بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹی پارینے کہ بی ایل اے نا سرمچار آک استو کوئٹہ ئٹ کوزہ گیر پاکستانی لشکر نا ہیڈکوارٹر آتے اسہ جلہو اسیٹی ٹک کریر۔
او پارے کہ سرمچار آک پاکستانی لشکر نا ہیڈکوارٹر آتیا گرنیڈ لانچر آتیٹ کیہی گولہ خلیسہ سرسہبی ئٹ ہدف ءِ ٹک کریر، تراک آتا سوب آن شش دژمن کارندہ ٹپی مسر ہرافتیٹ بھاز ٹپی ءُ ہم اوار ءِ۔
ترجمان پارے کہ بلوچ لبریشن آرمی دا جلہو نا ذمہ واری ءِ ارفک۔ کوزہ گیر لشکر نا بلوچستان آن تیوہ پیشتمنگ اسکان ننا کاروائیک برجاء مرو۔
زوراکی نا بیگواہی تا برخلاف پنجگور ریلی ٹی بھلو کچ اسیٹ شاریک اوار مسر۔
برانز کروک آک شہید جاوید چوک آن ریلی ءِ کشار ہرا شار نا جتا ہند آتیان گدرینگا، برانزیک بیگواہ بندغ تا عکس آتے ارفیسر اندن ریلی ٹی زالبول و چنا تا بھلو کچ اس اوار ئس۔
دا وخت آ برانزی تے پولیس و بست و بند نا پارہ غان بھیم نا گواچی ہم کننگا واہم برانز کروک آک ہڑاند آتیان گدرینگسہ تینا ریلی ءِ برجاء تخار۔
برانز کروک آتا پاننگ ئس کہ پنجگور بست و بند ریلی ٹی اوار مروک زالبول تے بھیم نا گواچی کننگ نا کوشست کرے ہرانا مسخت برانزی تے سوختہ کننگ ئس واہم نن پرامن ڈول ئٹ تینا برانز ءِ برجاء تخان۔
اوفک گیشتر پاریر کہ داڑان مالو ہم ہرا ہرا علاقہ تیٹ برانز آک مسنو ہموڑے پولیس ہڑاند بش کرینے و شار تیٹ موبائل سروس بند کننگانے اینو ہمو عمل ءِ پنجگور ئٹ کننگ نا ہم کوشست کننگا۔
بلوچ یکجہتی کمیٹی نا مہم ”چُپی ءِ پرغنگ: زوراکی نا بیگواہی تا برخلاف بش مننگ“ نا سرحال تون بلوچستان نا جتا علاقہ تیٹی برانز آتا لڑ برجاء ءِ ہراڑے داکان مالو کراچی، حب چوکی، خضدار، تربت و اینو پنجگور ئٹ برانز ریکارڈ کننگا۔
بلوچ یکجہتی کمیٹی دا بابت گیشتر پارینے کہ دا پرامن برانز آتے کاؤنٹر کننگ نا کوشست ریاست نا پارہ غان ہر وخت تڑی و بیدادی تیان پد ہم، انصاف و بقا نا دا جنگ ئٹ ننا پک ارادہ ءِ۔ نن الس خاص وڑ ئٹ بیگواہ بندغ تا خاہوت آتیان خواست کینہ کہ اوفک برانز آتیٹ اوار مریر و تینا بیگواہ بندغ تا شابیتی حوال تے جمع کرفر۔
ترکی نا بنجاہی شار انقرہ غان خڑک ترکش ایرو اسپیس انڈسٹریز (ٹی اے آئی) نا ہیڈکوارٹر آ جلہو کننگانے۔
دا سرکاری کمپنی جنگی سامان و ایرو اسپیس ٹیکنالوجی جوڑ کننگ کن پِنی ءِ۔
ترکی نا وزیر داخلہ علی یرلیکیا ایکس آ ٹویٹ اسیٹی پارینے کہ ”دا دہشت گرد جلہو ئٹ بد بختی آن ننا کیہی بندغ آک مرگ ئنا گواچی و ٹپی مسنو۔“
او پارے کہ دا جلہو ترکی نا بنجاہی شار آن 25 کلومیٹر مُر انقرہ ضلع ئٹ ٹہفوک کہرامانکازان ئٹ کمپنی نا ہیڈکوارٹر آ مس۔
ایکس آ پوسٹ کروک اسہ پین بیان اسیٹی اونا پاننگ ئس کہ بد بختی آن دا جلہو ئٹ مُسہ بندغ مرگ ئنا گواچی و 14 ٹپی مسنو۔
فرانسیسی حوال تروک ادارہ اے ایف پی نا ردئٹ، ہندی میڈیا نا پارہ غان شان تروک فوٹیج ئٹ جلہو نا ہند آ بھلو کچ ئسے آ موڷ و خاخر خننگ ئٹی بریک۔
ہندی میڈیا نا ردئٹ دا تراک شفٹ ئنا بدلی نا وخت آ مس و عملہ ءِ دمدستی شیلٹر آتیٹی رادہ کروئی تما۔
کمکار و میڈیکل ٹیم تے ہم ہمو ہند ئنا پارہ غا رادہ کننگانے۔
پِن کروک جلہو نا ذمہ واری ءِ دائسکان کس ارفتنے۔
خیال ئٹ مرے ترکش ایرو اسپیس انڈسٹریز (ٹی اے آئی) ترکی نا بنجاہی شار انقرہ غان خڑک ٹہفوک اسہ سرکاری ادارہ ئسے۔
دا ادارہ سویلین و فوجی جاز و ہیلی کاپٹر آتیان بیدس ڈرون ہم جوڑ کیک۔ ہرافتے نہ بیرہ ترک لشکر کاریم ئٹ ہتیک بلکن تیوہ جہان ئٹ ہم بہا کننگرہ۔
ٹی اے آئی ترک فوج ئنا کاریم ئٹ ہتنگ کن متکنا طیارہ غاتے پوسکن جوڑ کننگ ئٹ ہم کڑد سر ایتک۔
ضلع کیچ ئنا بنجائی شار تربت ئٹی اینو فور جی سروس تیوہ غا بند ءِ۔
خیال ئٹ مرے کہ تربت ئٹی اینو بلوچ یکجہتی کمیٹی نا کال آ زوراکی نا بیگواہی تا برخلاف برانزی ریلی نا کال تننگانے ہرا ویگہ نا 4 بجہ غا شہید فدا چوک آ مرو۔
تربت ئٹی کُل موبائل نیٹورک آتا ڈیٹا فورجی سروس بند کننگانے تاکہ پروگرام نا براہِ راست کوریج و وختا حوال شنگ مننگ نا توننگ مرے۔
یات مرے کہ درو خضدار ئٹی ہم زوراکی نا بیگواہی تا برخلاف برانز نا وختا موبائل سروس بند اس و حب شار ئٹی برانز نا مونا ہڑاند شاغنگ مسس۔
پشتون تحفظ موومنٹ نا سروک منظور پشتین پارینے کہ وادی تیراہ زخہ خیل پیر میلہ بازار آ پاکستانی بالی جلہو ئٹی لس الس ٹپی مسنے۔ ٹپی مروکا تیٹ چُنکو چُنا ہم اوار ءِ۔
او پارے کہ ٹپی مروکا تے حیات آباد میڈیکل کمپلیکس پشاور آ سر کننگانے۔
او ودیک پارے کہ پشتون بیلٹ ئٹی جنگی پالیسی تیا عمل کننگ ئٹی چرجوئی ئٹ بے سہبی آن پد ریاست السی ہند آتیا جلہو بناء کرینے۔
او پارے کہ اخس زور خلوئی ءِ خلبو ولے نن پشتون وطن آ ڈالری جنگ آتے مننگ کن الوفن۔
اندن پشتون قومی جرگہ نا کنڈ آن ایکس آ بیان ئس شنگ کرسا پاننگا کہ تیراہ ٹی فوجی ڈرون جلہو تیٹ 12 چُنا و 13 بھلو ٹپی مسنو، اندن خیبر سیکورٹی لشکر نا پاننگ ءِ کہ او ٹی ٹی پی نا بندغ ٹپی کرینو۔
او پاریر کہ گواچن دادے کہ دا عکس آک سلہہ بند طالبان تا افس بلکن چُنا تا ءُ، و دا چُناک ہم تینا اُرا تیٹ ٹپی مسنو۔ دا نا مطلب دادے کہ بمباری اُرا و السی جہہ تیا کننگانے۔ مشر منظور پشتین و ایلو پشتون سروک آک دا گوازی ءِ سرپند مریرہ، اندنی آن او تومکا فریق آتے پاریر کہ نُما جعلی جنگ ئٹی پشتون آک خلنگ مننگ ءُ، اندا سوب آن تومکا فریق آک ننا زمین آن پیشتمر تاکہ داڑے امن مرے۔
بلوچستان تون اوار کراچی آن زوراکی ئٹ بیگواہ تا برخلاف دپ درشانی کننگا و برانز ریکارڈ کرفنگا۔
شابیتی حوال تا رد ئٹ بلوچ خوانندہ غا تا زوراکی نا بیگواہی تا برخلاف کراچی یونیورسٹی نا خوانندہ غا تا کنڈ آن یونیورسٹی نا مون آن دپ درشانی ریکارڈ کرفنگا۔
خوانندہ غال دا وختا بلوچستان تون اوار ایلو علاقہ آتیان زوراکی نا بیگواہی تا گواچی مروکا خوانندہ غا تا عکس آتے ارفیسر۔
خوانندہ غا تا دا وختا پاننگ اس کہ برجاء تُو کراچی آن کراچی یونیورسٹی نا خوانندہ آتون اوار کراچی نا ایلو خواننگ جاہ تیٹ خوانوک کیہی ورنا تے زوراکی ئٹ بیگواہ کننگانے۔ ننا خواست ءِ کہ خوانندہ غاتے دمدستی پاش کرسا آجو کننگِہ نہ تو نن بیگواہ کننگوک سنگت آتا آجوئی کن برانزی تحریک بناء کرون۔
خیال ئٹ مرے کہ برجاء تُو اکتوبر ئٹی 60 آن زیات بلوچ ورنا زوراکی ئٹ بیگواہ کننگانو ہرافتان گیشتر خوانندہ ۂُ۔
دا زوت ئنا زوراکی نا بیگواہی تابتدینی تا برخلاف بلوچ تنظیم آتا کنڈ آن برانز آتا لڑ برجاء ءِ و بلوچ یکجہتی کمیٹی دا تدینی تا برخلاف برانزی تحریک چلفنگ نا پڑو کرینے ہراڑے تدوکا ملخدو کراچی درو حب چوکی و اینو خضدار ئٹ برانز کننگا۔
بی این پی مینگل نا منحرف سینٹر قاسم رونجھو سینٹ نا باسک مننگ آن استعفیٰ تس۔
بلوچستان نیشنل پارٹی نا منحرف سینیٹر قاسم رونجھو سیکرٹری سینیٹ ءِ تینا استعفیٰ ءِ تس۔ قاسم رونجھو سینیٹ ئٹی بی این پی مینگل نا پارلیمنٹ نا سروک ہم اس۔
خیال ئٹ مرے کہ بی این پی مینگل نا سینیٹر نسیمہ احسان و قاسم رونجھو آئینی ترمیم نا حق ئٹ تلہ غان گردینگار۔ بلوچستان نیشنل پارٹی نا سروک سردار اختر مینگل تومکا سینیٹر تےاستعفیٰ تننگ نا پاریسس۔
درو کراچی پریس کلب نا مونا برانز نا وخت آ دزگیر مروکا بی وائی سی نا ڈپٹی آرگنائزر لالا وہاب بلوچ ءِ سنگت آتون اوار عدالت یلہ کننگ نا پرمان تس۔
وائس فار مسنگ پرسنز نا سروک سمی دین بلوچ نا رد ئٹ بلوچ یکجہتی کمیٹی نا ڈپٹی آرگنائزر لالا وہاب بلوچ، عطاللہ بلوچ، سیف بلوچ، بابل بلوچ و آفتاب بلوچ ءِ برانزی مچی نا وخت آ دزگیر کریسہ پولیس تھانہ غا دننگا۔ ولدا اوفتے استو نا درست ءُ ہند ئسے آ دریسہ نیم نن ئٹ ولدا تھانہ غا ہتنگا۔
سمی دین پارے کہ اینو سہب ئنا اوفتے مجسٹریٹ نا مون آ ہتنگا، ہراڑے وکیل پارے کہ لالا وہاب و ایلو سنگت آتیا پولیس دروغ نا مقدمہ درج کرینے و پر امن برانزی تیا بیدادی کریسہ اوفتے دزگیر کرے۔
عدالت کاروائی تیان گڈ غٹ مقدمہ تے چٹفسہ دذگیر آ بندغ آتے یلہ کننگا۔
ضلع آواران نا تحصیل مشکے گجر بازار ئٹ سلہہ بند بندغ آتا سم کاری آن اِرا بندغ مرگ ئنا گواچی، جلہو کار آک نرنگ ئٹ سرسہب۔
مشکے پولیس نا رد ئٹ دوشمبے نا دے نیم روچ نا وخت آ مشکے نا ہیڈ کوارٹر گجر بازار ئٹ بنجاہی چوک آ اِرا مول ءُ موٹر سائیکلی ءُ سلہہ بند بندغ سم کاری کرسہ عبدالحق ولد جنگی خان و لیاقت علی ولد نیکسال محمد حسنی منجو حال پروار نا ہندی ءِ کھسفیر۔
مشکے پولیس مستی پٹ و پول کننگے۔
پن ئٹ فدائی شہید آصف جان عرف نوید بلوچ نا
شاعر: آسکان بلوچ
او سوب ئنا امید ئسے
فدائی ہئو مجید ئسے
خمار آ خنتو خیسن آ
آوار اوڑتون حمید ئسے
مخوکا چہرہ نا سرک
مدام خنتا دیدہ غا
پت آ تیٹی کسر کرے
او پھل تخانے چیدہ غا
او منگچر نا زیبلو
او چلتنی تلار ئسے
او ننکے پھل گلاب ئسے
بدر تیکن نہار ئسے
