پاکستانی لشکر نا دو آن زوراکی ئٹ بیگواہ کننگوک ورنا آجو مس۔
شابیتی حوال تا رد ئٹ برجاء تُو ئنا مسہ ستمبر آ بلوچستان نا ضلع کیچ ئنا علاقہ تربت، شاہی تمپ آن دزگیری آن گڈ بیگواہ کننگوک ورنا آجو مسنے۔
آجو مروکا ورنا تا چاہنداری داد شاہ بلوچ ولد ماسٹر سلیم نا پن ئٹ مسنے ہرادے نن نیمہ غا آجو کننگانے۔
ورنا نا آجوئی ءِ اونا خڑک ئنا بندغ آک پک کرینو۔
بلوچستان نا ضلع کوہلو ٹی مسن کا کالج نا بے فعالی نا برخلاف خوانندہ الائنس کوہلو نا کنڈ آن اسہ دپ درشانی ئس کننگا، ہرا ڈگری کالج کوہلو آن بناء مرسا نیشنل پریس کلب نا مونا ایسر مس۔
ریلی نا وختا خوانندہ غاک مسن تا کالج نا بحالی نا حق ئٹی نعرہ خلکر و تینا خواست آتا حق ئٹی بینرز ہرفیر۔
برانز کروک آتا پاننگ اس کہ ضلع کوہلو ٹی تعلیمی آسراتی تا کاختی بھاز افسوس نا ہیت ئسے۔ 76 سال گدرینگ آن پد ہم داڑے مسڑ خوانندہ غا تیکن اسہ کالج ئس اف۔ ہرا کہ حکومتی بے سہبی نا ثبوت ءِ۔
نیشنل پریس کلب نا مونا دپ درشانی نا ایسر ئٹی خوانندہ تنظیم اسہ پریس کانفرنس ئس کرے۔
دا وختا خوانندہ سروک آک ودیک پاریر کہ مسن تا ہائی اسکول کوہلو ٹی سرکاری استانی تا جاگہ غا میٹرک پاس چُنا تے خوانفنگ نا ذمہ واری تننگانے، ہرا خوانندہ غا تا بروک وخت اکن اسہ بیم تروک گھام اسے۔
اوفتا پاننگ اس کہ خوانندہ غا استاد آتا مفننگ آن کوہلو نا چُنا تا تعلیمی کارکردگی آ منفی زہم تمک، داکان بیدس خوانندہ سروک آک دعویٰ کریر کہ کیہی مسن تا اسکول تیات نرینہ غاک کاریم کننگ ءُ، ہرا نا مسخت کلسٹر بجٹ ءِ کُننگ نا ءِ۔
او دا کاریم تے خوانندہ غا تا تعلیم تون اسہ بھلو ملنڈ ئس پاریر و حکومت آن دمدستی دا بے قانودی بے اخلاقی گھام تا ایسری نا خواست کریر، خوانندہ غاک ساڑی آ ایم پی اے نواب چنگیز خان آن خواست کریر کہ او دا ویل آ دمدستی کڑد آ تینا سر تیر و مسن تا کالج نا جوڑ کننگ و اسکول تیٹ معیاری تعلیمی نظام ءِ یخینی جوڑ کیر تاکہ ضلع کوہلو نا خوانندہ غا تے اوفتا حق رسینگِہ۔
او خبردار کریر کہ اگہ اوفتا خواست آک پورو متور تو او کوئٹہ پریس کلب نا مونا بھلو کچ ئسیٹی برانز کرون، خوانندہ الائنس نا دا ریلی و پریس کانفرنس ضلع کوہلو نا تعلیمی پد ماندگی آ اسہ بھلو سوالیہ نشان اسے و حکومت آن دمدستی و سوبر گھام ئنا خواست کیک۔
قلات ئٹ پاکستانی لشکر نا بنجاہی کیمپ و پاکستانی لشکر آ اسنائپر ئٹ مروکا جلہو تے آجوئی دوست گَل یو بی اے و بی ایل ایف ارفیر۔
شاہ مردان ئٹ مروکا اسنائپر جلہو نا ذمہ واری ءِ بی ایل ایف وختس کہ نرمک تخت ئٹ مروکا جلہو نا ذمہ واری ءِ یو بی اے ارفے۔
بلوچستان لبریشن فرنٹ نا ترجمان میجر گہرام بلوچ میڈیا غا شینک کروک بیان ئٹ پارینے کہ سرمچار آک 4 ستمبر نا دیگر نا 6 بجہ غا قلات نا علاقہ شاہ مردان ئٹ ٹہیفوک قوضہ گیر پاکستانی لشکر ایف سی نا چیک پوسٹ نا کارندہ غاتے ہمو وخت آ اسنائپر ئٹ ٹِک کریر ہراتم اوفک تینا ڈیوٹی تے بدل کننگ ئسر، ہرانا دک ئٹ برسہ اسہ ایف سی کارندہ ئس مرگ ئنا گواچی مس۔
او پارے کہ جلہو آن گڈ سرمچار آک پوسٹ آ راکٹ گولہ خلکر ہرا چیک پوسٹ نا ٹہٹی تمار اراڑان فورسز ءِ پین جانی و مالی نسخان رسینگا۔
ایلو پارہ غان قلات ئٹ پاکستانی لشکر نا بنجاہی کیمپ آ مروکا جلہو نا ذمہ واری ءِ یو بی اے ارفے۔
یونائٹڈ بلوچ آرمی نا ترجمان مزار بلوچ میڈیا غا شینک کروک تینا بیان ئٹ پارینے کہ یو بی اے نا سرمچار آک درو دیگر نا شش بجہ نا وخت آ ضلع قلات نا علاقہ نرمک تخت نا ہند آ ٹہیفوک قوضہ گیر پاکستانی لشکر نا بنجاہی کیمپ آ کہیی BM12 نا گولہ خلکر ہرا پاکستان نا بنجاہی کیمپ ئٹ تمسہ ترند تراک ئٹ ترخار و بنجاہی کیمپ ئٹ خاخر لگا، ہرانا سوب قوضہ گیر پاکستانی لشکر ءِ بھاز جانی و مالی نسخان ارفوئی تما۔
او پارے کہ جلہو آن گڈ پن کروک کیمپ آ کوئٹہ نا پارہ غان شش ہیلی کاپٹر آتا ہلہلی بننگ و تولنگ آن گڈ ولدا کوئٹہ نا پارہ غا ہننگ دا پک کیک کہ ننا سرمچار آتا جلہو نا سوب قوضہ گیر لشکر ءِ بھاز جانی و مالی نسخان ارفوئی تما و دا ہیلی کاپٹر آتا بننگ دا پک کیک کہ قوضہ گیر پاکستانی لشکر تینا کہوک و ٹپی آ کارندہ غاتے ہیلی کاپٹر آتا وسیلہ ئٹ کوئٹہ آ سر کننگو۔
ندر فدائی ماہل عرف زلان کرد کن
شاعر: زراب بلوچ
بِنبو کہ اینو ورناک جنگ مسنے زرابی
دشمن نا کیمپ ئٹی چٹ ماہل کرے فداہی
ارفے او سخت ءُ گام ئس
شعوری ءُ فیصلہ ئس
لرزہ ٹی اینو تما
ظالم ءُ سامراج ئس
ہنینا دا وطن کن
آجوئی کن امن کن
او عشقٹی وطن نا چٹ مسنے خماری
دشمن کیمپ ئٹی چٹ ماہل کرے فداہی
بِنبو کہ اینو ورناک جنگ مسنے زرابی
دشمن نا کیمپ ئٹی چٹ ماہل کرے فداہی
بیلہ نا شارے اُربو
فکری آ سوچے خلبو
اولی مجیدی وارے
زیبا آ ماہلی ہم ایلم تیتون اوارے
قربان شارلی مس
مابت ئٹ ڈیہہ ئنا او
بولان رقص ئٹی ءِ چلتن کرے سلامی
دشمن نا کیمپ ئٹی چٹ ماہل کرے فداہی
بِنبو کہ اینو ورناک جنگ مسنے زرابی
دشمن نا کیمپ ئٹی چٹ ماہل کرے فداہی
عشق ئٹ وطن نا وختس
بش کیرہ زلزلہ ئس
دا اسلمی آ رندے
دا اسلمی آ عشقے
ایڑس گروک مسک
دشمن خُلیس پد مس
قربان ایڑ ہنینا برگیڈی آ سپاہی
دشمن نا کیمپ ئٹی چٹ ماہل کرے فداہی
بِنبو کہ اینو ورناک جنگ مسنے زرابی
دشمن نا کیمپ ئٹی چٹ ماہل کرے فداہی
بلوچ لبریشن آرمی نا ترجمان جیئند بلوچ میڈیا غا شنگ کروک تینا بیان ئٹی پارینے کہ بی ایل اے نا سرمچار آک تربت، نوشکی، پنجگور و بارکھان ئٹی چار جتاؤ کاروائی ٹی کوزہ گیر پاکستانی لشکر، معدنیات دروکا گاڑی، دشمن نا کمکار و حال حوالی ٹاور ئس ٹک کریر۔
او شابیتی حوال ترسا پارے کہ بلوچ لبریشن آرمی نا سرمچار آک جمعہ نا نن تربت شار ئٹی پاکستانی لشکر نا 168 ونگ ئنا پوسٹ آ ساڑی کارندہ تے چغلی بمب جلہو ئٹ ٹک کریر ہرا نا سوب آن مُسہ دشمن کارندہ ٹھپی مسر۔
ترجمان پارے کہ اسہ پین جلہو ئسیٹی، 3 ستمبر 2024 آ ننکان بلوچ لبریشن آرمی نا سرمچار آک نوشکی ٹی راجی مڈی دروکا گاڑی تیا جلہو ئٹ ٹک کریر۔
او پارے کہ سرمچار آک نوشکی نا علاقہ سر مَل ئٹی معدنیات دروکا اِرا گاڑی آ جلہو کرسا اسٹ ءِ ہُشار و ایلو نا ٹائرز آتیا سم کاری کرسا بھس کریر۔
جیئند بلوچ ودیک پارے کہ اِرا ہفتہ مُست ننا سرمچار آک پنجگور نا علاقہ گچک آن کوزہ گیر پاکستانی لشکر نا مخبر مراد عرف ڈولی ءِ دزگیر کریر۔ مراد عرف ڈولی ولد بہرام سکنہ گچک، لاٹیار تدوکا کیہی سال آن کوزہ گیر پاکستانی لشکر کن مخبری نا کاریم کریکہ۔
“سر و سوج نا وختا پن کروک بدغ تینا ڈوہ ءِ منِسہ پارے کہ او گچک، گوارگو، دراسکی ٹی فوجی زورکی ئٹی کوزہ گیر لشکر نا کمک ئٹ تُد اس، لشکر کشی نا وختا لس بلوچ آتا اُرا تے ہُشنگ کون آ ڈوہ تیٹ ہم تُد مسنے۔”
“مراد عرف ڈولی تینا ڈوہ ءِ منِسہ پارینے کہ او سردار علی حیدر محمد حسنی نا نائب غلام سرور ساجدی نا مُخ تفی ٹی ڈیتھ اسکواڈ نا بشخ مسنے و بلوچ آجوئی دوست آتا کسر تا پیدواری کرینے۔”
ترجمان پارے کہ کارندہ منانے کہ اگست 2020 ٹی پنجگور، گچک و ہیب کھیب ئٹی ہشت دے برجاء سلوکا لشکر کشی ٹی او کوزہ گیر پاکستانی لشکر تون تُد مسنے و دا وختا بی ایل اے نا سرمچار آصف عرف فدا ولد لال جان اور گلاب عرف وحید ولد پھلان نا شہیدی ٹی تُد مسنے۔
جیئند بلوچ پارے کہ مراد عرف ڈولی ءِ راجی غداری نا ڈوہ ئٹی بلوچ راجی عدالت مرگ ئنا تس ہراڑا درو بی ایل اے نا سرمچار آک عمل کریر۔
ترجمان پارے کہ بلوچ لبریشن آرمی نا سرمچار آک اسہ پین کاروائی ئسیٹی 4 ستمبر 2024 آ بارکھان نا علاقہ چھودی ٹی یوفون کمپنی نا موبائل ٹاور ءِ بھس کریر۔
داد دوئی کروک بندغی حق آتا باسک، وائس فار بلوچ مسنگ پرسنز نا جنرل سیکرٹری و بیگواہ ڈاکٹر دین محمد نا مسڑ سمی دین بلوچ ءِ ایف آئی اے کراچی جناح ایئرپورٹ آ تورینے۔
سمی دین ءِ ہمو وخت آ توننگا ہرا وخت او عمان آ ہِننگ ئس۔
سمی دین چاگڑدی حوالکاری تلہ ایکس آ ایئرپورٹ نا امیگریشن آفس و اسہ چٹھی ئسے نا عکس آتے تریسہ پارے کہ اینو کنے مسقط، عمان آ ہِننگ وخت آ کراچی ایئرپورٹ نا امیگریشن کاؤنٹر آ توننگا۔
سمی دین نا پاننگ ءِ کنے ایف آئی اے کوالخواک پارینو کہ بلوچستان حکومت کنا پِن ءِ ایگزٹ کنٹرول لسٹ ئٹ شاغانے۔ کنے چار گھنٹہ اسکان سکیورٹی کوٹی ٹی ودار کرفنگا و کنے سُرنگ نا موکل اف۔
سمی دین پین نوشتہ کرے کہ نہ کنا پاسپورٹ ءِ و نئے کہ کنے شاہدی اس نشان تننگ ءُ کہ کنے ہرا بنیات آ سفر کننگ نا موکل تننگ افس۔
بلوچستان نا علاقہ دالبندین آن جون اس خننگانے۔
لیویز نا ردئٹ جون میربور نا ہند آن خننگانے ہرانا کاٹم و سینہ غا سم تا نشانک اریر۔
جون ءِ چاہنداری کن پرنس فہد اسپتال دالبندین آ دننگا۔
بلوچستان نا علاقہ ضلع پشین ئٹی محکمہ انسداد دہشت گردی (سی ٹی ڈی) کارروائی کرسا سلہہ بند تنظیم نا پنچ بندغ کھسفنگ نا دعویٰ کرینے۔
سی ٹی ڈی نا رد ئٹ درو سی ٹی ڈی ءِ حوال رسینگا کہ ٹی ٹی پی تون تعلقداری تخوکو 5 شارپ شوٹر پشین نا علاقہ سرخاب مہاجر کیمپ ئٹی کارروائی نا ڈٹ بندی کننگ ءُ۔
او پارے کہ حوال رسینگ آن گڈ سی ٹی ڈی علاقہ ءِ گھیرہ کرسا مشکوک آ بندغ آتے خبردار کرے کہ او سلہہ بٹر ولے او سی ٹی ڈی ٹیم آ سم کاری بناء کریر۔
داڑا سی ٹی ڈی نا جوابی کارروائی ٹی پنچ بندغ احمد اللہ عرف علی عرف بدری، احسان اللہ عرف متوکل عرف حامد، سمیع اللہ و اوفتا اِرا سنگت خلنگار۔
سی ٹی ڈی کوالخواہ تا رد ئٹ کہوکا بندغ آتا کوزہ غان اسہ ایس ایم جی، اسہ 30بور ٹی ٹی پستول، اِرا نائن ایم ایم پستول، سُم، اِرا ہینڈ گرینیڈ، اسہ آئی ڈی، 4 کلو تراک کروکو مواد، پرائما کارڈ و اسہ موٹر سائیکل ئس برآمد مسنے۔
خیال ئٹ مرے بلوچستان ئٹی سی ٹی ڈی نا کارروائیک مشکوک مریرہ، داکان مُست سی ٹی ڈی نا دروغ ئنا مونتس آک میڈیا و ایلو ذرائع تیٹ دروغ ثابت مسنو۔
دا کارروائی تیٹ کہوکا تا گیشتر نا چاہنداری زوراکی ئٹ بیگواہ کننگوک بلوچ آتا رد ئٹ مسنے و منَہ مذہبی جماعت آتا دزگیر کروک بندغ آتے خلنگ نا شاہدی ہم رسینگانے۔
مستونگ آن پاکستانی لشکر مُسہ بندغ ءِ دزگیری آن پد بیگواہ کرے۔
میڈیا حوالکار تا ردئٹ پاکستانی لشکر کلی کڑک مستونگ ئٹ ننکان اُرا غا چھاپہ خلسہ بلوچ یکجہتی کمیٹی نا راہشون عدنان بلوچ، صحافی ظہیر احمد مینگل و اونا ایلم غوث بخش نا مار محمد عامر ءِ دزگیر کریسہ بیگواہ کرے۔
خاہوت ءِ دائسکان اوفتا بابت ہچو معلومداری اس تننگتنے۔
خاہوت نا ردئٹ چھاپہ نا وخت آ فورسز کارندہ غاک اُرا نا بندغ آتیا بیدادی ہم کریر و موبائل فون تے پُلار تینتون دریر۔
کوئٹہ ٹی مروکا سم کاری و اسہ پین تدینی ئسیٹی شش بندغ بیران، اندن پنجگور آن جون ئس خننگا۔
شابیتی حوال تا رد ئٹ بلوچستان نا بنجائی شار کوئٹہ ٹی باوہ ننگ ئنا پِنا تینا مسڑ و اونا مننگ کروک سنگت ءِ کھسفے، تدینی کوئٹہ نا علاقہ نواں کلی ٹی مس، تومکا جون تے پوسٹ مارٹم کن ہندی ہسپتال آ رادہ کننگا۔
مسڑ تون اوار اِرا بندغ کھسفنگ آن گڈ ڈوہدار نرا۔
کوئٹہ ٹی اسہ کچہ ءُ اُرا ئسے نا چھت تمنگ آن اسہ اُرا نا 4 بندغ کھسکر۔
ریسکیو کروکا تا رد ئٹ کوئٹہ ناعلاقہ دے ٹکی بائی پاس نا خڑک آ اسہ اُرا ئسے نا چھت تما۔ تدینی ٹی بیران مروکا بندغ آتا جون تے کشِسہ اسپتال آ رادہ کننگاے۔
اندن بلوچستان نا ضلع پنجگور نا علاقہ گوارگو آن لیویز کوالخواک اسہ بندغ ئسے نا جون ءِ خنانو ہرا نا چاہنداری نوک آپ نا مار دلبود نا پن ئٹ مسنے۔
لیویز نا رد ئٹ کہوکا بندغ ءِ چھار سُم کاٹم و سینہ ئٹ خلنگناے۔
