ندارہ (اولیکو بشخ) | اختر ندیم بلوچ – گندار بلوچ

ندارہ

(اولیکو بشخ)

نوشتکار: اختر ندیم بلوچ | مٹ: گندار بلوچ

دی بلوچستان پوسٹ

کریمہ:
لمّہ جان، دا وختا کہ ای نیتون ہیت کننگ اُٹ، ای تینے زور ئٹ منّیفنگ اُٹ کہ نی ننا جہان ئٹ افیس۔ نا ہِننگ آن گڈ ای مودہ ئس نوشتہ کریٹ ولے نی کہ ساجد کن گڑاس نوشتہ کریسُس، نا لیکہ ءِ بِننگ آن گڈ ای دُوئٹ (دانستہ) دا شئیر ئے شنگ کتوٹ، انتئے کہ ای نا رُوح ءِ ڈکھ تننگ خواہتوٹہ۔ اسل آکنے ہچ ویل الو، ولے ای باز ویل آتیا امنائی کننگ ہم کپرہ انتئے کہ باز معاملہ آتے ای پین نظراٹ ہُریوہ و نی پینٹ ہُریسہ۔ ہئو ولے ای نا لیکہ آتے رد ہم کننگ کپرہ۔

ای نا لیکہ آتا منوک ئسے اُٹ ولے بشخس کہ اندن کہ نی پاریس و کننگ خواہسوس، ای اخس جیڑاٹ نیتون امنائی کننگ کتوٹ۔

لمّہ! اگہ ای رد افٹ گڑا ہیت آک داد ءُ کہ نی باز آ جیڑہ آتا بِسنگ کن صبر کتوس و وخت آن مُست ہیت کننگ خواہسوس۔ دا ڈول ننا نیم خامہ انگا سیاسی دود و سگ آن تیرو ہیت ءُ۔ انتئے کہ باز آ جیڑہ آتے کہ نی ہمے وختا ہُننگ خواہسوس، اوفتا کسرا بننگ کن وخت خواہیسکہ۔ نی ندارہ آتا تہٹی باز خوش رنگی خننگ خواہسوسہ ولے راستی اندا اس کہ نا طب ئنا زیبائی زندہ غا کڑد آتیٹی الو۔ نا خن تا ملاسی ہر وختا خوش رنگ ءُ ندارہ پٹاکہ۔ کنے یات ءِ کہ نی ہَیکان آ بسوسس۔ نن کُل ندارہ آتے اخس گچین ہُننگ اسُن، ولے نے ہچ دوست بننگ الو۔ نی ملور اسوس۔

اسہ دے ئس ای خناٹ نی یکہ تولوک و چُنکو پوسکن رُدوکو بوچ ئسے باز خوڑتی ئٹ ہُننگ اسوس۔ ای ہڑانڈ شاغنگ خواہتوٹ۔ ای اندا خیال کریٹ کہ نی شئیر ئس جھیڑنگ اُس۔ ای ایلو دے نے سوج کریٹ کہ درو نی بوچ ئسے تون اڑینگوک اسوس، گڑا ہراڑے سر مس نما ہیت و تران؟ نی زرس بشخندہ کریس، ولے ہچ پاتوس۔ ای کہ جاہلی کریٹ تو نا ورندی دُن اس کہ کنا و نا گنوکی نا فرخ اندادے کہ نی ندارہ آتا تہٹی تینکن پنوکو شئیر پٹیسہ، ای ندارہ آتا تہٹی گوازی کننگ خواہوہ۔ نی ندارہ آتے پُھلنگ خواہسہ، ای ندارہ آتتون سازگر نا وڑ ہِننگ خواہوہ۔ پین دیچہ انت انت نگرہ کون ءُ ہیت پاننگ ئسوس۔ ای تینا عادت نا رِدئٹ ہیت ءِ نا باہ آن پُھلاٹ۔ ای پاریٹ “داسا فلسفہ ءِ ہلے درو نا شئیر ءِ پار۔ نی مخاس و پاریس، ہُر نے کنا شئیر ئنا بِننگ آن زیات تینا شئیر ءِ بِنفوئی ءِ۔ دا وختا ای ہچ خواہپرہ کہ تینا تب ئنا “ماں بہن” ءِ کیو۔ کنا و نا اسٹ آ ہیڑکو مخا و کنا و نا عکس ئس کشا۔

برجاء۔۔۔