بلوچستان نا ضلع ڈیرہ بگٹی آن فوجی آپریشن و سلہہ بند بندغ آتا نیام ئٹ جھڑپ نا حوال آک ءُ، اندن آپریشن نا وخت فورسز کارندہ آک منہ بندغ ءِ دزگیر کرینو ہرافتیٹ دائسکان چار بندغ نا چاہنداری مسونے۔
بیگواہ مروک آتا چاہنداری عزیز بگٹی، سلیمان بگٹی، حاجی میاں خان بگٹی و علی بخش نا پن آن مسونے۔ پن کروک بندغ آتے تدوکا نن ڈیرہ بگٹی نا علاقہ آدل کالونی و دیناری کالونی آن دزگیر کننگانے۔
ایلو پارہ غان ضلع ڈیرہ بگٹی نا تحصیل سوئی نا علاقہ گنڈوئی ، سوناری مٹ ، سردار پٹی ، اوچ نا علاقہ بشک ، ڈیم ، لاغر داوان تون اوار جتاء علاقہ آتیٹ پاکستانی لشکر شابیت آپریشن ءِ بناء کرینے ہراٹی ہشت گن شپ ہیلی کاپٹر بشخ ہلنگ ءُ، کیہی اُرا تیا بمباری کریسہ بھس کریر ہرانا سوب آن جانی نسخان آتا حوال آک ءُ۔
سوئی نا خڑک آن سلہہ بند بندغ و پاکستانی فورسز نا نیام ئٹ جھڑپ نا ہم بیدس پک مروک حوال ءِ، واہم علاقہ ٹی برجاء آپریشن نا سوب بیدس پک مننگ سختی تیتون مون تننگ ءُ اندن دا بابت کوالخواہ تا ہیت دائسکان مونا بتنے۔
بلوچ لبریشن ٹائیگرز نا ترجمان میران بلوچ بیان اسیٹ پارینے کہ لس آباتی آ جلہو کروک پاکستانی لشکر ءِ توننگ کن بلوچ سرمچار آک جنگ تننگ ءُ۔