سوئی گیس سروک آتا رد ئٹ تراک آن پد کوئٹہ نا جتا جتا انگا جاگہ تیتون اوار کولپور، مچھ، مستونگ، قلات، پشین و زیارت ئٹی گیس نا سپلائی سلیسونے۔
ہندی وسیلہ تا رد ئٹ تراک نا جاگہ غئے گیس پیپ آن خاخر نا زراب آ پیشن مریسہ ءُ۔ تراک پیپ لین نا وال آ مسک، وال بنجاہی کسر آن ہشت سد میٹر ایپار ءِ۔
یات سلے کہ بلوچستان نا علاقہ بولان تون اوار ایلو علاقہ تیٹ گیس پیپ لین و سرکاری و عسکری مڈی تے ہروخت بلوچستان ئٹ کاریم کروک آ سلہہ بند آزاتی خواہوک آ تنطیم آک ٹک کریسہ کرینو۔
جمیعت وکلا فورم پاکستان نا بنجاہی صدر سینیٹر کامران مرتضیٰ ایڈووکیٹ پارے کہ سوراب نا وعلاقہ گدر ئٹی پاکستانی لشکر نا جیٹ بالی تا بمباری ٹی ۸ آن ود بندغ نا کہنگ نا حوال آ سخت افسوز ءِ ۔
سینیٹر کامران مرتضیٰ پارے کہ اگہ شاری آباتی تیا جیٹ آتیٹ بمباری کننگانے گڑا دا بھاز خراب ءُ معاملہ ئسے، حکومت زوت آن زوت تدینی نا زی آ پام کریسہ گواچن ءِ اولس نا مون آ ہتے۔
او پارے کہ شار والا تا جان و مڈی تا رکھ ریاست نا بنداوی زمواری ءِ، آپریشن نا وخت شار تا آباتی تے ٹک کننگ آن رکھ اکن گامگیچ کننگے۔
سینیٹر کامران خواست کرے کہ گدر تدینی نا نلہ و غیر جانبداری ءُ پٹ پول اس کننگ مرے، کہوک و ٹپی مروک آتا باروٹ سہی معلومداری تننگے و زیمی مروک آ خاہوت آتے زوت کمک تننگ مرے۔
او پارے کہ بے گناہ لس مخلوق نا جون تا پوک مننگ ہچ وڑٹ قبول اف، حکومت ءِ دننگا تدینی تا تورنگ کن زوت گچینو گام گیچ کروئی تمک۔
سلہہ بند بندغ آک مائننگ کمپنی نا سائٹ ءِ ٹک کریر و کاریم کروک آ ٹولی ءِ تینتون دریر۔
شابیتی حوال آتا رد ئٹ بلوچستان نا ضلع چاغی نا علاقہ ماہیان کور ئٹی سلہہ بند بندغ آک غیر سرکاری مائننگ کمپنی نا مائن تیا جلہو کریسہ سائٹ آ ساڑی لاکھ آ روپئی تا مڈی تے تینا کوزہ ٹی ہلکر۔
حوال آتا رد ئٹ دا وخت سلہہ بند بندغ آک سائٹ آ ساڑی مائننگ کمپنی نا ہفت کاریمی تے ہم دزگیر کریسہ بے ڈس ءُ جاگہ اس دریر۔
برمتہ مروک آ بندغ آتیٹی گلگت ناچار مزور وجاہت، واجد، شاہد و صابر ایلو پارہ غئے ہندی جاگہ نا مسہ مزوردالبندین نا ہندی ضیاالدین ، ماہیان ئٹ تولوک شاہ سلیم و سعید محمد اوار ئسر۔
وسیلہ تا رد ئٹ سلہہ بند بندغ آک کیہی گھنٹہ اسکان سائٹ آ ساڑی ئسر واہم پاکستانی لشکر کاروائی کننگ ئٹ سرسہب متو، سلہہ بند بندغ آک مائن آ ساڑی اسہ زمباد لاری، اسہ فور بائی فور پک اپ، ۲۰ آن ود سولر پلیٹ و موٹر سائیکل تیتون اوار پین مڈی ہم تینا کوزہ ٹی ہلکر۔
چاغئے پولیس نا رد ئٹ تدینی آن پد انتظامیہ نا پارہ غان پین کاروائی و برمتہ مروک آتے یلہ کرفنگ کن کوششست برجا ءِ۔
سوراب گدر گوندان ئٹی ۱۲ اگست آ پاکستانی جیٹ تا بمباری ٹی نیاڑی تیتون اوار ۲۰ آن بڑزا بندغ کسکرو ۱۶ ٹپی مسر۔ ٹپی و کہوک آ بندغ آتے پولیس و یندی مخلوق ڈی ایچ کیو ہسپتال سوراب آسر کریر ہراڑے اوفتے جانجوڑی کن کمک تننگ ئٹی ءُ۔
وسیلہ تا رد ئٹ کہیوک آتیٹی نیاڑی چنا و نرینہ غاک اوار ءُ۔ کہوک آتا چاہنداری رسول بشخ نا زائیفہ راج بی بی، نور خان نا زائیفہ صفیہ، جلال نا ۲ سال نا مار جلال، خداداد نا مار شبیر احمد، رسول بخش نا مار نور جان و رسول بخش نا مار کریم داد نا پن تیٹ مسونے۔
ٹپی آ تیٹی ۹ نرینہ و۲ نیاڑی و ہفت چنکو چنا مار و مسڑ اوار ءُ۔ ٹپی آ چنا تیٹی اسہ سال نا عاصم، مسہ سال نا رجیبہ، پنچ سال نا سادیہ، ہفت سال نا فاطمہ، ارا سال نا ضیاالرحمن ، اسہ سال نا امیر جان و چار سال نا حسینہ اوار ءُ۔
ہندی مخلوق نا پارہ غان کہوک آتا کچ داکان ہم گیشتر مننگ نا دعویٰ ہم کننگانے، تدینی آن سیکیورٹی سروک آتا پارہ غان دائسکان ہچ وڑ ئنا خاص ءُ گڑاس مون آ بتنے۔
تدینی آن پد کہوک آتا خاہوت آک و ہندی مخلوق جون تے سوراب بھلا چوک این ۲۵ آ ٹخیسہ کوئٹہ کراچی بنجاہی کسر آ تخیسہ برانز نا بنا کریر۔کسر نا زی آ ٹریفک نا ہن و بر زیمی مس و ہڑتوما پارہ غان لاری تا مرغنو رد آ لگار۔ برانز کروک آ خواست آتا امنائی اسکان برانز ءِ برجا تخنگ نا اعلان کریر۔
تدینی آ بلوچ یکجہتی کمیٹی سخت رد عمل نا درشانی کریسہ شاری آباتی و خاص کر نیاڑی و چنا تا کہنگ آ است ہسونی نا درشانی کرے و زموار آتا گٹ ئٹ ہلنگ نا خواست ہم کرے۔
ایلو پارہ غان بلوچستان نیشنل پارٹی نا سروک سردار اختر مینگل تدینی نا زی آ رد عمل تریسہ سوج کرے کہ انت چناک ہم شدت پسند خننگرہ؟ او پارے کہ دا معصوم ءُ چنا ءُ، دافتا انت ڈوءِ۔ انت چنا تے خلنگ آن وخت اس ایمنی بننگ کیک؟
سردار اختر مینگل مستی پارے کہ انت دا فلسطین ءِ؟ انت دا کشمیر ءِ؟ آخا دا بلوچستان ءِ۔
سوشل میڈیا نا تلہ ایکس آ تینا ردعمل ئٹی ساجد ترین اوڈوکیٹ ہم سوراب ئٹی بالی گراب آتا جلہو آتیٹی نیاڑی و چنا تیتون اوار ۲۷ بندغ نا کہنگ نا دعویٰ ءِ افسوز و شکی گری اس پاریسہ زیمی مروک آ خاہوت آتیتون اواری نا درشانی ءِ کرے۔
بلوچستان نا جتا جتا انگا علاقہ تیٹ سلہہ بند جلہو و سمکاری نا تدینی تا حوال رسینگانے، ہرافتیٹی پولیس تھانہ، پاکستانی لشکر نا چوکی و لاری تے ٹک کننگ نا حوال ارے۔
پولیس وسیلہ تا رد ئٹ چاغئے نا علاقہ چہتر ئٹی نادرست بندغ آک شورہ تا وسیلہ ئٹ پولیس تھانہ ءِ بھس کریر۔ وسیلہ تا رد ئٹ تراک استو کننگا ہراٹی تھانہ نا ماڑی پورہ بھس مریسہ مش ئنا ڈھیر اس جوڑ مس۔
ایلو پارہ غئے پدا چاغئے نا علاقہ یک مچ ئٹی ہم سلہہ بند بندغ آتا پارہ غان مہ واپاری نا لاری تیان سمکاری نا حوال آک اریر۔
وسیلہ تا رد ئٹ سمکاری ٹی لاریک بھس مسر، و جلہو کار آک اسہ مڈی ڈہوکو لاری ئسے تینتون دریر۔
خضدار نا علاقہ وڈھ ئٹی آر سی ڈی کسر نا زی آ ہم پاکستانی لشکر ناا ارا لاری تے سلہہ بند جلہو ئٹی ٹک کننگ نا حوال ارے۔ وسیلہ تا رد ئٹ لاری تیٹی اسہ بکتر بند لاری اس ہم اوار ئس و جلہو ئٹی ہڑتوما لاری تے بھاز نسخان مس۔ وسیلہ غاک فوجی کارندہ غاتا کہنگ نا ہم دعویٰ کرینو، واہم دا کہوک آتا سرکاری حوالہ ئٹ منوک حواک بتنے۔
داکان درو منگچر نا بنجاہی بازار ئٹی پاکستانی لشکر نا اسہ چوکی ئسے آ سلہہ بند بندغ آتا جلہو نا حواک مون آ بسونے۔ علاقائی وسیلہ تا رد ئٹ جلہو ارے اسکان برجا ئسک ہرا وخت علاقہ ٹی ٹیٹ سمکاری و بمب آتا توار آک بننگار۔ جلہو ئٹی پاکستانی لشکر ءِ جون تا نسخان رسینگنگ نا دعویٰ کننگانے، واہم دا رد ئٹ سرکار نا نیمہ غان ہچو حوال اس مون آ بتنے۔
داکان بیدس استو جھاؤ نا علاقہ ڈولیجی ٹی ہم پاکستانی لشکر نا اسہ کیمپ ئسے سلہہ بند جلہو ئسے ٹی ٹک کننگ نا حوال ارے۔
دا کل تدینی تا زمواری ءِ دائسکان کسس ہم ارفتنے۔
بلوچستان نا ضلع کیچ ئنا علاقہ بلیدہ سوراپ ئٹی درے ننکان نادرست سلہہ بندغ بندغ آتا پارہ غان جلہو ئٹی مسلم جیئند تون اوار کم و ود چار بدغ ٹپی مسوسر، گڈ سر ئٹ مسلم جیئند ٹپ آتا تاب اتپریسہ کسک۔
ہندی وسیلہ تا رد ئٹ جلہو شام ئنا وخت آ مس ہرانا وخت آ علاقہ ٹی تراک و ترند فائرنگ آتا توار بننگا۔ وسیلہ تا رد ئٹ سلہہ بند بندغ آک مسلم جیئند نا وتاخ ءِ ٹک کریر ہراڑے ہمو وخت ایلو بندغ آک ہم ساڑی ئسر۔
جلہو ئٹی مسلم جیئند و کم و ود مسہ بندغ ٹپی مسوسر، بنائی حوال آتا وخت ٹپی تا بابت ئٹ ہچو شابیتی حوال اس مون آ بننگ کتؤ، واہم پد آن ہندی وسیلہ غاک امنا کریر کہ مسلم جیئند ٹپ آتا تاب ءِ توپریسہ کسکونے۔
ہندی وسیلہ تا رد ئٹ مسلم جیئند مست اسہ بلوچ سلہہ بند تنظیم ئسے تون اوار مسوسس، واہم پدا او سلہہ بٹیسُس۔ وسیلہ غا تا مستی دعویٰ ءِ کہ او دا وخت ہندی مخلوق ئٹ ڈیتھ اسکواڈ نا پن ئٹ درست مروک اسہ سلہہ بند ٹولی ئسے نا کالخواہی ءِ کننگ ئٹی ئسک ہرانا کاٹم آ پاکستانی لشکر نا دو ئسک۔
واہم تدینی نا سوب و ایلو ٹپی آتا ساڑی حالیت نا بابت ئٹ پین معلومداری مننگ ئٹی افک و جلہو نا زمواری ہم دائسکان ہچ کس ئنا پارہ غان ارفنگتنے۔
زوراکی ئٹ بیگواہی تا برخلاف وائس فار مسنگ پرسنز (وی بی ایم پی) نا برانزی کیمپ کوئٹہ پریس کلب نا مون آ ۶۳۲۴ میکو دے ہم برجا۔
دسمبر ۲۰۲۵ ئٹی کلی قمبرانی کوئٹہ غان پاکستانی لشکر نا دو آن زوراکی ئٹ بیگواہ مروک بیبرگ قمبرانی نا خاہوت برانزی کیمپ ئٹی اوار مس و تینا برانزی رپورٹ ءِ رکارڈ کرفسہ بیبرگ بلوچ نا سلامتی ٹی یلہ مننگ نا خواست کرے۔
وی بی ایم پی نا چیئرمین نصراللہ بلوچ پارے کہ قاضی محمد عمر نیچاری و محمد سدیس لانگو نا کیس آک بیگواہ مروک آ بندغ آتا رد ئٹ جوڑ مروک آ کمیشن و صوبائی حکومت ءِ تننگانو۔
او پاریر کہ قاضی محمد عمر نیچاری ءِ ۲۹ و ۳۰ جولائی نا نیامیکو نن پاو کم مسہ بجہ غئے کلی نیچاری سمنگی روڑ سوئی گیس دفتر نا خڑک کوئٹہ غان پاکستانی لشکر دزگیر کریسہ زوراکی ئٹ بیگوای کرے۔
ہندا وڑ محمد سدیس لانگو ءِ ۱۹ و ۲۰ مئی نا نیامیکو نن نا سئے و نیم بجہ غئے محلہ لانگو آباد مدرسہ روڑ کلی اسمائیل کوئٹہ غان ملک ئنا ادارہ تا کارندہ غاک دزگیر کریسہ بے ڈس ءُ جاگہ سے آ دریر۔
نصراللہ بلوچ حکومت آن خواست کرے کہ بیبرگ قمبرانی بلوچ، قاضی محمد عمر نیچاری بلوچ، محمد سدیس لانگو بلوچ تون اوار کل بیگواہ غا بندغ تے یلہ کرفنگے۔ اگہ اوفتا برخلاف دوبہ گڑاس ارے تو اوفتے عدالت ئٹی اتنگے تانکہ اوفتے تینا رکھ ئنا کانودی حق دوئی مرے و اوفتا خاہوت آتے ا اوفتا بندغ آتا زوراکی ئٹ بیگواہی نا اذیت آن خلاسی رسینگے۔
بی آر جی نا ترجمان دوستین بلوچ شینک کروک بیان ئٹی پارے کہ 9 اگست آ بلوچ ریپبلیکن گارڈز نا سرمچار آک بلوچستان نا ضلع کچھی نا علاقہ ڈھاڈر ئٹی کوزہ گیر پاکستانی ریاست نا پارہ غان بلوچستان نا زراعت ءِ بھس کروک اسہ زراعتی دفتر ئسے بارودی مواد آتیٹ ٹک کریر۔
سروک نا رد ئٹ بمب تراک ئٹی دفتر ءِ سخت نسخان رسینگا۔
بی آر جی نا سروک نا رد ئٹ درے ننکان بلوچ ریپبلکن گارڈز نا سرمچار آک سندھ نا ضلع شکار پور آن خڑک بجلی ٹاور ئسے بمب تراک ئٹ بھس کننگا۔ دا تراک ئٹی ارا ٹاور ءِ سخت بھاز نسخان رسینگا۔
سروک مستی پارے کہ جلہو تا زمواری ءِ ننا تنظیم ارفک ارفک و دننگا پین ہم کاروائیک بلوچستان نا آزات مننگ اسکان برجا مرور۔
پاکستانی لشکر پنجگور ئٹی آپریشن نا وخت آ پنچ سلہہ بند بندغ آتے کسفینے، وزیر داخلہ محسن نقوی نا میڈیا تون تران۔
پاکستانی وزیر داخلہ محسن نقوی میڈیا تون تران کریسہ پارے کہ بلوچستان نا علاقہ پنجگور ٹی پاکستانی لشکر نا کاروائی نا وخت آ اسہ سلہہ بند گل ئسے نا سروک ئسے تون اوار پنچ سلہہ بند بندغ آتے خلنگانے۔
وزیر داخلہ دعویٰ کرے کہ پاکستانی لشکر بلوچستان ئٹی سلہہ بند گل آتا برخلاف سوگؤ ءِ و سرسہب ءُ کاروائی کننگ ئٹی ءِ۔
یات سلے کہ درو بلوچستان نا ضلع پنجگور نا علاقہ چیدگی آن پنچ بندغ نا جون آک خننگاسر، ہرافتیٹی مسٹ نا شناخت کچکول نا مار پیر جان، شربت و حافظ مدثر نا پن ئٹ مسونے۔
حوال آتا رد ئٹ شعیب بلوچ ءِ ۸ فروری ۲۰۲۳، پیر جان ءِ ہندا سال ۱۰ جون آ پاکستانی لشکر زوراکی ئٹ بیگواہ کریسر ہراکان پد دائسکان او مون آ بننگپاش مننگ کتور۔
خننگوک آ ایلو لاشہ تے دائسکان درست کننگتنے، علاقہ نا مخلوق خلیس نا درشانی کرینو کہ پنچ لاشہ غاک ہمو بندغ آتا ءُ ہرافک پاکستانی لشکر نا دو آن بیگواہ ی نا گواچی مسوسر۔
یات سلے کہ دا اولیکو وار افک کہ پاکستانی لشکر مست آن دزگیر کروک بیگواہ غا بندغ آتے کسفنگ آن پد آپریشن یا جنگ آتیٹی خلنگ نا دعویٰ کرینو۔
ہندا منہ سال ئٹی بلوچستان نا جتا جتا انگا ضلع غاتیان کیہی جون آتا رسینگنگ نا تدینیک رپورٹ مسنو ہرافتیٹی بھاز آتا شناخت مالؤ آن زوراکی ئٹ بیگواہ مروک آ بندغ آتیان مسونے۔
دا تدینی تیان ہندی و جہانی بندغی حق آتا گل آک خلیس نا درشانی کریسہ پاکستانی حکومت آن خواست کرینو کہ او زوراکی ئٹ بیگواہ غا بندغ آتے عدالت آتیتی اتے و اوفتے انصاف نا زیہا مروک آ ٹرائل تا وارخواہی ایتے۔
بلوچستان نا علاقہ بولان ئٹی پنجرہ پول ئنا خڑک آ دراز بیٹ چیک پوسٹ آ آئی ای ڈی جلہو، ہراٹی جان و مڈی تا نسخان نا حوال ارے۔
وسیلہ تا رد ئٹ سلہہ بند بندغ آک چیک پوسٹ ءِ بمب تراک ئسے ٹی نسخان تسر، واہم سکری سروک آتا پارہ غان دائسکان ہچو گڑاس مون آ بتنے۔
یات سلے کہ ہندا علاقہ ٹی بلوچ آزاتی دوست تخوک سلہہ بند تنظیم آک چست ءُ، ہرافتا پارہ غان پاکستانی لشکر تون اوار مڈی ڈوہوکا لاری تے ہم ٹک کننگانے۔
دا جلہو نا ذمہ واری ءِ یونائیٹڈ بلوچ آرمی (یو بی اے) ارفے۔
