اسے نگاہ اس نما کلام ءِ
نوشت: عمیر مہرُل بلوچ
دی بلوچستان پوسٹ
کُل آن مست سنگت عبدالرحیم زام ءِ اونا شاعری نا کتاب عشق ئنا رنگ ءِ نوشتہ کننگ و اودے شینک مننگ آ اُست نا حُب و سد مہر اٹموارک باد پانہ۔
زام نہ پن ادب نا جہان ٹی پوسکنو پن ئس اسُل اف انتئے کہ زام شاعری آن مُست ہم تینا مخلوق کہ افسانہ اور ناول نہ کتاباتے نوشتہءُ شینک کرینے ، اونا اولیکو افسانوی کتاب “کنا بہشت 2017، ارٹمیکو کتاب ناول نہ دروشم اٹ “سوز ہانُل نا پن ئٹ 2019، مسٹمیکعافسانوی کتاب “تنہائی 2021 شینک کننگانو۔ ہندن اونا دا شاعری نہ کتاب “عشق ئنا رنگ” ہم داسہ دسمبر 2022 ٹی شینک مس۔
شاعری:
ای دا سرپد مریوہ کہ ادب نا جہان ٹی تاریخ دان مرے، افسانہ نگار مرے، ناول نگار مرے یا نثر و ادب نہ ایلو شعبہ غاتان تعلق تخوکاادیب مرے اونا شاعر مننگ آسان ءُ کاریم اس اف، انتئے کہ ناول نگاری، افسانہ نگاری، فلم و ڈرامہ لکھنگ کہ انسان ءِ مچے خواری اوراسے آزموندہ تخوک دوست یا اُستاد ئسے نا خواست مریک۔
ولے شاعری ہمو شوم انگا گڑا ءِ ہرانا ہچو اُستاد اف، ہچو شاگرد اف، ہچو ڈگری اف، ہچو ڈکشنری اف، ہچو زبان اف، ہچو رنگ اف،ہچو نسل اّف۔
شاعری نا پین جہان ئسے، شاعری نہ پین زُبان ئسے و او زُبان نا پِن احساس ءِ، او جہان نا پِن مہر ءِ۔ ہرا اُستٹ احساس زندہ ءِ ہرااُستٹ مہر زندہ ءِ اودے شاعر و شاعری ہر دوسر تو شٙغّف مریک۔ داٹی اودے فرق تمپت کہ شاعر نہ اوڑتون مُر مُر اسکان تعلق ارے یااف او بیرہ ہمو مہر، ہمو فکر ہمو فلسفہ اوفتا مُری ٹی وصل شاغک و ہندُن شاغک کہ بنوکا بندغ ءِ دا لگک کہ دا ہر ہیت ءِ کنکن لکھانےیا دا ہر لوز ءِ دُن دُن لکھانے او تینے آن ہزار تشریح کیک تہ ولے دُن اف واہم دا ہمو قاری نہ مہر ءِ ہرادے او شاعر تو کیک۔
و شاعری قدرت نا پارہ غان شاعر کن اسے نعمت سے اور بالخصوص شاعری کُل جہان کن ہزارا سال مُست و بروکا ہزارا سال پد نامخلوق کن ہم قدرت نہ پارہ غان اسے نایاب، بے مٹ و بے مول ءُ ٹیکی ئسے۔ نن قدرت نا ایلو کُل احسان آتے ہِلین نعمت آتے ہِلین ننانسان آک تنیا قدرت نا شاعری نا ٹیکی نا شکر ءِ ادا کننگ کپّہ نا۔
عشق ئنا رنگ:
کتاب نا سر حال ٹی رحیم زامؔ تینا شاعری نا بارو ٹی پائک کہ کنا داسکان کاٹم کاریم کپک کہ ای دیر کن لکھیوا، ای انتئے لکھیوا؟ اولافسانہ و ناول نوشتہ کریٹہ ہراتم کہ شاعری نا ہیت ءِ کریٹ تو کنا دوستاک مچے پین گوڑینگار۔
او تینا کمبوتی نا ہم ذکر کرینے کہ مننگ کیک کنے غان ردی مرو یا کنا علم ٹی کمبوتی مرو ءِ کہ کنے غان ہمو لوز آک وار وار آ ہر غزلٹی استعمال مننگانو ولے ای دنو ہچو لوز خنتوٹ ہرا ہر غزل ٹی برسہ کار، واہم دا اونا عاجزی ءِ ہرا کنے ہندا سوب آن دوست بس۔ بازجاگہ مجبوری آن ہم بندغ پائک کہ کنے بفک دُن کہ کنا ہنینا شاعر محترم ساحر لدھیانوی صاحب مرے یا پنڈت ہری چند اختر صاحبہرا تینا کمبوتی نہ اعتراف ءِ تو کریرہ ولے اسے جہہ ہم اوفتا کلام ٹی کس ردی یا کمبوتی خنتّو ولے ساحر لُدھیانوی نا زندٹ خرینی چٹباز اس اونا زند کُل مجبوری و دڑد مندی ٹی گدرینگا او اسُل خوشی خنتو اسُل مہر خنتّو ولے ہراتم کہ ساحر قلم ءِ دوئی کرے تو جہان نادڑد آتے مجبوری تے، ارمان تے، مخلوق نا دڑد آتے لوز آتا دروشم اٹ جہان نا کلک آ خلک۔ او دنیا ءِ نشان تس کہ ہرا تم نی کسی ہنینیایتس یا خرینی اونا مٹ و بدل الّمی نی خنیسہ، او تینا اولی کلام ( کتاب) نا پّن ءِ ہم “تلخیاں” یعنی خرینی تخا۔
رحیم نا ویل پین ءِ:
رحیم پائک ای ہرا تم تینے آن سوج کریٹ تو اونا ورندی ٹی کنے سما تما کہ ای مُچ زند بے سُہبی نا گواچی مسونٹ؛ سنگتی ٹی، سیالیٹی، ایلمی ٹی و مہر بشخنگ و مہر ودی کننگ ٹی کنے دا ہم سما اف کہ عشق مسونے کنے یا دا تنیا سرگڑدانی ئسے۔
خیالاتہ زیبائی؛
زام نا قلم ٹی اسے گڑاس کنے بھاز دوست بس تپّرہ کہ دا اونا مزاج ہندُن ءِ یا بیرہ لہجہ تا کہ دُن عاجزی ٹی شاعری کننگ ءِ اودےمجبور کیک ہمو شاعری ءِ کیک ہرا سادہ غا لوز اٹ اُستٹ دڑک ولے ننا خاک نا مخلوق و ننا وطن نا شاعر ہم خرین ءِ و اونا شاعری ہمخرین ءِ دا خرین آ دور اٹ ہنینی اٹ دیر نوشتہ کننگ کیک، دُنکہ ڈاکٹر عالم عجیبؔ صاحب پارے کہ ننا شاعر دور نا سوب آن خرین ءِانتئے کہ ہرا پھل جوّر نا مثل اٹ خل تیٹ کہ رودک تو اوڑان ہنینی نا اُمیت کننگ ظلم ءِ انتئے او بیرہ اودے معلوم ءِ کہ اونا رودنگ ءِ اواخس عزاب مسُنے:
نکے صحرہ نکے دریا ننے گوہا نُمے گوہا
اول تینا پدا دنیا ننے گوہا نمے گوہا
ہرا تینا ہرا سنگت ہرا یاری ہرا دلبر
چڑا پیسہ ہمو رسوا ننے گوہا نُمے گوہا
(صفہ نمبر 77 ::: غزل نبمر 30 )
–
سما مرے نے ننا تو خن کو چراغ ئنا وڑ
دا پند خواری روانا نن کو چراغ ئنا وڑ
نصیر ئسے تو کرار ئنا وڑ کہی بروئے
دا راج ئے کن قلم سخن کو چراغ ئنا وڑ
(صفہ نمبر 90 : غزل نمبر ، 39)
–
خن تیٹ وا بے تُغی ہم زار اسے
نن دراک اٹ زندگی ہم زار اسے
چُپ چُپانی معجزہ سے شار ئکن
کس کرے تو باہ دوی ہم زار اسے
دیر دریا بے خُدی نا موج اٹی
دا روانا عاجزی ہم زار اسے
(ص 51 :: غزل نمبر ، 11)
–
باطن اٹ دُن پوغ مرسا اُٹ تینا
ای کہوٹک عاجزی اٹ زند ئنا
فرد. . . . (ص 50)
ایسر ٹی نغدکاری ئس:
ای دا سرپد ہر شاعر تینا چاگڑد ٹی جتا ءُ فکر و سوچ ئسے آن چاہنگک و ہر شاعر تین تو اوار اوار تینا مخلوق و جہان ٹی ہندی کُلمخلوق نا ہم ترجُمان مریک دا اواہ زی آ فرض ءِ اسُل فرض ءِ کہ تینا راج و ایلو مخلوق نا ہم ترجمانی ءِ کے انتے کہ دا خداداد لائخیئسے و دانا او بائدے حق ءِ ادا کے مخلوق نا دڑد، فریاد، خڑدیک نا اُمیتی، مہر، مابت، مرگ، زند، ہتم، سُہیل و زند نا ایلو فلسفہ تہلکھنگ ہم شاعر آ ُفرض ءِ ولے دا گڑا کنے رحیم زام نا دا کتاب اٹنظر بتو۔
ہندُن سرسری دود نا رِدیٹ جاگہ جاگہ والے دُن اُست پُر الور و گڑاس جاگہ اونا غزلاک تینتو ہم منسوب ئسرہ۔
اُست خوائک جوان اُست جمی اٹ لکھیو ولے دور بھاز تیز ءِ مخلوق سٹی گٹ ءِ کسے اُننگ و خواننگ، چاہنگ کہ وار اف، وا چاہوک تیناسُر اٹ بے خُد ءِ اومیت ءِ کہ بروکا وخت دا کمی تے زام پورُو کرو ءِ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔