بلوچستان نا ضلع خضدار آن اسہ ورنا ئسے پاکستانی لشکر و ڈھکوک ادارہ غاک زوراکی ئٹ بیگواہ کریر۔
خضدار بولان کالونی نا ہندی بشیر احمد نا مار جاوید بلوچ ءِ اینو سہب ئنا دئے بجہ نا وخت اونا دکان آن زوراکی ئٹ بیگواہ کننگا۔
خاہوت نا رد ئٹ مُسہ گاڑی ٹی پاکستانی لشکر و سادہ پُچ بینوک کارندہ غاک جاوید ءِ اونا دکان آن دزگیر کریسہ نادرست ہند آ دریرہراڑان گڈ اونا بابت ہچ وڑ ئنا معلومداری رسینگتنے۔
خاہوت نا رد ئٹ جاوید بلوچ ایگریکلچر یونیورسٹی فیصل آباد آن گریجویشن کرینے اندن دا نیام ئٹ او بلوچ اسٹوڈنٹس کونسل نا کماشہم مسونے۔ دا وخت او خضدار ئٹ اسہ پرائیوٹ اسکول اسیٹ خوانفنگ ئس۔
ضلعی کوالخواک دائسکان دا بابت ہچو ہیت اس مونا ہتنو۔ خضدار شار و ایب کیب ئنا علاقہ تیان منہ دے ئٹی ہفت بندغ ءِ زوراکی ئٹبیگواہ کننگانے واہم دا بابت شابیتی حوال آک مونا بتنو۔
اندن بلوچ اسٹوڈنٹس کونسل فیصل آباد نا ترجمان تینا شینک کروک بیان اسیٹ جاوید بلوچ نا زوراکی ئٹ بیگواہی نا مذمت کریسہ پارےکہ بشیر احمد نا مار جاوید بلوچ ہرا ایگریکلچر یونیورسٹی فیصل آباد نا خوانندہ اس مسونے اودے بیگواہ کننگ افسوز نا کاریم ئسے ودانا نن مذمت ءِ کینہ۔
او پارے کہ بلوچ خوانندہ تے چرجوئی ئٹ بے دادی نا گواچی کننگ نا وے سلوک آ لڑ برجاء ءِ۔ بلوچ خوانندہ تے چرجوئی ئٹ اسہ ٹہیفوکمنصوبہ ئسے نا رد ئٹ خلیفسہ اوفتے زوراکی ئٹ بیگواہی و جتاء وڑ تیٹ ذہنی بے دادی نا گواچی کننگ اسہ ریاستی کاریم اس جوڑمسونے۔
ترجمان نا پاننگ ئس کہ خوانندہ تے دن بیگواہ کننگ خُلیس نا سوب ءِ ہرا نا نن مذمت ءِ کینہ۔ تفوک ادارہ، بڑزکو کوالخواہ و ذمہ وارکڑدہ تیان خواست کینہ کہ جاوید بلوچ ءِ یلہ کننگے و بلوچ خوانندہ تون ناروا سلوک ءِ بند کریسہ اوفتے گیشتر ذہنی اذیت نا گواچیکپس۔
جاوید بلوچ نا بیگواہی آن گڈ راجی احوالکاری تلہ غا جتا فکر ئنا بندغ آک تینا خیال آتا درشانی کننگ ءُ۔
بلوچ اسٹوڈنٹس ایکشن کمیٹی نا سروک ڈاکٹر صبیحہ دا رِدئٹ پارے کہ بلوچ خوانندہ غاک اندا سوب “پروفائلنگ” نا برخلاف برانز کیرہانتیکہ دانا تعلقداری پاش ڈول زوراکی نا بیگواہی تیتون ءِ۔
او پارے کہ اینو خضدار ئٹ خوانندہ غاک اسہ پارہ غان بست بندی کوالخواہ تا تڑی تروک ڈول تا برخلاف برانز کننگو و ایلو پارہ غاناسہ باشعور ورنا جاوید بلوچ ءِ بیگواہ کننگانے۔