ژوب کوئٹہ بنجائی کسر آ ایف سی چیک پوسٹ آ درست بندغ آک جلہو کریسہ ٹک کریر ۔

ژوب آن حوال آتا ردئٹ نا درست سلہہ بند بندغ آک پاکستانی فورسز ایف سی نا چیک پوسٹ ئسے بھلو جلہو اسیٹ ٹک کریر و چیک پوسٹ نا تہہ ئٹ ہننگ نا کوشست ہم کننگا ۔

سلہہ بند بندغ آک چیک پوسٹ ءِ ￵ چارمہ کنڈان جلہو ئٹ ٹک کریر و راکٹ فائر ہم کننگا اندن ہمو وخت چیک پوسٹ نا بنجائی دروازہ آ گمانی وڑ ئٹ خود کش جلہو ہم کننگا ۔

پاکستانی فورسز نا چیک پوسٹ آ جلہو ئٹ دائسکان پاکستانی فورسز نا اسہ کارندہ ئسے نا کہنگ و 11 نا ٹپی مننگ نا پک کننگانے ۔

تدینی آن گڈ پاکستانی فورسز نا بھلو کچ اس کوئٹہ و خڑک ئنا جا تا پارہ غا روان مسر واہم دا بابت دائسکان سرکاری احوال مونا بتنے  ۔

بلوچ لبریشن آرمی نا ترجمان جیئند بلوچ میڈیا غا شینک کروک بیان ئٹ پارینے کہ بی ایل اے نا سرمچار آک درو مستونگ نا علاقہ اسپلنجی ٹی قوضہ گیر پاکستانی لشکر ءِ اِرا جتاء جلہو تیٹ ٹِک کریر، ہرافتیٹی پاکستانی لشکر نا 8 کارندہ مرگ ئنا گواچی و مسٹ ٹپی مسر وختس کہ اسہ بکتر بند گاڑی اس بُھس و چار گاڑی ءِ بھاز نسخان رسینگا۔

او پارے کہ اسپلنجی نا علاقہ گونڈین مَرو ئٹ بلوچ لبریشن آرمی نا سرمچار آک سنگر ہلسہ قوضہ گیر پاکستانی لشکر نا قافلہ ءِ بھلا و خودکار آ سلہہ تیٹ ٹِک کریر، دژمن لشکر نا اسہ ٹرک اسیتون اوار چار گاڑی جلہو نا دَک ئٹ بسر، ہرانا سوب دژمن لشکر نا ہشت کارندہ مرگ ئنا گواچی مسر وختس کہ اِرا گاڑی ءِ بھاز نسخان رسینگا۔

ترجمان پارے کہ ایلو پارہ غان جلہو نا دک ئٹ بروکا قافلہ نا کمک کن سر مروکا دژمن لشکر نا اسہ بکتر بند گاڑی ئسے بلوچ لبریشن آرمی نا سرمچار آتا اسہ کڑدہ اس ریمورٹ کنٹرول آئی ای ڈی جلہو اسیٹی ٹِک کریر ہرانا سوب بکتر بند تیوہ بھس مس، وختس کہ اوٹی تولوک مسہ کارندہ بھاز ٹپی مسر۔ آئی ای ڈی جلہو نا سوب دژمن لشکر ہن و بر ئٹ بے سہب مس۔

او پارے کہ جلہو آن گڈ پن کروک علاقہ ٹی دژمن لشکر نا ہیلی کاپٹر آک سر مسر، واہم بلوچ سرمچار آک سوگوْ آ ڈٹ بندی تا رد ئٹ جلہو آتیان گڈ تینا رکھ انگا جاگہ غاتیا سر مسر۔

جیئند بلوچ پارے کہ بلوچ لبریشن آرمی دا جلہو نا ذمہ واری ءِ ارفک و دا پک امیت تخک کہ بلوچ ڈیہہ ئنا آجوئی اسکان ننا سلہہ بند مزاحمت برجا مرو۔

چینی مفاد آک جلہو تا دک ئٹی – ٹی بی پی سرگپ

ہفت اکتوبر نا نن کراچی بالی پٹ آ چینی انجینئر آتیا بلوچ لبریشن آرمی نا مجید بریگیڈ و زراب (Zephyr Intelligence Research & Analysis Bureau) جند ندری جلہو کریر۔ پاکستان ئٹ چین نا سفارت خانہ تینا ویب سائٹ آ تراک ئٹ بن قاسم پورٹ ئتون تفوک چینی انجینئرز، لی جون، وہ چون زن و لی زہااو نا مرگ ئنا گواچی مننگ ءِ پک کرے۔ بی ایل اے نا ردئٹ چینی سرمایہ کار آتیا جند ندری جلہو شاہ فہد عرف آفتاب کرینے۔

پاکستان ئٹ چین نا ہندی تیا کراچی ٹی دا ارٹمیکو بھلا جلہو ءِ، ہراٹی چین تینا شاری تا مرگ ئنا گواچی مننگ ءِ پک کرینے۔ داڑان مالو اپریل اِرا ہزار بیست و دو ئٹ مجید بریگیڈ نا اولیکو زالبول جند ندر شاری بلوچ کراچی یونیورسٹی ٹی کنفیوشس انسٹی ٹیوٹ نا چینی استاد آتیا جلہو کریسس، ہراٹی مُسہ چینی شاری مرگ ئنا گواچی و اِرٹ ٹپی مسوسر۔

بلوچ لبریشن آرمی اِرا ہزار ہژدہ غان چرجوئی ئٹ چین نا معاشی و عسکری مفاد آتے ٹک کننگ ءِ و کراچی ٹی سخت نازرک ہند آ سخت سکیورٹی پلویڑ ئٹ چین نا انجینئرز آتیا بی ایل اے فدائین یونٹ مجید بریگیڈ و انٹیلیجنس کڑدہ زراب نا سرسہب جلہو آن پاش مریک کہ تنظیم تیوہ پاکستان ئٹ ہر جاگہ غا چین نا مفاد و ڈٹ آتیا جلہو کننگ نا لائخی تخک۔

شنگھائی تعاون تنظیم نا مجلس آن مالو چین نا انجینئرز آتیا جلہو ئٹ بی ایل اے چین و جہان ءِ کلہو تننگ ءِ کہ بلوچستان ئٹ بلوچ راج نا منشاء غان بیدس لٹ و پل کروک ڈٹ بندیک منّنگ نا لائخ افس۔ بلوچ لبریشن آرمی نا ڈٹ بند جلہو آتیان اونا حکمت عملی تیٹ بدلی نا پاش اشارہ غاک رسینگرہ، و دا جلہو تیان گمان کننگ مریک کہ بروک وخت ئٹ دن انگا ڈٹ بند جلہوک برجاء مرور۔

بلوچستان اِرا دہک آن جنگ زدہ ءِ، ہرانا سوب آن جہانی سرمایہ کاری نا گمانک کم ءُ و پاکستان نا جہانی سرمایہ کار آتے رکھ تننگ نا دعویٰ غاک راست پاش مننگ افس۔

دا حالیت آتیان دا ہیت پاش مریسہ ءِ کہ بلوچ راج نا مرضی و منشاء غان بیدس بلوچستان ئٹ پیشن نا سرمایہ کار آک رکھوک مننگ کپسہ۔ داسہ دا خطہ نا غٹ اسٹیک ہولڈر آتے دا ہیت ءِ سوبری ئٹ منوئی تمو کہ بلوچ راج نا گواچن نمائندہ تے باور ئٹی ہتنگ و اوفتا خُلیس آتے مُر کننگ آن بیدس دا ڈیہہ ئٹ ہچو ڈٹ بندی اس سرسہب مننگ کپک۔

بلوچستان نا ضلع خاران ئٹی سلہہ بند بندغ آک سم کاری کریسہ اسہ بندغ ئسے کھسفینو۔

سم کاری ٹی کہوکا بندغ نا چاہنداری کلشنان کلگ نا ہندی شفیع محمد ولد محمد کرم یلانزئی نا پن ئٹ مسنے۔

سم کاری نا تدینی چیف چوک ئنا ہند آ مسنے و تدینی آن پد جون ءِ اسپتال آ رادہ کننگانے۔ تدینی نا سوب دائسکان سما تمتنے۔

کوئٹہ ٹی ٹہیفوک بے گواہ آ بندغ آتا خاہوت آتا تنظیم وائس فار بلوچ مسنگ پرسنز نا بین برانزی کیمپ ءِ نا درست آ بندغ آک خاخر تسر ہراڑان کیمپ ئنا اسہ بشخ ئس ہشنگسہ ہِس مس۔

وی بی ایم پی نا وائس چیئرمین ماما قدیر بلوچ کیمپ آن ویڈیو کلہو ئس شینک کرسہ پارے کہ او کیمپ ئٹ ہڑدے نا وڑ تولوک ئس کہ پدان اسٹ ئس کیمپ ءِ خاخر تس و نرا۔

او پارے کہ او پولیس ءِ احوال تسنے و ڈوہ دار آتا جم وڑ ئٹ دزگیری نا خواست ءِ کیک۔

یاتی مرے کہ وائس فار بلوچ مسنگ پرسنز نا بین برانزی کیمپ چانڑدہ سال آن برجا ءِ ہرا زوراکی ئٹ بیگواہ آ بلوچ آتا یلہ مننگ کن کاریم کننگے۔

بلوچ ریپبلیکن آرمی نا ترجمان سرباز بلوچ میڈیا غا شینک کروک بیان ئٹ پارینے کہ اینو سہب ئنا بلوچستان نا علاقہ ڈیرہ بگٹی نا تحصیل سوئی نا علاقہ رئیس توخ و لنجو ٹی لس آباتی تا برخلاف آپریشن ئٹ اختہ پاکستانی لشہر آ مسہ جتاء جتاء ہند آتیا جلہو کریر، ہرافتیٹی جمعی وڑ ئٹ دوانزدہ کارندہ مرگ ئنا گواچی و پانزدہ غان زیات ٹپی مسر۔

سرباز بلوچ نا پاننگ ئس کہ سرمچار آک اولیکو جلہو ءِ رئیس توخ نا علاقہ ٹی سنگر ہلیسہ بھلا سلہہ تیٹ کریر ہراڑے پاکستانی لشکر نا کارندہ غاک آباتی تیا بیدادی ٹی اختہ ئسر، دا جلہو ئٹ چار کارندہ ہمو ہند آ مرگ ئنا گواچی و ہشت ٹپی مسر۔

ارٹمیکو جلہو ئٹ سرمچار آک پاکستانی لشکر نا قافلہ ءِ ہمو وخت آ سنگر ہلیسہ راکٹ و بھلا سلہہ تیٹ ٹِک کریر ہراتم اوفک لس آباتی تیا بیدادی کننگ کن ہننگ ئسر، ہرانا سوب پاکستانی لشکر نا اسہ بکتر بند گاڑی اس مچا بھس مس وختس کہ پنچ کارندہ مرگ ئنا گواچی و شش ٹپی مسر۔

سرباز بلوچ نا پاننگ ئس کہ مسٹمیکو جلہو ئٹ سرمچار آک شاخ نمبر چار آ فورسز نا کارندہ غاتے بھلا سلہہ تیٹ ہمو وخت ٹِک کرے ہراتم اوفک تینا سنگت آتا کمک کن سر مننگ ئسر۔ دا جلہو ئٹ مسہ کارندہ مرگ ئنا گواچی و کہییک ٹپی مسر ٹپی آتیٹی اسہ افسر اس ہم اوار ءِ ہرانا چاہنداری میجر حمزہ نا پن ئٹ مسنے۔

ترجمان پارے کہ سرمچار آک پاکستانی لشکر نا اِرا سرویلنس ڈرون ہم خلکر بٹیر، ہرا جنگ ئنا وخت آ بلوچ مزاحمت کار آتا پٹ سٹ ءِ کننگ ئسر۔

سرباز بلوچ مستی پارے کہ پن کروک علاقہ غاتیٹ پین فوجی کڑدہ سر مننگے، ہرافتیان رکھنگ کن جنگی حکمت عملی جوڑانن۔ بزگ آ بندغ آتیا ظلم کروکا زوراک آ ریاستی کارندہ غاتے جوانو سبخ ایتون ترون۔

اسرائیل آ حماس نا بے گمان جلہوک و اوفتیان پد غزہ ٹی بناء مروک جنگ ءِ اینو اسہ سال اس مس۔

اینو جنگ ئنا اسہ سال اس پورو مننگ نا دے اسرائیلی لشکر غزہ نا نیام ئٹ حماس نا جنگجو تے ٹک کننگ کن جنگی طیارہ تیٹ بمباری کرینے۔

غزہ نا بست و بند ءِ توروک سلہہ بند تنظیم نا حماس اسہ سال اس مالو اسرائیل نا جاندمی علاقہ تیا کروک جلہو تیان پد اسرائیلی فورسز و حزب اللہ نا نیام ئٹ ہم جنگ بناء مسوسس۔ دا جنگ ئٹ داسہ ترندی بریسہ ءِ ہراڑان پد خُلیس پاش کننگک کہ دا جنگ تیوہ خطہ ئٹ تالان مننگ کیک۔

اسرائیلی لشکر اسہ بیان اسیٹ پارینے کہ اونا جنگی طیارہ غاک لبنان ئٹ حزب اللہ نا ہند آتے ہم ٹک کرینو۔

اسرائیل نا لشکر جاندمی لبنان تون اوار بنجاہی شار بیروت ئٹ ہم کارروائی کرینے۔

ایلو پارہ غان لبنان نا سلہہ بند تنظیم حزب اللہ اسرائیل نا قطبی شار حیفا ءِ ٹک کرینے۔

اسرائیلی میڈیا نا ردئٹ حزب اللہ بھاز آ راکٹ آک حیفا شار نا جتا علاقہ تیٹ تمانو۔

رپورٹ آتا ردئٹ راکٹ جلہو آتیٹ کم آن کم 10 اسرائیلی شاری تا ٹپی مننگ نا حوال آک اریر۔

حزب اللہ دعویٰ کرینے کہ او جاندمی اسرائیل نا شار حیفا ئٹ اسہ فوجی اڈہ ئسے ٹک کرینے۔

ایلو پارہ غان اسرائیل آ جلہو و جنگ نا اسہ سال اس پورو مننگ آ اسرائیلی سر وزیر بینجمن نیتن یاہو درو لبنان نا سیم آ قطبی اسرائیل ئٹی فوجی کارندہ تیتون اوڑدہی کن دورہ کرے۔

دا وخت آ بینجمن نیتن یاہو نا دفتر آن شینک مروک بیان اسیٹ پاننگا کہ اسہ سال اس مالو اسرائیل ءِ اسہ بھیم بش کروک جھٹکہ اس لگا۔

اونا پاننگ ءِ کہ ہمو دے آن پد تدوکا 12 توہ ئٹ اسرائیل تیوہ غا نخشہ ءِ بدل کرینے۔

او گیشتر پارے کہ اسرائیلی لشکر تینا دژمن ءِ ہرا ٹپ آتے تننگ ءِ اوفتیا جہان گوڑینگانے۔ او اسرائیلی فوجی تے پارے کہ اوفک کَٹوکو نسل ئسے ءُ۔

داکان بیدس امریکہ نا صدر نا سرکاری جاہ و دفتر وائٹ ہاؤس آن شینک مروک بیان ئٹ پاننگانے کہ اسرائیل آ جلہو نا اسہ سال اس پورو مننگ آ مجلس ئٹ اوار مرون و دا وخت آ موم بتی ہم روشن کننگو۔

خیال ئٹ مرے کہ حماس ہفت اکتوبر 2023 آ اسرائیل نا جاندمی علاقہ تیا گمان کپروک دروشم ئٹ زمینی، آسمانی و دیری آ کسر تیٹ جلہو کریسس۔

اسرائیلی کوالخواہ تا ردئٹ دا جلہو تیٹ 1200 بندغ مرگ ئنا گواچی مسوسر اندن حماس کم و ود دو نیم سد بندغ ءِ بندی کریسس۔ اوفتیان نیمہ غان زیات ءِ نومبر 2023 ئٹ اسہ ہفتہ ئسے نا عارضی جنگ بندی نا معاہدہ نا ردئٹ یلہ کننگاسس۔

دائسکان ہم کم و ود 100 بندی حماس نا دزگیر ئٹی ءُ۔ اسرائیلی فورسز آتا خیال ءِ کہ حماس نا دزگیر ئٹ ساڑی بندی تیان اسہ تہائی اس کسکنے۔

ایلو پارہ غان ہفت اکتوبر 2023 آ اسرائیلی فورسز آک غزہ ءِ پلویڑ کریسر و اسرائیل نا حکومت حماس نا ایسری و بندی تا آجوئی اسکان جنگ ئنا لڑو کریسس۔

اسہ سال ئسے آن غزہ ٹی اسرائیل نا حماس نا برخلاف برجاء جنگ ئٹ دریابی پٹی نا محکمہ جانجوڑی نا کوالخواہ تا ردئٹ کم و ود 42 ہزار فلسطینی کسفنگانو اندن ٹپی آتا کچ 97 ہزار آن تدینگانے۔

حماس نا بست و بندی غزہ نا جانجوڑی وزیر نا پارہ غان شینک مروک کچ و حساب ئٹ دا پاننگتنے کہ کہوک آتیٹ اخس سلہہ بند اوار ئسر۔ غزہ نا جانجوڑی وزیر نا پاننگ ءِ کہ کہوک آتیٹ نیمہ آن زیات چنا و زالبول ءُ۔

یاتی مرے کہ جنگ آن مُست غزہ نا آباتی کم و ود 23 لکھ ئس ہرافتیان 80 درسد آن زیات بندغ بے اُرا مسنو و اوفتے ہمپ و لڈ کروئی تمانے۔

خیال ئٹ مرے کہ غزہ نا سلہہ بند تنظیم حماس و لبنان نا سلہہ بند تنظیم حزب اللہ ءِ امریکہ، برطانیہ، یورپی یونین تون اوار اوفتا بھاز آ سیوتی ڈیہک دہشت گرد تنظیم گوندرہ۔

استو نن ئنا 11 نا وخت آ کراچی ایئرپورٹ آن خڑک اسہ ترند تراک اس مس ہرانا توار شار ئنا جتا علاقہ تیٹ بِننگا، تراک ئٹ چینی شاری تا قافلہ ٹک کننگا ہرانا سوب کیہیک ٹپی و مرگ ئنا گواچی مسر اندن دائسکان مرگ ئنا گواچی مروک 3 چینی شاری تا چاہنداری مسنے۔

پن کروک جلہو نا ذمہ واری ءِ بلوچ لبریشن آرمی نا جند ندر کڑدہ مجید برگیڈ ارفے۔

پولیس حوالکار آک میڈیا ءِ پاریر کہ ’اسہ گاڑی اس ایئرپورٹ نا پیشن نا کسر آ ہمو گاڑی ءِ ڈک خلک ہراٹی پیشن ملکیک سوار ئسر۔‘

حوال تا ردئٹ تراک نا سوب جانی و مالی بھاز نسخان مسنے ہرافتیٹ دائسکان مرگ ئنا گواچی مروک 3 چینی شاری تا چاہنداری مسنے۔

پولیس نا ردئٹ مرگ ئنا گواچی مروک آتا چاہنداری لی جون، وہ چون زن و لی زہااو نا پن تیٹ مسنے۔

پاکستان ئٹ چینی سفارت خانہ و قونصلیٹ جنرل نا ویب سائٹ آ شینک مروک بیان اسیٹ جلہو نا مذمت کریسہ پاننگانے کہ شش اکتوبر آ نن ئنا 11 بجہ نا وخت آ پورٹ قاسم اتھارٹی الیکٹرک پاور کمپنی ( پرائیویٹ) لمیٹڈ آن چینی کارندہ غاتے ہتوک اسہ قافلہ ئسے آ جلہو کننگانے۔

چینی قونصل خانہ پارینے کہ اوفتا پارہ غان اسہ ہلہلئی ڈٹ بندی اس کننگانے و پاکستانی کوالخواہ تیان خواست کننگانے کہ او دا جلہو نا جوان پٹ و پول ءِ کیر و ڈوہ دار بندغ آتے سزا تننگ تون اوار اوار پاکستان ئٹ جتا ڈٹ آتیا کاریم کروک چینی شاری تا رکھ اکن گامگیج کیر۔

اندن جلہو نا ذمہ واری ءِ بلوچستان ئٹ متحرک آجوئی دوست سلہہ بند گل بلوچ لبریشن آرمی نا ترجمان جیئند بلوچ ارفیسہ پارے کہ بی ایل اے نا جند ندر کڑدہ مجید برگیڈ کراچی ٹی جناح ایئرپورٹ آن پیشتموک چینی انجینئر و سرمایہ کار آتا اسہ بڑزکو تلہ نا قافلہ ئسے شورہ غان پُر گاڑی نا کمک ئٹ جند ندری جلہو ٹک کریسہ کیہی چینی و اوفتا رکھ اکن ساڑی فوجی کارندہ تے مرگ ئنا گواچی کرے۔

بی ایل اے نا ردئٹ چینی شاری تا قافلہ ءِ بی ایل اے مجید برگیڈ نا جند ندر سرمچار شاہ فہد عرف آفتاب ٹک کرینے۔ بی ایل اے نا ردئٹ شاہ فہد بارود آن پُر گاڑی ءِ قافلہ تون خلیسہ شہادت ءِ ارفے۔ استو جند ندر شاہ فہد نا اسہ عکس اس ہم ہکل میڈیا نا پارہ غان شینک کننگا۔

نوبل داد ہلوک کیہی بندغ تا سیالی امریکہ، برطانیہ و جرمنی آنے۔ اوفتا مونا بیرہ ہشت چینی، دوانزدہ انڈین و اِرا پاکستانی بندغ ءِ نوبل داد تننگانے۔

دیہاڑ ئٹ اولیکو وار نوبل داد 1901 ئٹ بشخ کننگاسر۔ ہمو وخت آن اینو دے ئسکان دا ٹیکی ئٹ کیہی بندغ آتے شرف تننگانے، ہرافتان کیہی تا سیالی امریکہ، برطانیہ و جرمنی آنے۔ دا ڈیہہ تیان سیالی تخوک نوبل داد ہلوکا بندغ تا تیوہ کچ 663 ءِ۔

دانا مونا اینو اسکان بیرہ ہشت چینی، دوانزدہ انڈین و اِرا پاکستانی بندغ ءِ نوبل داد تننگانے۔

داکان بیدس، بیستمی کرن نا بناء آن اینو دے اسکان نوبل داد کھٹوک آتیٹی اوار نیاڑی تا کچ 15 درسد آن ہم کم ءِ۔

اندا سوچ ءِ مونا تخیسہ ناقدین آتا امنا ءِ کہ نوبل داد تا بشخ کننگ جانبدارانہ سوچ و رویہ آتیان آزات اف، ہرانا سواد ءِ امریکہ و یورپ آن تعلق تخوکا بندغ و خاص وڑئٹ نرینہ آتے رسینگانے۔

دا باروٹ بھارت ٹی صحت عامہ نا پروفیسر راجب داس گپتا نا پاننگ ءِ کہ نوبل داد گیشتر ہمو بندغ آتے تننگک ہرا اودے کڑزرہ، “واہم دا (بشخ نا عمل) ٹی سیاست نا عمل دخل ہم مریک۔”

ڈی ڈبلیو تون گپ و تران نا وخت اونا پاننگ ئس، “بھارت تون اوار کیہی ڈیہہ تیٹ ساڑی ادارہ آتے خن تیان چپ کننگک۔ و یخینی وڑئٹ نوبل داد تا کمیٹیک داخس جامع افس ہخس کہ اوفتے مروئی ءِ ۔”

او ودیک پارے کہ بھارت و ایلو ڈیہہ تیٹ ساڑی ادارہ آتے نوبل داد نا رمب ئٹ امریکہ و یورپ تون مقابلہ کننگ کن گیشتر سوگو مننگ نا گرج ارے، و بیرہ اندا دروشم ئٹ دا ڈیہہ تیٹ لائخ بندغ تا ساڑی مننگ ءِ یقینی جوڑ کننگ مننگ کیک۔

نوبل ٹیکی و سائنس تون دوستی

نوبل داد نا بابت دا سوج ہم ارفنگک کہ آیا دا بندغ، خاص وڑئٹ نودربر آتے سائنس نا کنڈ آ ہتنگ ٹی گڑاس کڑدار مونا ہتیک۔

دا رِد ئٹ پروفیسر گپتا نشاندہی کیک کہ نوبل داد نا تننگ ءِ بھارت نا میڈیا بھاز شابیتی تون جاغہ ایتک۔ اونا پاننگے کہ دادے دوست تخنگ نا اسہ سوب بھارتی شاری، خاص وڑئٹ متوسط تپہ آن سیالی تخوک بندغ تا اسٹیم نوشت، یعنی سائنس، ٹیکنالوجی، انجینیئرنگ و پین حساب نا تعلیم نا کنڈا ودوکا رجحان ءِ ۔

داڑان بیدس بھارت ٹی نوبل داد نا حوالہ ئٹ معلومات خواننگجاہ (اسکول) نا نصاب ئٹ ہم اوار کننگانے۔

اندا وڑ اسہ برطانوی ہائی اسکول اسیٹی بائیولوجی نا استاد للی گرین ڈی ڈبلیو ءِ پارے کہ او تینا خوانندہ آتے نوبل داد نا دیہاڑ ہم خوانفک۔

اونا پاننگ ئس، “نن دادے سائنس نا بنداوی مفہوم ءِ سرپند کرفنگ کن کاریم ئٹ ہتینہ۔”

واہم او یقینی وڑئٹ دا پاننگ کپک کہ آیا نوبل داد نا دیہاڑ یونیورسٹی نا خوانندہ آتے ہم سائنسی خواننگ ءِ دوئی کننگ نا کنڈ آ دننگ ٹی کڑدار اس مونا ہتیک یا آخہ۔ دا خوانندہ آتا باروٹ اونا خیال ءِ کہ اوفتا دلچسپی بنیاتی وڑئٹ سائنس ٹی مریک نہ کہ نوبل داد اس کھٹنگ ٹی۔