تربت ئٹ سلہہ بند بندغ آک سم کاری کریسہ اسہ بندغ ئسے کسفیر ۔ سم کاری نا تدینی تربت نا علاقہ لال جان کالونی تربت ئٹ مس ۔
علاقائی ذرائع نا ردئٹ موٹر سائیکل آ سوار سلہہ بند بندغ آتا سم کاری آن کہوک بندغ نا چاہنداری ریاض ولد یار محمد سکنہ پنجگور نا پن آن مسونے ۔
ذرائع نا ردئٹ کسفنگوک او وخت زراعت کالونی ٹی ہندی ئس ۔
تربت پولیس تدینی نا پک ءِ کریسہ پارینے کہ پولیس ڈوہدار نا پٹ و پول ئٹ ءِ۔ واہم تدینی نا سوب آک دسکان سما تمتنو۔
پاکستانی وزیر داخلہ پشتون تحفظ موومنٹ (پی ٹی ایم) آ رکھ خلنگ نا پڑو کرینے۔
وزیر داخلہ نا پارہ غان اینو شینک مروک نوٹیفکیشن ئٹ پاننگانے کہ ’پک شاہدی تا روشنائی ٹی پشتون تحفظ موومنٹ آ رکھ خلنگ نا فیصلہ کننگانے۔‘
وزیر داخلہ نا پارہ غان شینک مروک نوٹیفکیشن ئٹ پاننگانے کہ ’پی ٹی ایم ملک دژمن بیانیہ و انارکی تالان کننگ ئٹ اوار ءِ‘
وزیر داخلہ پی ٹی ایم آ رکھ ئنا نوٹیفکیشن باقاعدہ شینک کرینے ہراڑان پد اوڑا عملدرآمد کننگو۔
واہم پی ٹی ایم نا پاننگ ءِ کہ اونا کور کمیٹی نا مجلس برجاء ءِ ہراڑان پد دا معاملہ غا باقاعدہ بیان شینک کننگو۔
اِرا دے مالو چار اکتوبر آ پشاور ہائی کورٹ پی ٹی ایم نا پارہ غان ضلع خیبر ئٹ پک مروک ’راجی جرگہ‘ نا بابت پاریسس کہ ’جرگہ ءِ اِلیبو مرے اوکان پد ہرینہ کہ دا انت کیرہ۔‘
’راجی جرگہ‘ نا برخلاف دائر خواست ئنا پیشی جمعہ غا پشاور ہائی کورٹ نا جسٹس سید ارشد علی و جسٹس وقار احمد آ تالان اِرا باسکی بینچ کریسس۔
پی ٹی ایم نا ’راجی جرگہ‘ نا برخلاف ضلع خیبر نا ہندی خاطراللہ پشاور ہائی کورٹ ئٹ خواست دائر کرینے ہراٹی جرگہ ءِ توننگ نا خواست کننگانے۔
خواست گار نا ہیت ئس کہ پاکستان جوڑ مننگ آن پد ڈیہہ ئٹ عدالت آک ساڑی ءُ و ضلع تیٹ ہم عدالت آک ٹہفنگانو۔
’پی ٹی ایم نسل پرستی ءِ تالان کریسہ ضلع خیبر ئٹ ’پشتون نیشنل کورٹ‘ نا پن ئٹ متوازی عدالت اس ٹہفنگ خوائک ہرانا دعوت نامہ غاک ہم شینک کننگانو۔‘
خواست گار نا پاننگ ئس کہ ’جرگہ و پنچایت آتا فیصلہ بے بندغی سزا تیا مریک اندا خاطر عدالت پی ٹی ایم نا 11 اکتوبر نا جرگہ ءِ تورے۔‘
داڑان مالو یکم اکتوبر آ پی ٹی ایم نا پاننگ ئس کہ سئے شمبے نا نن پشاور پولیس ضلع خیبر نا علاقہ جمرود ئٹ ’پشتون راجی جرگہ‘ نا جلسہ جاہ غا چھاپہ خلک اندن پدان پولیس و پی ٹی ایم نا باسک آتا نیام ئٹ جھڑپ آک ہم مسر۔
پی ٹی ایم نا سروک منظور پشتین تینا شینک کروک اسہ بیان اسیٹی دعویٰ کریسس کہ پشاور پولیس نا چھاپہ نا وخت آ سم کاری و شیلنگ ہم کننگانے ہراڑان کیہی باسک آک ٹپی مسنو اندن خیمہ غاک ہم کشنگانو۔
منظور پشتین نا بیان ئٹ پاننگا کہ اوکان پد جرگہ نا بست و بند کروک آک خیمہ تے دوارہ خلکوسر ہرافتیا پدان پولیس گمانی شیلنگ و سم کاری کرے، ہرانا ویڈیو آک ہم سوشل میڈیا غا ئسر۔
پی ٹی ایم 11 اکتوبر آ ضلع خیبر ئٹ تیوہ صوبہ ٹی برجاء بد امنی نا برخلاف ’پشتون راجی جرگہ/عدالت‘ نا پن ئٹ اسہ جرگہ اس اڈ تننگ نا ڈٹ بندی کریسس۔
دا جرگہ کن خیبر پختونخوا و بلوچستان آن غٹ سیاسی جماعت آتا راہشون، راج دوست و ایلو جتا راہشون تے اوار مننگ نا دعوت تننگاسس۔
دا جرگہ مُسہ دے برجاء مننگ ئس ہراڑکن باقاعدہ شیڈول نا ہم پڑو تننگاسس ہراٹی ہر مُسہ دے خوائفنگوک جرگہ نا باسک آتا پارہ غان جتا نشست آک مرور و او علاقہ نا ویل آتیا ہیت کرور۔
جرگہ کن خیبر نا علاقہ ریگی للمہ ئٹ خیمہ خلنگاسس۔
منظور پشتین چھاپہ آن پد شینک کروک بیان ئٹ پاریسس کہ ’جہان نا غٹ طاغت آک اوار مریسہ ہم ننا جرگہ ءِ بے سہب کننگ کپسہ و نن جرگہ کرون۔‘
او پاریسس کہ ’غٹ باسک آک سامان و بیرم تیتون اوار جرگہ جاہ غا سر مریر و پولیس نا پارہ غان چھاپہ نا ترند مذمت کینہ۔ پولیس بھاز آ ناجوڑ باسک آتے ہم دزگیر کرینے۔‘
منظور پشتین نا ردئٹ: ’نن جرگہ پشتون ڈیہہ ئٹ بد امنی ءِ توننگ کن کننگ اُن ولے لج ئنا ہیت ئسے کہ نن نعرہ خلینہ کہ الس و پولیس اسٹ ءُ ولے پولیس جرگہ نا بست و بند کروک آتیا ہمو وخت چھاپہ خلک ہراتم او خاچوک ئسر۔‘
فرانس نا صدر ایمانوئیل میکرون اسرائیل ءِ سلہہ تننگ ءِ بند کننگ نا خواست کرے۔
غزہ نا حالیت آ میڈیا تون ہیت کرسہ فرانس نا صدر ایمانوئیل میکرون نا پاننگ ئس کہ ساڑی آ حالیت ئٹی ننے سیاسی حل ئنا کنڈ آ ہننگ بکار ءِ۔
ایمانوئیل میکرون نا پاننگ ئس کہ غزہ ٹی جنگ کن اسرائیل ءِ سلہہ تننگ آ رکھ خلنگ ءِ ترجیح تروئی تمو، فرانس اسرائیل ءِ ہچ وڑ ئنا سلہہ تفرو۔
فرانس نا صدر نا بیان آ اسرائیلی وزیر اعظم نیتن یاہو پارے کہ اودے تینا دا بیان آ لج برے، اسرائیل اوفتا سلہہ تیان بیدس دہشت گردی نا برخلاف جنگ ءِ کھٹو۔
ضلع مستونگ آن پاکستانی فورسز نا دوتیان زوراکی ئٹ بیگواہ کننگوک ارا بندغ آجو کننگار ۔
شابیت حوال تا ردئٹ آجو کننگوک اسہ بندغ ئسے نا چاہنداری مستونگ نا ہندی حافظ محمد اسحاق نا پن آن مسونے ۔
پن کروک بندغ ءِ 17 اکتوبر 2023 ٹی فورسز کارندہ غاک دزگیر کریسر ۔
بیگواہ کننگوک بندغ سرکاری ملازم و معلم القرآن ئسے ہرادے داکان مالو ہم زوراکی ئٹ بیگواہ کننگاسس ۔
اندن اسہ پین بندغ ئس فہیم ولد کمال خان ءِ ہم اسہ سال مالو پاکستانی فورسز کارندہ غاک بیگواہ کریسر او ہم آجو مریسہ اُرا ءِ رسینگا ۔
ضلع کیچ ئنا بنجاہی شار تربت ئٹ سلہہ بند بندغ آک ایف سی ہیڈ کوارٹر ءِ جلہو ئٹ ٹِک کریر۔
حوال تا رد ئٹ نیم روچ نا وخت آ تربت شار ئٹ ٹہیفوک ایف سی ہیڈ کوارٹر آ سلہہ بند بندغ آک جلہو کریر۔کیمپ ئنا تہٹی ہشت آن زیات تراک آتا توارک بننگار۔
جلہو ئٹ فورسز ءِ نسخان ارفنگ نا حوال ءِ واہم کالخواہ تا ہیت دائسکان مونا بتنے۔
جلہو نا ذمہ داری ءِ بلوچستان لبریشن فرنٹ ارفینے۔
پاکستانی لشکر چیک پوسٹ آن اِرا بندغ زوراکی ئٹ بیگواہ کرے۔
بلوچستان نا دریابی علاقہ گوادر آن پاکستانی لشکر دورو کنڈگ چیک پوسٹ آن اِرا بندغ ءِ دزگیر کننگ آن گڈ بے ڈس ءُ ہند ئسے آ درے۔
پن کروک آ بندغ آتا چاہنداری شعیب ولد مراد محمد دشت ئنا ہندی و کمال ولد حاجی داد محمد دشت ئنا ہندی نا پن تیٹ مسنو۔
پن کروک بندغ آتے ہمو وخت آ دزگیر کننگا ہراتم اوفک تینا اُرا نا پارہ غا سفر کننگ ئسر۔
یاتی مرے کہ تدوکا کہیی دے تیان دشت و گوادر نا علاقہ غاک فوجی آپریشن آتا دک ئٹی ءُ ہراڑے آباتی تیا چھاپہ خلنگانے وختس کہ زوراکی ئٹ بیگوائی تا تدینی ہم رپورٹ مسنے۔
نیامئی قطب آ جنگ ئنا جھمرک – ٹی بی پی سرگپ
اِرا اکتوبر نا نن ایران بھلو کچ ئسے آ بیلسٹک میزائل آتیٹ اسرائیل آ جلہو کرے۔ ایران نا پاننگ ءِ کہ اسرائیل نا فوجی تنصیبات آتے ٹک کننگانے و دا جلہو حماس نا سروک اسماعیل ہنیہ، حزب اللہ نا سیکریٹری جنرل حسن نصراللہ و بریگیڈیئر نیلفروشان نا کسفنگ نا ورندی ٹی کننگانے و پاسداران انقلاب تڑی تسنے کہ اگہ اسرائیل ایرانی مفاد آتیا ورندی جلہو کرے، گڑا بروکا جلہو داڑان ہم ترند مرو۔ اسرائیل ایرانی میزائل جلہو آتا ورندی ٹی جلہو نا پڑو کرینے۔
ہفت اکتوبر اِرا ہزار بیست و سئے آ حماس نا اسرائیل آ جلہو تیان پد ہی نیامئی قطب آ جنگ ئنا جھمرک تفیسر ولے یکم اپریل اِرا ہزار بیست و چار آ اسرائیل شام ئنا بنجاہی شار دمشق ئٹ ایرانی سفارت خانہ غا جلہو کرے، ہراٹی بریگیڈیئر محمد رضا زاہدی و ایلو آفیسر آک خلنگار، ہرانا ورندی ٹی چانڑدہ اپریل آ ایران اولیکو وار سیدھا اسرائیل آ میزائل و ڈرون جلہو کرے و ہڑتوم آ ڈیہک جنگ ئنا کرّک آ بسر ولے جہانی طاغت آتا کوشست آتیٹ جنگ توننگا۔
ایران نا بنجاہی شار تہران ئٹ فلسطینی راہشون نا مرگ ئنا گواچی مننگ جنگ ئنا ترندی ءِ ودفے و اسرائیل نا لبنان آ بھلو کچ اسیٹ آسمانی جلہو تیٹ حزب اللہ نا قیادت و اونا جنرل سیکریٹری حسن نصراللہ نا مرگ ئنا گواچی مننگ ایران کن دوارہ اسرائیل آ بھلو جلہو ئسے نا سوب جوڑ مس، ہراڑان پد نیامئی قطب پدا جنگ ئنا کرک آ سلوک ءِ و اسرائیل نا ایران آ ورندی جلہو باقاعدہ جنگ ئنا سوب جوڑ مننگ کیک۔ ہراٹی امریکہ ہم اوار مرو و شام، عراق، یمن و اردن تون اوار کیہی ڈیہک جنگ ئنا پلویڑ ئٹ برور۔
ایران بلوچ آتا ہمسایہ ڈیہہ ءِ و اسرائیل تون باقاعدہ جنگ ئنا دروشم ئٹ جنگ ئنا تہوش بلوچستان اسکان سر مرو و گولڈ سمتھ لائن نا ہڑتوم آ پارہ غاتیان بلوچ زرگزرانی و سیاسی دروشم ئٹ زیمی مرو۔ واہم بلوچ راج دوست تجزیہ نگار آک دا بابت چپ ءُ خیال تخرہ کہ آیا اسہ مننگ کروک ایران-اسرائیل جنگ، بلوچ تحریک آجوئی کن اسہ موقع اس مرو یا بھس کاری اس۔
خضدار مونتس ئٹ کسفنگوک بندغ تا تعلق کالعدم مذہبی تنظیم آن ءِ۔
خضدار آن رسینگوک حوال تا ردئٹ کاؤنٹر ٹیررزم ڈیپارٹمنٹ (سی ٹی ڈی) کارروائی اسیٹی 4 شکبر بندغ ءِ کسفنگ نا دعویٰ کرینے۔
سی ٹی ڈی کوالخواہ تا ردئٹ اینو اینو خضدار ئٹ سی ٹی ڈی تون سم کاری ٹی 4 شکبر بندغ کسفنگار ہرافتا جون تے دوئی مریسہ خضدار سول اسپتال آ دننگا۔
سی ٹی ڈی تدینی ٹی کسفنگوک بندغ تا تعلقداری ءِ کالعدم تنظیم آن پارینے۔
یاتی مرے بلوچستان ئٹ پاکستانی لشکر خاص وڑئٹ ایف سی و سی ٹی ڈی نا پارہ غان دنو کیہی تدینی مسنے ہراڑے دروغ نا مونتس تیٹ مالو آن دزگیر کننگوک بندغ آتے کسفنگانے۔
واہم اینو خضدار ئٹ پاکستانی لشکر نا گمانی مونتس ئٹ کسفنگوک بندغ تا چاہنداری دائسکان پاش کننگتنے۔
بلوچستان نا ضلع کیچ نا بنجاہی شار تربت آن پاکستانی لشکر اسہ ورنا ئسے دزگیر کریسہ زوراکی ئٹ بیگواہ کرینے۔
بیگواہ کننگوک ورنا نا چاہنداری ملا برکت نا مار انیس نا پن ئٹ مسنے۔
علاقائی حوالکار تا پاننگ ءِ کہ انیس ءِ استو ہشت و نیم نا وخت آ سری کہن تربت آن اونا دکان نا مونان کورولا گاڑی اسیٹی سوار سلہہ بند بندغ آک زوراکی ئٹ بیگواہ کریر۔
انیس نا بابت پاننگک کہ اودے اِرا سال مالو 14 اکتوبر 2022 آ پاکستانی لشکر زوراکی ئٹ بیگواہی نا گواچی کریسس ہرا پدان 21 اکتوبر 2022 آ آجو کننگاسس۔
استو ایران نا پارہ غان اسرائیل آ سد آ میزائل آتیٹ جلہو کننگ آن پد ہڑتوم آ بدی دار تا نیام ئٹ تڑی تا لڑ برجاء ءِ۔
ایران اسرائیل آ سد آتا کچ میزائل خلک ہراڑان بھاز آ میزائل آتا ڈغار آ تمنگ آن ماڑی تے نسخان رسینگانے۔ میزائل جلہو تیان پد اسرائیلی کمکار آک زیمی مروک جاگہ تا جاچ ءِ ہلکر۔ ایرانی میزائل آتیان نیامی اسرائیل ئٹ اسہ اسکول ئسے نا ماڑی ءِ ہم نسخان رسینگانے۔ اسرائیل نا دعویٰ ءِ کہ ایران نا بھاز آ میزائل آتے آسمان ئٹ ہی بھس کننگانے ولے گڑاس ڈغار آ ہم تمانو۔
اسرائیلی لشکر نا ترجمان رئیر ایڈمرل ہیگاری پارینے کہ ایران نا پارہ غان اسرائیل آ استو نا مروک میزائل جلہو تا بھیم بش کروک نتیجہ مرور۔ واہم ترجمان دا بابت شابیتی ہیت کتو کہ ایران ءِ ہرا ڈول ئنا نتیجہ تیتون مون تروئی تمو و اسرائیل ہراتم دا جلہو تا ورندی ءِ ایتو۔
ترجمان پارے کہ اوڑتون دمدستی دنو حوال اف کہ ایرانی جلہو تیٹ اخس نسخان مسنے۔ اونا پاننگ ئس کہ گڑاس میزائل ملک ئنا نیامی و جاندمی علاقہ تیٹ تمانو۔
اندن اسرائیل نا سر وزیر بینجمن نیتن یاہو ایرانی جلہو تا ردعمل ئٹی تینا بیان ئٹ پارینے کہ ایران اسہ بھلو ردی اس کرینے و اودے دانا بدلہ ءِ تروئی تمو۔
اسرائیلی سر وزیر گیشتر پارے کہ ”ایرانی حکومت ننا رکھ ئنا ارادہ ءِ پہہ مننگ ئٹ بے سہب مسنے و او تینا دژمن آن بیر ہلنگ نا ننا ارادہ ءِ ہم پہہ مفک۔“
حوال تروک ادارہ ’رائٹرز‘ نا ردئٹ اقوام متحدہ کن اسرائیلی سفیر اسہ یکہ ءُ بیان اسیٹ پارینے کہ ایران تینا گام تا ورندی ءِ زوت سگو و او ورندی اوڑکن بھاز تکلیف تروک مرو۔
ایلو پارہ غان ایرانی صدر مسعود پزشکیان چاگڑدی حوالکاری تلہ ایکس آ شینک کروک بیان اسیٹ پارینے کہ ایران نا پارہ غان میزائل جلہوک، اسرائیل نا ظلم ئنا برخلاف ردعمل ئسر۔
او پارے کہ ”ایران و خطہ کن ایمنی و سلامتی“ نا مسخت تون اوار ایران نا ”جائز حق“ آتا بنداو آ، اسرائیل ءِ ”ایرانی مفاد و شاری تا رکھ اکن“ فیصلہ کن ورندی تننگا۔
نیتن یاہو ءِ پامدار کریسہ پزشکیان پارے کہ اسرائیلی سر وزیر سرپند مرے کہ ”ایران جنگ ئنا خواست گار اف ولے ہر بھیم ئنا برخلاف سوگوی ئٹ سلوک مرو۔“
اندن ایرانی لشکر نا سروک پارینے کہ اسرائیل ایران نا برخلاف کارروائی کرے گڑا ورندی ردعمل سئے شمبے نا جلہو تیان ہم ترند مرو۔
عرب حوال تروک ادارہ ’الجزیرہ‘ نا ردئٹ اینو اسہ بیان اسیٹی ایرانی لشکر نا سروک محمد باقری دعویٰ کرے کہ درو ایران نا میزائل جلہو تیٹ موساد نا ہیڈکوارٹر آتیتون اوار اسرائیل نا اِرا ایئر بیسز آتے سر سہبی ئٹ ٹک کننگا۔
اونا پاننگ ئس کہ ایران نا میزائل جلہو تیٹ اسرائیل نا صنعتی، زرگزرانی بنجاہ یا السی ہند آتے ٹک کننگتو حالانکہ دن کننگ ہم مننگ کریکہ۔
ایلو پارہ غا اسرائیل اقوام متحدہ نا سیکریٹری جنرل انتونیو گوتریس ءِ ”دوست بفروک“ گوندیسہ اونا اسرائیل ئٹی پیہنگ آ رکھ خلکنے۔
اسرائیل نا وزیر خارجہ اسرائیل کاٹز اینو اسہ بیان اسیٹی پارے کہ انتونیو گوتریس استو نا ایران نا اسرائیل آ مروک جلہو تا پاش مذمت کتو۔
اسرائیلی وزیر خارجہ نا پاننگ ئس کہ جہان نا کم و ود غٹ ڈیہک ایران نا سفاک آ جلہو تا مذمت کریر واہم انتونیو گوتریس دن کننگ ئٹ بے سہب مس، اندا خاطر او اسرائیلی ڈغار آ گام تخنگ نا لائخ اف۔
یاتی مرے کہ اقوام متحدہ نا سیکریٹری جنرل استو اسہ بیان اسیٹی پاریسس کہ ”نیامی قطب ئٹ پوسکنا جلہو تیان حالیت آتا خرابی مننگ نا مذمت کیوہ۔“
