اوغانستان ئٹ طالبان نا برخلاف تنظیم نا سروک احمد مسعود اوغان باہوٹی تیان خواست کرینے کہ او طالبان نا حکومت نا ایسری کن’سیاسی‘ کسر اس پٹنگ کن سیوتی ئٹ کوشست کیر۔
فرانسیسی حوالکاری ایجنسی اے ایف پی نا رد ئٹ اوغانستان نا قطبی شار پنجشیر ئٹ طالبان نا برخلاف مزاحمت کروک سلاء بندٹولی نیشنل ریزسٹنس فرنٹ (این آر ایف) نا سروک احمد مسعود پارینے کہ داسا وخت بسنے کہ طالبان ءِ مذاکرات نا ٹیبل آ واپس ہتنگنا کوشست کننگ مرے۔
احمد مسعود ویانا ٹی اسہ کانفرنس ئسے ٹی تران کریسہ پارے کہ ’نن اوغان باہوٹی تے اسہ جاگہ غا ہتنگ خوانہ۔ مدا مدا ہیت و ترانءِ مونی دننگ خوانہ و ہمو ہند اسکان سر مننگ خوانہ کہ ہراڑے ننتو اوغانستان نا آخبت کن اسہ روڈ میپ اس تیار مرے۔ اونا پاننگ ئسکہ نن اسہ پوسکنو سفر ئسے نا بناء غا سر مسونن۔
ویانا کانفرنس ئٹ تقریباً 30 طالبان مخالف باسک اوار مسر ہرافتیان گیشتری باہوٹی نا زند گدریفنگ ءُ۔
احمد مسعود کانفرینس ئٹ پارے کہ اندا زوت ئٹ اوغانستان آن پیشن جوڑ مروک آ باز آ ٹولیک ڈیہہ ئنا تئے ئنا حالیت آن خوش الوس،داسا اختلاف آتے توننگ و ٹپ آتا درمان کننگ نا وخت بسنے۔
او پارے کہ تدوکا سال امریکی لشکر نا پیشتمنگ آن طالبان نا کوزہ زالبول تا حق آتے پد بٹینے و دہشت گرد ٹولی تیکن کسر سافکرینے۔
یاتی مرے احمد مسعود طالبان نا برخلاف مزاحمت کروک احمد شاہ مسعود نا مار ءِ۔ احمد شاہ مسعود ٹولی نا غٹ آن زیات شرفدار آشخصیت ءِ و “پنجشیر نا شیر” ئنا پن ئٹ چاننگک، ہرادے 2001 ئٹی القاعدہ امریکہ ٹی 11 ستمبر نا جلہو تیان اِرا دے مُست خونکریسس۔
اونا مار احمد مسعود اوڑان پد طالبان نا لشکر تا برخلاف مزاحمت بناء کرینے و طالبان نا حکومت ءِ ناجائز پاریسہ مذمت کرینے۔ اوفتاٹولی این آر ایف مئی ٹی طالبان نا برخلاف کاروائی تا پڑو کریسس۔
احمد مسعود پارے کہ ننا مسخت اسُل جنگ ءِ ودکی تننگ اف بلکن ننا مسخت جنگ ءِ ایسر کننگ ءِ۔