریک ئٹی خواری کشوک تپہ نا پارہ غان انت خواست مونا ہتنگاسس، دا اخس سرسہب ئس و دا تحریک نا پدندارہ انت ئس؟
انگلستان ئٹ جمہوری ادارہ غاک مدان مدان آ جوڑ مرسا کریر۔ بنائی دور ئٹ لس مخلوق ءِ جمہوری حق آک رسینگتوسر۔ ہرافتیکن اوفک چرجوئی ئٹ جہد کریر، تحریک و برانز آتا وسیلہ ئٹ تینا حق آتے دوئی کریر۔
عہدِ وسطیٰ نا انگلستان ئٹ پارلیمنٹ نا باسک آتیکن گچینکاریک مسرہ۔ گچینکاری حلقہ غاک محدود مسرہ۔ تنیا صاحبِ جائیداد ءِ ووٹ تننگ نا حق ئس۔ ووٹنگ ڈھکوکائی متوکہ بلکن دُو ءِ بڑز کرسا ووٹ تننگاکہ۔ گچینکاری نا دے اکن امیدوار ووٹر آتے بیئر و چیز (Beer & Chees) نا سینڈوچ ہم تسکہ۔ ہرا ووٹر آک پیر ءُ مسرہ، اوفتے بگھی تیٹی تُولفسہ ہتننگاکہ۔ گچینکاری تیٹی متوسط تپہ و لس الس ءِ ووٹ تننگ نا حق الو۔
صنعتی انقلاب برطانیہ نا چاگڑد ءِ چٹ مٹ کرے۔ شار آتا آبادیک ودّار ولے پارلیمنٹ ئٹی اوفتیکن ہچو سیٹ (seat) الو۔ متکن ئنگا گچینکاری حلقہ آتا آبادی کم مسوسس۔ ولے پارلیمنٹ ئٹی دافتیکن سیٹ مسکہ۔ دافتے Rotten Borougs پاریرہ، ہراڑے بھلا بندغ آک (اُمراک) اڑزانی ئٹ گچینکاری تے کھٹارہ۔
1789ء نا فرانسیسی انقلاب و نیپولین نا جنگ آتا سوب انگلستان نا سیاست ہم زیمی مس۔ صنعتی انقلاب ورکنگ کلاس ءِ ودشت تس۔ ہرافک ٹریڈ یونین آتا وسیلہ ئٹ تینا حق آتیکن جہد کریر۔ حکومت دافتا برانز آتے بھاز بے رحمی ئٹ لتاڑ تس۔ 1817ء ٹی مانچسٹر نا اسہ جلسہ اسیٹی فوج مزور آتا قتلِ عام ءِ کرے۔ دیہاڑ ئٹ دا تدینی پیٹرلُو نا پن آ پنی ءِ ۔
داڑان بیدس کہ السی تحریک آتے لتاڑنگا ولے چاگڑد ئٹ داسا پورژوہ تپہ سوگو مننگ ئس، ہرافتیتون تعلیم و دولت تومکا ئسر۔ ہندا خاطران اصلاحات آتا وسیلہ ئٹ گچینکاری تے مٹ کننگا و 1825ء ٹی گریٹ ریفارم بِل پاس کننگا، ہراٹی Rotten Borougs آتا سیٹ آتے ایسر کننگ مس و بھلا شار تیٹ پارلیمنٹ نا سیٹ آتے مقرر کننگ مس۔ متوسط تپہ ءِ ووٹ تننگ نا حق تننگا۔ ولے ورکنگ کلاس داسا ہم ووٹ تننگ نا حق آن پدماندہ ئس۔
دا حالیت ئٹی ٹریڈ یونین نا کسرشون آک دا مارشت ءِ ودی کریر کہ اسکان کہ دافتے ووٹ تننگ نا حق رسینگپک، اوفتا نمائندہ غاک پارلیمنٹ ئٹی ہنوفس و اوفتا حق آتیکن قانون سازی مروف گڑا ہمو وخت ئسکان اوفتے چاگڑد ئٹ شرف رسینگوف۔
ہندا خاطران تینا سیاسی خواست آتے پورو کننگ کن اوفک چارٹسٹ نا پن آ تحریک اس چلفیر۔ دا تحریک 1838ء آن 1857ء اسکان برجا مس۔ دا تحریک ئٹی اوفک شش اہم ءُ خواست مونا تخار۔ درخواست تروکا تا پارہ غان دا خواست آ زور تننگا کہ:
1- بالغ رائے دہی نا موکل تننگِہ۔ خاص وڑئٹ ہمو بندغ آتے کہ ہرافتا عمر 21 سال یا داکان ہم گیشتر مرے۔
2- رائے دہی ڈھکوک مرے
3- پارلیمنٹ نا باسک آتیکن صاحبِ جائیداد مننگ المی مف
4- پارلیمنٹ نا باسک آتا تنخواہ مقرر کننگ مرے
5- گچینکاری حلقہ غاک بریبر مریر۔
6- پارلیمنٹ نا گچینکاریک سال ئنا بنیات آ مریر
چارٹسٹ تحریک نا بنائی برانز آک 1838ء ئٹ برمنگم، گلاسکو و شمالی انگلستان نا شار آتیان بناء مسر۔ داکان گڈ تحریک نا کسرشون آتے دا ہیت ئنا اندازہ مس کہ اسکان لندن ٹی اسہ بھلو برانز اس مفرو و پارلیمنٹ آ زور شاغنگتنے گڑا او وخت ئسکان دا برانز آک سرسہب مننگ کروفس۔
ہندا خاطران لندن ئٹ برانز اس کشنگ نا تیاریک بناء مسر۔ دا تحریک نا خواست آتا ہلنگ کن 1.3 ملین ورکر آک دستخط کریر۔ جون 1839 ئٹ دا درخواست ءِ اسہ گاڑی اسیٹی تخیسہ اودے پارلیمنٹ ہاؤس آ دننگا۔ دا جلوس ئٹی کم و ود پنجاہ ہزار بندغ اوار ئس۔ جلوس پرامن ئس و بیدادی ہچو قصہ اس مونا بتو۔ پارلیمنٹ ءِ دا درخواست تننگا، ولے اونا خواست آتے خوڑتی ئٹ ہُننگ متو۔
1839 آن پد دا تحریک نزور مرسا ہنا۔ انتئیکہ ورکنگ کلاس کن اسہ تحریک ئسے مرغن تدیفنگ یا برجا تخنگ کبین مریک۔ اوفتے اُرا نا خرچہ آتیکن زر گرج مریک۔ داڑان بیدس کہ داکان گڈ ہم مچٹ بھاز برانز اڈ تننگا ولے فوج اوفتے بشخ و چانٹ کرے۔ چارٹسٹ تحریک او وخت فوری تینا خواست آتے پورو کرفنگ کتو ولے وخت ئتون اوار اونا کل خواست آک بیدس پارلیمنٹ نا سالانہ گچینکاری آن، انگلستان نا گچینکاری عمل نا بشخ مسر۔
داڑان اندازہ مریک کہ اگہ اسہ تحریک ئسے الس نا نیامٹ کڑمب ءُ ہند اس سر مرے گڑا حکمران تپہ غاک ہم اونا دباؤ ٹی بریرہ و بے وس مریرہ کہ تینا مراعات آتیان دُو ارفر و لس بندغ آتے اوفتا حق آتے ایتر۔ اگہ چارٹسٹ تحریک ءِ یورپ نا تناظر ئٹ ہُننگ مرے گڑا دا ہمو وخت ئس کہ ہراتم 1848 ئٹ تیوہ غا یورپ ئٹ انقلابی آ کاریمک چلنگ ئسر۔ ولے انگلستان ئٹ چارٹسٹ تحریک انقلاب ہتنگ نا جاگہ غا اصلاحات نا کسر ءِ گچین کرے۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
بلوچ اسٹوڈنٹس ایکشن کمیٹی نا مسکوہی ہنکینی نائب صدر حمیدہ بلوچ کزیت کرے۔
بلوچ اسٹوڈنٹس ایکشن کمیٹی اوتھل ہنکین نا مسکوہی ناہب صدر و متحرک آ چاگڑدی باسک، کامریڈ حمیدہ بلوچ کراچی ٹی کذیت کرے۔ او آواران نا علاقہ تیرتیج نا ہندی ئس اس و کینسر نا ناجوڑی نا گواچی ئس۔
حمیدہ بلوچ بلوچستان ئٹ چاگڑدی و سیاسی میداد ئٹ بھلو خزمت سر تس۔ او بلوچ اسٹوڈنٹس ایکشن کمیٹی تون تفوک ئس و خوانندہ غاتے مچ کننگ کن کاریم کرسہ کرے۔
بلوچ یکجہتی کمیٹی نا مہم ”چپی ءِ پرغنگ: زوراکی نا بیگواہی تا برخلاف بش مننگ“ نا سرحال ئٹ نوشکے ٹی برانز ریکارڈ کننگا۔
بلوچستان ئٹ اسہ وار پدا زوراکی نا بیگواہی تیٹ ودکی و کیہی بندغ تا زوراکی ئٹ بیگواہی نا برخلاف اینو بلوچستان نا ضلع نوشکے ٹی بلوچ یکجہتی کمیٹی نا سروکی ٹی ریلی اس اڈ تننگا و برانز ریکارڈ کننگا۔
نوشکے برانز ئٹ شاری تا بھلو کچ اس اوار مس اندن نوشکے آن زوراکی ئٹ بیگواہ بندغ تا خاہوت آک ہم دا برانز ئٹ اوار مسر۔
دا وخت آ ریلی جتا کسر تیٹ مریسہ برانز نا دروشم ہلک ریلی ٹی اوار مروک آک بینر، پلے کارڈ و بیگواہ بندغ تا عکس آتے ارفیسر، برانزیک بیگواہ بندغ تا آجوئی و تینا خواست آتا حق ئٹ نعرہ خلکر۔
نوشکے برانز ئٹ اوار مروک زوراکی ئٹ بیگواہ بندغ تا خاہوت آک جہانی راج و ادارہ تیان خواست کریر کہ اوفک اوفتا بیگواہ بندغ تا آجوئی کن کڑد سر ایتر و اوفتے دا تادی آن خلاسی ایتر۔
بلوچ یکجہتی کمیٹی نا مہم ”چپی ءِ پرغنگ: زور الی نا بیگواہی تا برخلاف بش مننگ“ نا سرحال ئٹ بلوچستان نا جتا علاقہ تیٹ برانز آتا لڑ برجاء ءِ ہراڑے داکان مالو کراچی، حب چوکی، خضدار، تربت، پنجگور، خاران، کوئٹہ و اینو نوشکے ٹی برانز کننگا۔
بلوچستان نا ضلع کیچ ئٹ ورناس چٹ ئس لخ ئٹ شاغسہ زند ءِ تینا ایسر کرے۔
حوال آتا رد ئٹ بلوچستان نا ضلع کیچ ئٹ محمد ولد یاسین مند ڈلسر نا ہندی پنی ءُ ورناس تینے پاہو ترسہ زند ءِ تینا ایسر کرے۔
واہم تدینی نا سوب آک دائسکان سماء تمتور۔
یاتی مرے کہ بلوچستان ئٹ خود کشی نا تدینیک اسہ بھیم بش کروک ءُ حالیت اس تینا کرینو دے پہ دے آ خودکشی نا تدینیک رپورٹ مریسہ کیرہ۔
بلوچستان ئٹ فورسز نا پارہ غان زور تننگ، بلیک میلنگ و ایلو وسیلہ غاتیٹ تنگ کننگ آن گڈ کہیی بندغ آتا خودکشی نا تدینیک رپورٹ مسنو۔
ضلع کیچ و سبی آن پاکستانی لشکر مسہ بندغ ءِ دزگیر کریسہ بے ڈس آ ہند آتیادرے۔
بلوچستان نا ضلع کیچ آن رسینگوکا احوال آتا رد ئٹ اینو سہب ئنا پاکستانی لشکر تربت کرکی آن بخشل پنی ءُ ڈرائیور ئسے دزگیر کریسہ بے ڈس ءُ ہند ئسے آ درینے۔
تدینی نا برخلاف بیگواہ مروکا بندغ نا خاہوت کرکی نا ہند آن برانز کریسہ سی پیک کسر ءِ بند کرینو برانز نا سوب سی پیک کسر آ گاڑی تا بھلو چِر ئس لگانے۔
برانزیک خواست کرینو کہ تربت کالخواہ پاکستانی لشکر نا دو آن بخشل ءِ جمی یلہ کریفر آخہ گڑا ننا تولوک برانز سی پیک کسر آ برجاء مرو۔
ایلو پارہ غان کیچ ئنا علاقہ کیکن آن رسینگوکا احوال آتا رد ئٹ ہژدہ اکتوبر آ اُراغا ہننگ نا وخت آ عطا محمد پنی ءُ بندغ ئسے پاکستانی لشکر دزگیر کریسہ بیگواہ کرینے، ہراڑان گڈ او بیگواہ ءِ۔
اندا وڑ سبی آن پاکستانی لشکر جاور ولد دلاور ءِ دزگیر کرسہ بیگواہ کرے ہراڑان گڈ اونا باروٹ ہچو احوال ئس رسینگتنے کہ او اراڑے کہ۔
