نائجیریا نا جاندم دے ٹکی علاقہ ئٹ سلہہ بند بندغ آک اسہ امریکی قافلہ ئسے آ جلہو کریر ہرا نا سوب چار بندغ مرگ ئنا گواچی مسر۔
پولیس نا رد ئٹ درو ریاست انمبرا ٹی مروک جلہو ئٹ مرگ ئنا گواچی مروک آتیٹ اِرا امریکی قونصل خانہ نا ملازم اندن اِرا پولیس کارندہ اوار ئسر۔
جلہو کار آک پین مُسہ بندغ ءِ برمتہ کریر و اوفتا گاڑی ءِ ہشار۔
واشنگٹن نا پاننگ ءِ کہ دا قافلہ ئٹ اسہ امریکی شاری اس ہم اوار الو، ہرا بے دادی و آجوئی دوست شورش آن زہمی ریاست ئٹ سفر کننگ ئس۔
نائجیریا نا پولیس نا پاننگ ءِ کہ دا جلہو اوگبارو نا علاقہ ئٹ اتانی اسامہلے کسر آ مس۔ پولیس نا ترجمان ڈی ایس پی آئکنگا توچکوو نا پاننگ ءِ کہ سکیورٹی فورسز آک دا وخت ریسکیو و ریکوری آپریشن کننگ ءُ۔
برطانوی حوال تروک ادارہ ءِ ایتوک اسہ بیان اسیٹ امریکہ دا ہیت ءِ پک کرینے کہ ’16 مئی آ ریاست انمبرا ٹی اسہ تدینی اس مونا بسوسس’ و ودیک پارے کہ واشنگٹن جلہو نا پٹ و پول کن نائجیریا نا سکیورٹی فورسز آتون اوار کاریم کننگ ءِ۔
امریکی محکمہ خارجہ نا پاننگ ءِ کہ ‘ننا کارندہ تا رکھ ساندہ کل آتیان اہم مریک و نن پٹ ئٹ سفر کننگ وخت آ بھلو کچ اسیٹ خیالداری منصوبہ جوڑ کینہ۔’
نائجیریا نا کوالخواک بے دادی آ جلہو تا دوبہ ءِ ہر وخت آجوئی دوست آئی پی او بی آ خلیرہ۔ واہم دا جلہو نا بابت اوفتا ہیت دائسکان مونا بتنے۔