کوالخواہ تا ردئٹ استو مراکش ئٹ کوہ اطلس نا علاقہ ٹی مروک ترند زمی جمب نا سوب کم آن کم 296 بندغ ساہ تسنو و 153 ٹپی ءُ اندن کیہی ماڑی تے ہم نسخان رسینگانے۔
احوال تروک ادارہ روئٹرز نا ردئٹ مراکش نا وزارت داخلہ اسہ بیان اسیٹ پارے ’زمی جمب آن الحوز، ماراکیش، اوارزازیٹ، عزیلال، چیچاؤ و تارودنٹ نا صوبہ و میونسپلٹی تیٹ 296 مرک مسنے۔‘
وزارت اسہ بیان اسیٹ پین پارے کہ 153 بندغ ٹپی مسنو ہرافتے اسپتال آ دننگانے۔
مراکش نا جیو فزیکل سینٹر نا ردئٹ کوہ اطلس نا مَشی آ لڑ ئٹ صوبہ الحوز نا علاقہ اغیل ئٹ بروک آ زمی جمب نا ترندی 7.2 ئس اندن امریکی جیو لوجیکل سروے نا پاننگ ءِ کہ ہندی وخت ئنا ردئٹ جمعہ نا نن 11 بجہ 11 منٹ آ مروک زمی جمب نا ترندی 6.8 و اونا بنجاہ مراکش آن 71 کلومیٹر جاندم دے کہی ٹی 18.5 کلومیٹر کڑمبی ٹی ئس۔
ہندی کوالخواہ تا ردئٹ زمی جمب آن زیات نسخان مَشی آ علاقہ تیٹ مس، ہراڑے اسکان ہننگ سخت ءِ۔
زمی جمب نا بنجاہ آن خڑک انگا بھلا شار ماراکیش نا بندغ آک پاریر کہ متکنا شار ئٹ گڑاس ماڑی بھس مسر، ہرا یونیسکو نا جہانی دود و ربیدئی مڈی ٹی اوار ءِ۔ ہندی ٹیلی ویژن نا فوٹیج و چاگڑدی احوالکاری تلہ غا پوسٹ کروک کروک ویڈیو تیٹ زمی جمب آن بھس مروک ماڑی تا مِشک خننگ مریرہ۔
’ڈغار کم و ود 20 سیکنڈ چنڈہ ٹی مس‘
تاروڈنٹ آن خڑک حامد افکار پنی ءُ اسہ استاد اس پارے کہ زمی جمب آن گڈ او تینا اُرا غان پیشن پیش تماسس و بنائی زمی جمب آن گڈ پین چنڈہ ہم مس۔ او پارے کہ ’ڈغار کم و ود 20 سیکنڈ اسکان چنڈہ کرے۔ ہراتم ای ارٹمیکو مزل آن شیف دڑنگاٹ گڑا درغ آک تینتون تینٹ ملنگار و بند مسر۔‘
ماراکیش آن تعلقداری تخوک 33 سالی عبدالحق الامرانی اے ایف پی ءِ ٹیلی فون آ پارے: ’نن ترند چنڈی ماران و کنے احساس مس کہ دا زمی جمب ءِ۔ ای ماڑی تے لڑزنگ آ خناٹ۔ الّمی اف کہ ننتون دا ڈول نا حالیت آ ردعمل ساڑی مرے۔ پدا ای پیشن ہناٹ و اوڑے بھاز بندغ ساڑی ئس۔ غٹ بندغ آک لپڑزہ و فریشان ئسر۔ چناک ہوغارہ و لمہ باوہ غاک فریشان ئسر۔ بجلی 10 منٹ اکن بند مس و (ٹیلی فون) نیٹ ورک ہم، پدا دا غٹ ملنگار۔ کل بندغ آک پیشن رہینگنگ نا فیصلہ کریر۔‘
ماراکیش نا اسہ پین ہندی فیصل بدور پارے کہ ہراتم زمی جمب مس او گاڑی چلفنگ ئس۔ او پارے کہ ’ای سلیسوٹ و کنے مارشت مس کہ دا بھس کاری ئسے۔ دا بھاز بھیم بش کروک ئس دنکہ دیر دریاب نا کرک آن پیشن پیش تمے۔ بندغ تا چیہانٹ و ہوغنگ سگنگ نا لائخ الو۔‘
ہندی احوالکار تا ردئٹ زمی جمب نا بنجاہ الحوز خلق ئٹ اسہ اُرا ئسے نا بھس مننگ آن اسہ خاہوت اس مِش تا کیرغ آن کڈ مس و ماراکیش نا اسپتال آتیٹ ٹپی تا بھلو کچ اس خننگانے۔
زمی جمب نا چنڈیک دریابی شار رباط، کاسابلانکا و ایساویرا ئٹ ہم مارنگار۔
ماراکیش آن 200 کلومیٹر دے کہی ٹی ٹہفوک ایسوئیرا نا ہندی اس پارے کہ ’بھاز زیات نسخان متو۔ زیات لپڑزئی ءِ۔ زمی جمب نا وخت نن چیہانٹ آتا توار ءِ بنگن۔ بندغ آک کسر و کیفے تیٹ سر مسر۔ او اُرا تیان پیشن خاچنگ ءِ اہمیت تننگ ءُ۔ اُرا تا مون ئنا بشخ آتا بور آک ڈغار آ تمار۔‘