ہولوکاسٹ آ تبصرہ کننگ نا سوب فلسطینی صدر آن پیرس داد پدا ہلنگا

فرانسیسی بنجاہی شار پیرس نا میئر اینی ہیڈالگو فلسطینی صدر محمود عباس آن ہولوکاسٹ نا باروئٹ تبصرہ کننگ نا سوب پیرس نا اہم داد ءِ پدا ہلکنے۔

فرانسیسی نیوز ایجنسی اے ایف پی نا ردئٹ میئر نا دفتر پارینے کہ ’ارٹمیکو جہانی جنگ ئٹ یورپ نا یہودی تا ایسری ءِ جائز پن کننگ آ محمود عباس آن گرینڈ ورمیل میڈل پدا ہلنگک۔‘

پیرس نا میئر درو فلسطینی صدر ءِ چٹھی اس نوشتہ کرے کہ ’نی ہرا تبصرہ ءِ کریس او ننا جہانی اقدار و دیہاڑی راستکی نا برخلاف ءِ۔ اندا خاطران نے دا شرف تننگ مفک۔‘

دا چٹھی نا متن ءِ فرانسیسی یہودی تا کوالخواہی کروک گل ’کونسل آف فرنچ جیوش انسٹیٹیوشن‘ نا صدر یوناتھن ارفی ٹوئٹر آ پوسٹ کریسہ نوشتہ کرے کہ ’دا فیصلہ آن پیرس نا شرف ودا و شار ئنا یہود دژمنی نا برخلاف ارادہ گیشتر سوگوْ مس۔‘

محمود عباس تدوکا تُوہ رملہ ئٹ اسہ تران ئسے نا وخت پارے کہ ’ہولو کاسٹ ئٹ یہودی تے اوفتا مذہب نا سوب آن آخہ بلکن چاگڑدی کڑد نا سوب کسفنگا۔ دا راستکی اس اف کہ ہٹلر یہودی تے دا خاطران کسفے کہ اوفک یہودی ئسر۔‘

او دعویٰ کرے کہ ’یورپ یہودی تیتون مذہب نا آخہ بلکن اوفتا چاگڑدی کڑد نا سوب جنگ کرے۔ سود و زر نا سوب آن۔‘

میئر چٹھی ٹی نوشتہ کرے کہ ’نی ارٹمیکو جہانی جنگ ئٹ یورپ نا یہودی تا لس خون ءِ جائز پن کریس و نسل کشی آن پاش ڈول نمن کریس۔ ای نا دا ہیت ئنا ترند مذمت کیوہ۔‘

یاتی مرے محمود عباس ءِ دا داد 2015 ئٹ پیرس نا دورہ نا وخت تننگاسس۔