افغان طالبان نا سپریم لیڈر ملاہیبت اللہ اخوند زادہ مولوی عبدالکبیر ءِ افغانستان نا پوسکناوزیراعظم تخا۔
عرب میڈیا نا رد ئٹ طالبان راہشون ملا ہیبت اللہ اخوندزادہ اسہ فیصلہ اس شینک کریسہ ملا محمد حسن اخوند ءِ وزیر اعظم نا عہدہ ءِ تریسہ نائب وزیر اعظم سیاسی امور مولوی عبدالکبیر ءِ پوسکنا وزیر اعظم تخا۔
حوال تا رد ئٹ ملا محمد حسن خراب جانجوڑی نا سوب آن عہدہ آن مُر کننگا اندن تدوکا اپریل طالبان نا سرکاری ترجمان تے و حوالکاری کارندہ آتے کابل آن جہندمی افغانستان نا شار قندھار آ سر کننگ نا پرمان تننگا۔
افغان طالبان کمانڈر ملا ہیبت اللہ اخوانزادہ نیشنل انفارمیشن اینڈ میڈیا سینٹر نا سرکماش انعام اللہ سمنگانی ءِ ہم قندھار ٹی ربیدگی و حوال تا سرکماش تخا۔
مبصرین نا پاننگ ءِ کہ دا وڑ ئنا فیصلہ حکومت آ اونا کنٹرول ءِ سخت کننگ، میڈیا آ کنٹرول ءِ اڑزان آسرات کننگ و تحریک نا سرکماشی نا اوغدہ تا پڑو ءِ اڑزان ڈول ئٹ کننگ تون اوار اوار افغان میڈیا ءِ سوگو کننگ نا پوسکنا گام تا نمائندگی کیک۔