بالی وڈ ئٹ ’کنگ خان‘ پاننگوک اداکار شاہ رخ خان نا فلم ’جوان‘ درو ریلیز مسنے و او اولیکو دے آ باکس آفس آ 65 کروڑ انڈین روپئی دوئی کرینے۔
’لائف اسٹائل ایشیا‘ نا ردئٹ شاہ رخ خان اٹلی کمار نا ہدایت کاری ٹی جوڑ مروک دا فلم ئٹ کاریم کننگ کن 100 کروڑ انڈین روپئی زر حق نا دروشم ئٹ ہلکنے اندن فلم نا کمائی نا 60 درسد زر ہم کنگ خان نا بشخ ئٹ برور۔
حوال تا ردئٹ ’جوان‘ فلم ئٹ اداکاری کروک پریامانی اِرا کروڑ انڈین روپئی زر حق نا دروشم ئٹ ہلکنے۔
دا فلم ئٹ اداکارہ دپیکا پاڈوکون ءِ ہم خاص ولے چنکو کڑد اس تننگانے و او دا فلم ءِ کننگ نا 15 کروڑ انڈین روپئی زر حق نا دروشم ئٹ ہلکنے۔
اگہ ’جوان‘ نا کسہ نا ہیت کننگے گڑا دا جُوانی و گندئی نا نیام ئٹ فرخ نا کسہ ئسے ہرا نا وسیلہ ئٹ چاگڑد ئٹی زالبول تا کڑد ءِ سوگوْ جوڑ کننگ نا کوشست کننگانے اندن دا فلم ئٹ شاہ رخ خان تینا دروشم ءِ بدل کریسہ کیک۔
’جوان‘ نا کاسٹ ئٹ شاہ رخ خان، نائنتھارا، وجے سیتھوپاتھی، پریامانی، ثانیہ ملہوترا و سنیل گروور اوار ءُ اندن دپیکا پاڈوکون دا فلم ئٹ خاص کیمیو رول کننگ ءِ۔