صحبت پور: بی آر جی نا جلہو ئٹ پولیس آفیسر مرگ ئنا گواچی

الّمی خوانبو

سٹیشن ہاؤس آفیسر (ایس ایچ او) پولیس ضلع صحبت پور پنچ شمبے نا دے سم کاری نا اسہ تدینی اسیٹ مرگ ئنا گواچی مس۔ جلہو نا ذمہ واری ءِ بلوچ ریپبلکن گارڈز ارفے۔

پولیس نا رِدئٹ نادرست بندغ آک ایس ایچ او عادل پور ضلع صحبت پور نا گاڑی آ سُم کاری کریر، سُم کاری آن ایس ایچ او میر محمد کھوسہ ہند آ مرگ ئنا گواچی مس و اِرا پولیس کارندہ ٹپی مسر۔

جلہو کروک آک نادرست ہند آ نرار۔ پولیس ہند آ سرمریسہ جوْن ءِ ہسپتال آ درے۔ سپرنٹنڈنٹ پولیس (ایس پی) صحبت پور سجاد ترین و ایلو بھلا افسر آک ہند آ سر مریسہ پٹ و پول ءِ بناء کریر۔

جلہو نا ذمہ واری ءِ بلوچ سلہہ بند گل بلوچ ریپبلکن گارڈز ارفے۔ گل نا ترجمان دوستین بلوچ شینک کروک بیان اٹ پارے کہ پولیس آفیسر کوزہ گیر پاکستانی لشکر و ڈھکوک ادارہ تا پاننگ آ بلوچ جہد آزاتی نا برخلاف کاریم کننگ ئس، داڑان بیدس وہ بلوچ آتا زوراکی ئٹ بیگواہی و زوراکی ئٹ زَر ہلنگ ئٹ اوار ئس۔

دوستین بلوچ پولیس ءِ خبڑدار کریسہ پارے کہ بلوچ تحریک نا برخلاف کاریم کروک پولیس و لیویز کارندہ غاک تینا دا عمل ءِ ایسر کیر۔ او پارے کہ پولیس و لیویز ئٹ زیات بلوچ آک ءُ ہرانا سوب اوفتے ٹِک کننگپک ولے کوزہ گیر نا پاننگ آ کاریم کروک آتے دژمن نا ڈول اوننگو۔

ایلو پارہ غا ضلع ہرنائی نا علاقہ زردآلو ئٹ استو مروک اِرا پد مہ پد بمب تراک آتیٹ اِرا بندغ مرگ ئنا گواچی و شش ٹپی مسونو۔

لیویز نا رِدئٹ نادرست بندغ آک سڑک نا کرک آ تراکی مواد کڈ کریسر ہرانا تراک آن اِرا بندغ ہند آ مرگ ئنا گواچی مسر۔

اوفتا پاننگ ءِ کہ تراک آن گڈ ہراتم مخلوق ہند آ مُچ مس انداڑتون ارٹمیکو تراک مس ہراڑان پین شش بندغ ٹپی مسر۔ ٹپی تے سول ہسپتال کوئٹہ نا ٹراما سینٹر آ دننگا و اِرا ٹپی ءِ ہندی ہسپتال آ دننگا۔

ہسپتال کوالخوا تا رِدئٹ سول ہسپتال آ چار ٹپی ءِ ہتنگانے ہرافتیان اِرٹ نا حالیت خلیس ئٹی ءِ۔ مرگ ئنا گواچی مروک اِرا بندغ نا جوْن تے اوفتا خاہوت آتے تننگا۔

تدینی نا پابت پٹ و پول برجاء ءِ، دائسکان سوب آک سما تمتنو۔

پُوسکنا حوالک

بلوچ راجی مچی نا بشخ مرِسہ جہان ءِ نشان ایتبو کہ نن زندہ و شرفدار ءُ راج ئسے اُن۔ ماہ رنگ بلوچ

بلوچ راج 28 جولائی نا دے گوادر ئٹ سرمریر و جہان ئے کلہو ایتر کہ نن زندہ و خوددار...