بلوچستان نا علاقہ تربت ئٹی نادرست سلاء بند بندغ آک سم کاری کریسہ اسہ بندغ ئسے مرگ ئنا گواچی کریر۔
شابیتی حوال تا رد ئٹ تربت نا علاقہ آبسر ئٹ سم کاری آن اسہ بندغ اس مرگ ئنا گواچی مسنے، مرگ ئنا گواچی مروک بندغ نا چاہنداری بابو خان ولد اللہ رکھیہ نا پن ئٹ مسنے۔
پولیس جون ءِ دوئی مریسہ اسپتال آ درے۔ اندن پولیس نا پاننگ ءِ کہ مرگ ئنا گواچی مروک بندغ نا تعلقداری سندھ ئنا علاقہ جیکب آباد آن ءِ۔
پن کروک جلہو نا ذمہ واری ءِ بلوچ لبریشن آرمی نا ترجمان جیئند بلوچ ارفیسہ پارے کہ بی ایل اے نا سرمچار آک تدوکا دے تربت نا علاقہ آبسر ئٹ کوزہ گیر پاکستانی لشکر نا اسہ آلہ کارہ سے سم کاری کریسہ مرگ ئنا گواچی کریر۔
او پارے کہ بی ایل اے نا انٹیلی جنس ونگ معلومداری تس کہ تربت شار و ایب کیب نا علاقہ تیٹ اسہ بیدس قانودی بندغ بابو خان ولد اللہ رکھیہ پاکستانی لشکر کن مخبری نا کاریم سر تننگے۔ پن کروک بندغ دروشم بدل کریسہ جتاء علاقہ تیٹ دا کاریم ءِ سر تننگ ئس اندن اودے پاکستانی لشکر تون اوار ہم خننگاسس۔
جیئند بلوچ پارے کہ پن کروک معلومداری تا سوب آن تدوکا دے بی ایل اے نا سرمچار آک کاروائی کریسہ پن کروک آلہ کار ءِ سم کاری ئٹ مرگ ئنا گواچی کریر۔
جیئند بلوچ نا پین پاننگ ئس کہ بلوچ لبریشن آرمی دا جلہو نا ذمہ واری ءِ ارفک۔ نن مالو ہم درشان کرینن کہ کوزہ گیر لشکر و ڈھکوک ادارہ تیکن کمکاری و مخبری کروک بندغ آک ہرا راج و علاقہ آن تعلقداری تخر اوفتے بشخنگپرو۔