بلوچستان نا جتا جتا انگا ضلع تیٹ بازار و بھلا کسر آتیا ہن و بر بند کننگانے۔

نوشکے ٹی بنجاہی بازار و اوڑان خڑک تہہ و پیشن نا کسر آ بند کننگانو و علاقہ ٹی پاکستانی لشکر نا بھلو کچ اس خوائیفنگانے۔

ہندی وسیلہ تا رد ئٹ دا حالیت نا سوب آن علاقہ ٹی کرفیو و لاک ڈاؤن نا وڑو حالیت ئسے و مخلوق ارا تیٹی بندی مسونے۔

ایلو پارہ غان پنجگور ئٹی ہم جتا جتا انگا کسر، بنجاہی بھلا بازار و مارکیٹ آک بند ءُ۔ یندی دکان والا تا پاننگ ءِ کہ اوفتے پاکستانی لشکر نا پارہ غان بازار آ ہننگ آن تورنگا، ہرانا سوب آب چتکان بازار تون اوار کیہی واپاری نا جاگہ غاک بند ءُ۔

ہندی وسیلہ تا رد ئٹ علاقہ ٹی پورہ کرفیو نا وڑو حالیت ئسے و واپاری نا کل کاریمک سلیسنو۔

کوئٹہ ٹی ہم کیہی بھلا کسر تے ٹرک و کنٹینر خلیسہ بند کننگانے۔ وسیلہ تا رد ئٹ اسپنی روڑ، چمن پھاٹک، جوائنٹ روڑ، زرغون روڑ، ریڈ زون و ایلو بھلا کسر تیان اڑاند جوڑ کریسہ ہن و بر ءِ کم کننگانے۔

داکان بیدس تربت نا علاقہ ناصر آباد و ایلو علاقہ تیٹ ہم پاکستانی لشکر نا پارہ غان بازار تے بند کرفنگ نا حوال رسینگانے ہرانا سوب آن واپاری نا کل کاریمک زیمی مسنو۔

قبلئی کولمبیا ٹی بروک آ بھلا زمین جمب ئٹی کم و ود 111 بندغ کسکر و درزن تا کچ ٹپی مسنو۔

ہندی کوالخواہ تا رد ئٹ زمین جمب آن بھلو کچ اسیٹی جان و مال تا نسخان مسونے و زیمی مروک آ علاقہ تیٹ کمک کروک کاروائیک برجا ءُ۔

امریکہ نا جیولوجیکل سروے نا رد ئٹ ۷۔۴ ترندی نا زمین جمب دوشمبہ نا دے ہفت بجہ و سی و چار منٹ نا وخت کولمبیا نا صوبہ چوکو ٹی ۱۰۷ کلو میٹر (۶۶ میل) کڑمبی ٹی بسک۔

زمین جمب نئے بیرہ کولمبیا نا جتا جتا انگا جاگہ تیا مارِنگا بلکن ہمسایہ ملک وینزوویلہ، ایکواڈور و مانامہ ٹی ہم مخلوق لڑزہ اس محسوس کرے۔

زمین جمب نا سوب آن کیہی ماڑیک بھس مسر و کیہی بندغ آک ہندا ماڑی تا کیرغ آن ڈم ہلکر۔ کمکار ٹولی تا زیمی مروک آ علاقہ تیٹ گٹ بندغ آتے کشنگ کن چست ءُ و ریسکیو آپریشن آک تیزی ئٹ برجا ءُ۔

دا بھس کروک آ زمین جمب ہندنو وخت ئسے ٹی بسونے کہ داکان مست ارا تو مالؤ وینزویلا ٹی بروک آ ارا ترند ءُ زمین جمب ملک ئنا کیہی علاقہ تے کچ آن زیات نسخان تسوسر ہرافتیٹی ۶۱۰۰ آن بڑز بندغ کسکوسر۔

کولمبیا نا نائب صدر خوسے مانوئل ریستریپو ابوندانو پارے کہ اوفتا حکومت زمین جمب آن زیمی مروک آ علاقہ و ایلم تا کمک کن کچ آن بڑزا محنت کننگ ئٹی ءِ۔ او پارے کہ حکومت دا تدینی ٹی زیمی مروک آ ہر کمیونٹی تون اوار ءِ و کمکی کاریم تے تیزی ئٹ مونی دریسہ ءِ۔

ایکس (مسکوہی ٹویٹر) آ تینا بیان ئٹی نائب صدر ہمو ملک و جہانی شریک دار آتے منتواری پارے ہراکہ دا سخت انگا وخت ئٹی کولمبیا تون ہم کوپئی کریسہ کمک کننگ نا درشانی کریسر۔

او پارے کہ جہانی ایلم تا پارہ غان رسینگوک آ کمک و حمایت زیمی مروک آ علاقہ غاتا بحالی ٹی بھلو کڑد اس ایتک۔

خوسے مانوئل ریستریپو ابوندانو پارے کہ نن ہمو وخت اسکان آسراتی ٹی تولپنہ ہراتم اسکان دا کمکی گڑاک ہر ہمو خاہوت اسکان سر متنو ہرادے دافتا ضرورت ءِ و ہراتم اسکان دا زیمی مروک آ علاقہ غاتا بحالی کن تینا گچینو کڑد اس سر تتنن۔

او مستی پارے کہ اینو تیبہ جہان کولمبیا نا کم کن دو مریفنگ ءِ ہراکہ دا سخت انگا وخت ئٹی جہانی ایلمی و یکجہتی نا شاھدی ئسے۔

کوئٹہ و کراچی آن پنچ بندغ نا زوراکی ئٹ بیگواہی نا آماچ مننگ نا حوال رسینگانے، ہرافتیٹی اسہ ہفتدہ سال نا خوانندہ اس ہم اوار ءِ، وا اسہ بندغ اس تدوکا ارا سال نا سے بیگواہ ءِ۔

شابیتی حوال آتا رد ئٹ کوئٹہ نا علاقہ کلی الماس ائیرپورٹ روڈ آن دوست محمد نا اودہ سال ئنا خوانندہ غا مار اسفند بلوچ ءِ ۴ اگست ۲۰۲۶ نا سہب ۴ بجہ نا وخت آ پاکستانی ڈھکوک ادارہ غاک آئی ایس آئی ، سی ٹی ڈی و ایم آئی نا کارندہ غاک تینتو دریر، ہراکان پد او بیگواہ ءِ۔

کوئٹہ غان ولدا محمد انور بلوچ نا مار واجد بلوچ ہم زوراکی ئٹ بیگواہی نا آماچ مسونے۔ ۲۷ سال ئنا خوانندہ واجد بلوچ ءِ ۱۰ اگست ۲۰۲۴ نا نن یک بجہ نا وخت قمبرانی روڑ، کشمیر آباد آن سی ٹی ڈی نا کارندہ غاک تینتو درسر، ارا سال گدرینگنگ آن پد ہم اونا باروٹ ہچو معلومداری اس مون آ بننگ کتؤ۔

داکان کراچی نا علاقہ حاجی شاہ علی ٹاؤن شرافی ملیر آن ارا بندغ، صادق نا ۲۶ سال نا مزوری کروک آ مار اسامہ و رشید نا ۲۵ سال نا مزوری کروک آ مار نیاز ءِ یک اگست ۲۰۲۶ نا نن یک و نیم بجہ غئے رینجرز و سی ٹی ڈی نا کارندہ غاک دزگیر کریسہ بیگواہ کریر۔

یندا علاقہ نا اسہ پین بندغ اس، وبدالحمید نا مار شاہد ہم ہندا نن بیگواہی نا آماچ مسک۔ شنبے گوٹھ، شرافی ملیر کراچی نا ہندی شاہد مستری گری کریکہ و اودے ہم ۱ اگست ۲۰۲۶ نا نن یک و نیم آ رینجرز و سی ٹی ڈی نا کارندہ غاک تینتو دریر۔

یات سلے کہ بلوچستان ئٹی زوراکی ئٹ بیگواہی تا ویل و تدینیک ریاستی زورگیری و خلیس آتا سوب آن وخت ئنا زیہا مون آ بفسہ ، ہرانا سوب آن کیہی کیس آک کیہی ہفتہ و کیہی سال تیان پد رپورٹ کننگرہ

۱۱ اگست وخت ءِ پوسکن کروک آ پیمانِ بلوچ نادے نا رد ئٹ بلوچ نیشنل موونٹ نا پارہ غان جرمنی نا شار فرینکفرٹ آؤڈر ئٹی اسہ سیمینار اس ہڈ تننگا۔ ایکان ڈسلڈورف، ہنوفر، و بریمن ئٹی ہم بلوچستان نا رد ئٹ باسمائی دیوان آک ہڈ تننگار۔

بی این ایم نا رد ئٹ باسمائی دیوان نا وخت اولس ءِ بلوچستان نا دیہاڑی پجار، براطانیہ نا نوآبادیاتی دور ئنا ایسری آن پد مروک آ تدینی، بلوچستان نا پاکستان تون زوراکی ئٹ اوار کننگ نا رد ئٹ بلوچ مؤقف و خطہ نا ساڑی سیاسی حالیت آتا بابت ئٹ پاننگا۔ دا وخت آ ساڑی بندغ آک بلوچ راج ئنا پارہ غان آزاتی نا خواست اتون اوار خطہ نا اسٹریٹجک و جغرافیہ نا سیاسی ازرشت آ ہم ہیت کریر۔

فرینکفرٹ اوڑڈئی ئٹی ہڈ ہلوک آ سیمینار ئٹ تران کریسہ کوالخواک پاریر کہ ۱۱ اگست بلوچ راج کن تینا سیاسی ارادہ غاتا پوسکنی، آزاتی نا جہد ئٹی تروک آ قربانی تے یات کننگ، راجی اواری و یکجہتی ءِ سوگؤ کننگ و سیاسی و راجی شعور ءِ شون تننگ کن بھاز اہمیت والو دے ئسے۔

سیمینار ئٹی بی این ایم نابجاہی کمیٹی نا باسک ھمل بلوچ، بی این ایم جرمنی چیپٹر نا کماش اصغر علی و مصطفی شاھوانی تران کریر۔ تران کار آک بلوچستان نا دیہاڑ، آزاتی کن برجا سیاسی جہد و پیشن نا ملک ئٹ تولوک بلوچ آتا زمواری تا زیہا تینا خیال آتا درشانی کریر۔ اوفک دیہاڑی شعور ءِ زندہ تخنگ، بلوچ راجی پجار ءِ سوگؤ کننگ و راجی جہد ئنا حمایت ئٹ بلوچ ڈائسپورہ نا کڑد آ ہم ہیت کریسہ شون تس۔

سیمینار نا وخت آ ۱۱ اگست بلوچستان نا آزاتی، زوراکی ئٹ اواری و مزاحمت نا پاننگپروک آ کسہ نا سرحال ئٹ اسہ کاغدی فلم اس ہم مون آ ہتنگا۔ فلم ئٹی برطانیہ دور حکموت نا وخت و اوکان پد ئنا بلوچستان نا دیہاڑ، آزاتی نا اعلان بابت ئٹ بھلا کسہ غاک، بلوچستان ءِ پاکستان تون زوراکی ئٹ اواری و اوکان پد بش مروک آ مزاحمتی و سیاسی جہد ئنا جاچ اس ہلنگا۔

سیمینار نا ایسری ٹی بلوچ نیشنل موومنٹ نا نظریاتی رہشون شہید غلام محمد بلوچ نا شاعری تیان شپ اسہ بلوچی ٹیبلو اس ہم مون آ اتنگا۔ دا گچین آ ٹیبلو نا وسیلہ ئٹ شہید غلام محمد بلوچ نا سیاسی میراث ءِ سلام پاننگا و مزاحمت قربانی راجی شعور و بلوچ راجی مسخت آن خڑکی نا سرحال آتے بڑزا اتنگا۔

بی این ایم نا رد ئٹ جرمنی ٹی ہڈ ہلوک سیمینار و باسمائی دیوان نا مسخت بلوچستان نا دیہاڑ سیاسی حالیت و بلوچ راجی جہد ئنا باروٹ یورپ نا اولس ئٹی باسمائی ودی کننگ و جہانی پڑ آ بلوچستان نا ویل ئنا بابت ئٹ مخلوق نا ہوش ءِ پریفنگ ئسک۔

پنجگور نا علاقہ چیدگی آن پنچ جون خننگانو ہرافتے چاہنداری و کانودی کاروائی کن ٹیچنگ اسپتال آ دننگا۔

علاقہ نا وسیلہ تا رد ئٹ خننگوک آ جون تیان اسٹ نا چاہنداری کچکول نا مار پیر جان ئٹ مسونے ہرادے ہندا سال ئنا 10 جون آ پاکستانی لشکر زوراکی ئت بیگواہ کریسس۔

وسیلہ تا رد ئٹ ایلو لاشہ غاتا دائسکان چاہنداری مننگ کتنے۔ علاقائی وسیلہ تا پاننگ ءِ کہ خننگوک آ پنچ انگا جون آک ہمو بندغ آتا ءُ ہرا پاکستانی لشکر نا دو تیان زوراکی ئٹ بیگواہی نا اماچ مسوسر، واہم دا رد ئٹ منوک ءُ پین حوال کشنگ و چاہنداری نا عمل برجا ءِ۔

یات سلے کہ ہندا منا سال ئٹی بلوچستان نا جتا جتا انگا ضلع تیان کیہی لاشہ غاتا رسینگنگ نا تدینیک رپورٹ مسنو ہرافتیٹی کیہی تا چاہنداری زوراکی ئٹ بیگواہ مروک آ بندغ آتیان مسونے

بلوچستان نا جتا جتا انگا علاقہ غاتیان زوراکی ئٹ بیگواہی نا آماچ مروک ءُ پن بندغ یلہ مسر

شابیتی حوال آتا رد ئٹ مستونگ آن محمد عارف، بی بی رافعہ و بی بی ندا ءِ 21 جوالائی 2026 آ دزگیر کریسہ بیگواہ کننگاسس ہراکہ 6 اگست 2026 آ مستونگ آن یلہ مسر۔

ہندا وڑ خاران نا ہندی ڈاکٹر احمد خان نا مار مظفر ءِ 7 اگست 2025 آ زوراجی ئٹ بیگواہ کننگاسس، اسہ سال ئسے آن پد 6 اگست 2026 آ کوئٹہ غان یلہ مس۔

ارٹمیکو پارہ غئے حامد نا مار فیضان قمبرانی کوئٹہ نا علاقہ کلی قمبرانی شریف آباد آن بیگواہ مسوسس۔ خاہوت نا رد ئٹ اودے ننکان 3 بجہ غان پد ارا غان ائی ایس آئی، سی ٹی ڈی، ایف سی و سادہ پچ بنوک آ کارندہ غاک تینتو دریسر، محمد فیضان ہم اینو یلہ مس۔

اسہ پک ءُ اندازہ ئسے نا رد ئٹ پنج ہزار آن گیشتر مسکوہی اوغان لشکر آن پاکستانی فوج ئٹ اوار تمانو

ایران نا نیمہ سرکاری میڈیا نا ادارہ تسنیم نا رپورٹ نا رد ئٹ پاکستانی لشکر و انٹیلیجینس ادارہ غاک بلوچستان ئٹی بلوچ آزاتی نا خواہوک آتا برخلاف کاروائی کن حکومت نا حمایتی سلہہ بند ٹولی ءِ استعمال کیرہ و اوغانستان نا مسکوہی سیکیورٹی کارندہ غاتا اسہ بھلو کچ اس دا ٹولی تیتون اوار مسونے۔

شش اگست آ شینک مروک آ دا رپورٹ ئٹی دعویٰ کننگاسس کہ بلوچستان ئٹی بیرہ پِن ئنا لشکر ” ڈیتھ اسکواڈ” پاکستان نا سیکیورٹی ادارہ غاتا مُخ تفی ئٹ چست ءُ و پاکستانی لشکر، سیم سند آتا فوجی لشکر و ملک ئنا انٹیلی جنس ادارہ غاتیتون اوار مریسہ سیکیورٹی آپریشن و جیڑہ تیان جان خلاسی کن تینا کڑد سر ایترہ۔

رپورٹ نا رد ئٹ دا ٹولی پراکسی فورس ئنا وڑٹ کاریم کیک و ریاستی اسٹرکچر ئٹی پک اوار مننگ آن بیدس پاکستان سیکیورٹی کاروائی تیٹی بشخ ہلیرہ۔

رپورٹ ئٹی مستی دعویٰ کننگاسس کہ اوغانستان نا مسکوہی سیکورٹی کارندہ غاتا اسہ بھلو کچ اس ہرافک کہ 2021 ئٹی جمہوری حکومت نا ایسری آن پد اوغانستان ءِ ہلاسر، پاکستان نا سیکورٹی ادارہ و پن ئنا سلہہ بند ٹولی ڈیتھ اسکواڈ ئٹی اوار مسنو۔ دا بندغ آتا بھرتی نا سوب آتیٹی فوجی تربیت، جنگی تجربہ سیم تیا کاروائی تیان واخب مننگ پاننگک۔

رپورٹ ئٹی پاننگا کہ مسکوہی اوغان کارندہ غاتے استعمال کننگ آن پاکستان نا حمایت رسینگوک آ سلہہ بند گل آتے دا وارخواہی رسینگک کہ او تینا سیکورٹی لشکر آتا کچ ئٹہ ودوکی کننگ آن بیدس تجربہ کروک آ بندغ آتیان نفہ ارفر۔

دا میڈیا رپورٹ ئٹی مستی دعوی کننگانے کہ مسکوہی اوغان کارندہ تا بنداوی است خواہی مال و مڈی دوہی کننگ و زند گوازیفنگ ءِ۔

سلہہ بند بندغ آک پولیس کارندہ تا دو تے تفیر و سرکاری سلہہ تے پلار

بلوچستان نا بنجاہی شار کوئٹہ غان حوال آتا رد ئٹ استو قمبرانی روڑ آ سلہہ بند بندغ آک پولیس نا ایگل اسکواڈ نا کارندہ غاتے دزگیر کننگ آن پد اوفتا سلہہ تے زفت کریر۔

حوال آتا رد ئٹ ہندا وخت سم کاری آن اسہ بندغ اس مچٹ ٹپی مس، سلہہ بند بندغ آک لشکر نا دو تے تفیسہ اوفتا سرکاری سلہہ تے تینتو دریر۔

یات سلے کہ کوئٹہ ٹی سیکورٹی تھریٹ الرٹ شینک کننگ آن پد تیبہ شار ئٹی درزن آتا کچ ایف سی و پولیس کارندہ غاک خوائنفنگانو، پولیس بلوچ لبریشن آرمی نا پارہ غان شار ءِ ٹک کننگ نا خلیس نا درشانی ءِ ہم کرینے۔

پولیس نا رد ئٹ بلوچ لبریشن آرمی نا چار ہزار جنگول، ہرافتیٹی مجید بریگیڈ نا جند ندر جلہوکار ہم اوار مرور، 14 اگست نا وخت شار ءِ کوزہ کننگ کریسہ سرکاری ماڑی و سیکیورٹی لشکر تے ٹک کننگ کیرہ۔

یات سلے کہ تیوہ غا بلوچستان ئٹی بلوچ آزاتی کن سلہہ بند گل آک پولیس آن سلہہ پلنگ ئٹی اوار مسنو، ولے دا تدینی نا زمواری ءِ دائسکان ہچو ٹولی اس ارفتنے۔

کوئٹہ ٹی ناگمان موبائل نیٹ ورک و موبائل انٹرنیٹ بند کننگا، دافتا بندی نا رد ئٹ دائسکان سروک آتا پارہ غان ہچو خاص وڑ ئنا بیان و سوب اس مون آ بتنے۔

موبائل فون و انٹرنیٹ بیرہ کوئٹہ آخہ بلکن چمن، پشین، قلعہ سیف اللہ، لورالائی، سبی ، بارکھان، نصیر آباد، مستونگ، قلات، سوراب، حب و گوادر تون اوار بلوچستان نا کیہی پین ہم ضلع تیٹ بند ءِ۔

یات سلے کہ داکان مالو صوبہ نا سروک سیکورٹی خلیس آتا سوب آن بلوچستان نا جتا جتا انگا بھلا شار تیٹ کرفیو خلکونے، کیہی شار تیٹ دکان و بازار آتے شام ئنا 6 بجہ غئے بند کننگ نا حکم تسونے۔

کوئٹہ شار ئٹی پولیس بلوچ لبریشن آرمی نا پارہ غان جلہو آتا خلیس نا سوب آن پین گیشتر کارندہ خوائیفنگانے، تربت ئٹی تو دفع 144 خلنگانے۔

بلوچستان نا ضلع کیچ ئٹی فوج کشی گٹ کارندہ غاتے سلہہ بندغ بندغ آک جلہو اسیٹی ٹک کرینو۔

بلیدہ نا علاقہ گردانک و داپار ایپار ئٹ پاکستانی لشکر اینو سہب ئنا آپریشن نا بنا کرے ہراٹی ہیادہ ہنوک کارندہ تا بھلو کچ اس بشخ ہلنگ ئسک و کواڈ کاپٹر تیٹ کیہی جاگہ تیا گولہ خسنگ نا حوال اس ہم اریر۔

آپریشن ئٹی گٹ پاکستانی لشکر نا کارندہ غاتیا سنگر ہلوک سلہہ بند بندغ آک جلہو کریسہ ٹک کرینو ہراٹی پاکستانی لشکر ءِ جانی نسخان ارفنگ نا حوال رسینگانے۔ کوالخواک دائسکان دا رد ئٹ ہچو شابیت حوال اس تتنو۔

یات سلے کہ درو ہم ہندا علاقہ ٹی پاکستانی لشکر نا کاروان ئٹی ساڑی اسہ لاری ئسے نادرست بندغ آک بمب تراک اسیٹی ٹک کریسر، ہراٹی لاری نا پورہ بھس مننگ و لشکر ءِ بھلو جون و مڈی تا نسخان ارفنگ نا حوال رسینگاسس۔