پنجگور ئٹ صباء دشتیاری ادبی مجلس
ٹی بی پی سرگپ
بلوچستان ئٹ پنجگور نا حساب شورش آن زیات زیمی مروک ضلع تیٹ مریک، ہراڑے ڈیتھ اسکواڈز آتے لُٹ و پل، زوراکی نا بیگواہی و خون کننگ کن یلہ ہلنگانے۔ سد آ ورنا تے سیاسی کاریم تا بدل ئٹ زوراکی ئٹ بیگواہی نا گواچی و کیہی تے کسفنگا۔
پنجگور نا مخلوق ڈیتھ اسکواڈ آتا ظلم نا برخلاف چرجوئی ئٹ برانز نا کسر ءِ ہلیسہ کرینے ولے دا ٹولی تے گمانی وڑئٹ فوجی اسٹیبلشمنٹ نا مُخ تفی دوئی ءِ۔ پنجگور ئٹ دئے سال آن راجی و خوانندہ سیاست آ بیدس پڑو رکھ ءِ۔ مذہبی تنظیم آک چنا تا اسکول تے ہشار و مذہبی ٹولیک شئیر و باگل نا مجلس تے ڈپٹی کمشنر نا وسیلہ ئٹ بند کرفیر۔ یونیورسٹیک خوانندہ گل آتے کتاب مُچی و سیاسی و ادبی کاریم کننگ کن موکل تننگ آن نمن کیرہ، خوانندہ سیاست نا کسرک بند کننگانو۔
صباء دشتیاری بلوچ ادب ئٹ بھلو خذمت سر تسنے، و اونا بھاز انگا خواری تیان جوڑ مروک سید ہاشمی ریفرنس لائبریری بلوچ ادب نا نہادی آ مڈی ءِ۔ پنجگور نا دا حالیت آتیٹ صباء دشتیاری ادبی مجلس ہڈ تننگ جوان ءُ کاریم ئسے ہرا سیاسی و ادبی کاریم تا کسر ءِ ملنگ نا سوب جوڑ مننگ کیک۔ چاگڑد سلنگ کپک و چاگڑد نا دیمروی کن سیاست، ادب و فن ئنا کاریمک الّمی ءُ۔
بلوچستان ئٹ سیاسی جنز آتے توننگ کن مذہبی انتہا پسندی نا بِج ءِ دسنگ نا کوشست کننگک، ہرانا توننگ کن دیمروی دوست ادارہ تا ذمہ واری ودک۔ بلوچ چاگڑد ئٹ غیر سیاسی طاغت آتا کسر ءِ توننگ کن پروگریسو ادارہ و ٹولی تا سیاسی و ادبی کاریم تے برجاء تخنگ الّمی ءِ و پنجگور ئٹ صباء دشتیاری لٹریری فیسٹول کون آ ادبی کاریمک بلوچستان نا ایلو علاقہ تیٹ ہم ہڈ تننگ مریر۔