بلوچستان نا ضلع کیچ ئٹی اسہ روڈ شکست ئسے ٹی اسہ بندغ اس بیران اندن ایف سی کارندہ ٹپی مسنے۔ داڑان بیدس پسنی ٹیاسہ تدینی سے ٹی اِرا بندغ ٹپی مسنو۔
شابیتی حوال تا رد ئٹ ضلع کیچ ئنا علاقہ تجابان ئٹی ترندی ئٹ بروک اُلاخ موٹر سائیکل ئسے تون ڈک لگا ہرا نا سوب آن موٹرسائیکل آسوار عبدالکریم ولد دلشاد پنی ءُ بندغ اس جاگہ غا ساہ تس و غلام نبی پنی ءُ ایف سی کارندہ اس ٹپی مس۔
ٹپی مروکا بندغ ءِ دمدستی جانجوڑی کن ٹیچنگ اسپتال تربت آ سر کننگا، اسپتال آن رسینگوکا حوال تا رد ئٹ اونا ٹپ آک زیات ءُ ولےحالیت تہ خطرہ آن پیشن ءِ۔
ایلو نیمہ غان پسنی آن رسینگوک آ حوال تا رد ئٹ کوسٹل ہائی وے کلمت کراس آ مچی آن پُھر اسہ مزدا لاری و کرولا اس اسٹ ایلو تونڈک لگانو ہرا نا سوب آن اِرا بندغ ٹپی مسنو۔
تدینی ہمو وخت آ مس ہرا وخت مچی آن پُھر لاری پسنی آن کراچی آ ہِننگ ئس، ٹپی مروک آتا چاہنداری عبدالکریم و غلام نبی نا پِنامسنے۔
بلوچستان ئٹ ہڑدے ئی بنیات آ مروکا دا روڈ شکست آ تیٹ درزن آ بندغ آک بیران و ٹپی مریرہ۔ تدوکا دے تیٹ خضدار ئٹ مروکا روڈشکست ئٹ نوہ بندغ بیران و ہفت ٹپی مسوسر۔
میڈیکل ایمرجنسی ریسپونس سنٹرل نا رد ئٹ برجاء تو ئٹ بلوچستان نا 5 جتا شار ئٹ 911 ٹریفک تدینی مسنے ہرافتیٹ 23 بندغ بیرانو 1317 بندغ ٹپی مسنو۔