بلوچستان نا ضلع کیچ نا تحصیل مند ئٹ آسراتی تا مفننگ اسہ پین معصوم چنا ئسے نا ساہ ءِ الک۔
شابیتی حوال تا رد ئٹ مند نوکیں کہن نا ہندی اسہ سال ئنا زیدان ولد محمد عالم جَکہ نا تکلیف ئنا سوب آن ایمرجنسی سول اسپتالمند آ دننگا ہراڑے آکسیجن سسٹم مفننگ نا سوب آن اودے سیکورٹی کیمپ آ دننگا ولے پن کروک چنا آسراتی تا مفننگ نا سوب آن کذیتکرے۔
یاتی مرے داڑان مالو اسہ چنا اس آسراتی تا وے مننگ آن کذیت کریسس۔
ہندی بندغ آتا پاننگ ءِ کہ تحصیل مند ئنا اسپتال ئٹ ڈاکٹر و ایلو غٹ بنداوی آسراتیک افس۔ تحصیل مند بھاز آ پاکستانی اسمبلی ناوزیر آتا علاقہ ءِ واہم بنداوی آسراتی تا مفننگ وزیر و علاقہ نا بھلا تا بے پامی نا پاش ثبوت ءِ۔
ہندی بندغ آتا پاننگ ءِ کہ مند آن تعلقداری تخوک بنجائی وزیر زبیدہ جلال اِرا دہائی آن داکان گچین مریسہ اسمبلی تیٹ کائک ولے اینواسکان داڑے نا سول اسپتال ئٹ دڑد ئنا اسہ گولی اس ہم ساڑی اف۔
علاقہ نا بندغ آتا رد ئٹ ایف سی کیمپ ئنا تہٹی ٹہیفوک اسپتال آ دننگ اسکان ناجوڑ آتا بھازیک دم ایترہ۔
اوفک صوبائی وزیر صحت آن خواست کرینو کہ سول اسپتال ءِ بحال کننگے و اوٹی ڈاکٹر ہتیسہ بنداوی آسراتی تننگے۔