ندارہ
(ارٹمیکو بشخ)
نوشتکار: اختر ندیم بلوچ | مٹ: گندار بلوچ
دی بلوچستان پوسٹ
لمّہ
لمّہ! کڑد آتے ہڷ ءَ تور کننگ برجاء آ زند ئٹی اڑزان اف۔ ای ہرا وخت کہ قلم ءِ ہرفیوہ کنا دوست ءُ بندغ ئس خَر کیک۔ چراگ نا اُستا بریک؟ ای کہ چراگ ءِ نوشتہ کریٹ، ای خواہتوٹ کہ گٹ گیر مریو ولے نا طب آ الو انتئے کہ منَہ کڑد اندنو اریر کہ اوفتیان برجاء غا زند ئٹی اسہ اِرا کڑد ئنا خر کننگ نا گمان مریک۔ ای توریٹ، ولے چراگ او وخت ئنا گرج اسک، کنا خیالا۔ نی امنائی کتوس۔
اندا سوب آن ندارگ کہ ہِننگ ءِ، ای خواہوہ کہ زوت ہنوکا وخت ئنا گچینا کڑد آتا منَہ ہنینو یات تینا قلم نا باہوٹ کیو۔ جہد اندا مرے کہ برجاء غا زند ئنا کاریم تیٹی اڑاند بف۔ ایہن برجاء غا زند ئٹی ندارہ آک تہار مریرہ۔ گیشیفنگ تا کبین مریک۔ صبر کننگ خواہک کہ ندارہ آتا دنز تولِہ گُڑا قلم کاریم ہلنگ مرے۔ ایہن کنے ردانک ئٹی صافی دوست بریک۔ ای خوشونت سنگھ نا “ٹرین ٹو پاکستان“ ئے خواناٹ۔ پین باز آ ناول آک اریر کہ بندغ ءِ راستی نا گمان مریک ولے ایہن راستی نا حقی آ سبخ ہم صافی ءِ۔ ولے راستی ہمو وختا کہ زوراک آتا بارِث ئٹ مریک گڑا اودے سگھنگ کبین مریک۔
داسا بی بی سی آ جان سلف نا لیکھ ئس مونٹی بسک۔ ای دیچا خواناٹ یا کاٹم آن گدریفیٹ۔ دا لیکھ بی بی سی نا ”کلچرل سیریز“ نا کنڈ آن شنگ مسنے۔ دادے جان سلف ہمو کتاب آتا زیہا لکھانے ہرافتا زیہا رکھ خلنگانے۔ ہمو رکھ آتا برخلاف اسہ تنظیم ئس کاٹم ہرفینے۔ دا نا خواننگ آن پد سما تمک کہ راستی دا جہان ئٹ اخس بیوس ءِ کہ نہ مذہب نا جیب ئٹ جاگہ کیک، نہ چاگڑد نا کچ آ بریک، نئے بیرہ پن ئنا جمہوریت، لبرل و سوشلسٹ جہان نا پڈ ئٹ جاگہ کیک۔ راستی ہنگمین ءِ زوراک آتا ہڷ ءَ تور کننگ کن۔ ولے دا زہر ئنا جوش (ہلہل) اسے زوراک آتا اختیار و سواد آتا مون ءِ توننگ کن۔
ہرا وخت کہ زانت و چاننگ اختیار دار آتا سوت و اختیار آتا گٹ ئٹ ہلیک، او قانود ٹہیفرہ کہ دا لیکھہ یا دا ہیت چاگڑدی اخلاقیات آن چھپ ءِ۔ داسا نی اگہ زوراک آتا دا روشت ءِ خنس نے ہم تینا خیال و نظریہ بندی کروئی تمو۔ اندا سوب آن ای ہم کوشست کیوہ کہ تینا قلم نا مہار ءِ سوگوْ توریو۔ خنسہ کنا بڑز ئنا چار انگا لوز آک کہ ای ندارہ نا اولیکو بشخ ئٹی پاریٹہ، ولے متو۔ اونا شنگ مننگ آن گڈ ای ماراٹ کہ دُن مف کہ پدا دوست ءُ بندغ ئسے نا اُست ہُسون مرے۔
لمّہ جان! نی ہمو بندغ اُس کہ ای گمان کیوہ کہ ای نا بھاز خڑک انگا سنگت اُٹ۔ کنا خیال ای رد اُٹ۔ نی اسہ اندنو کڑد ئسے اُس کہ کس آن مُر افیس۔ نے ہرکس کنا وڑ تینتون بھاز خڑک سرپند مریک۔ دیچا دیر نا بشخ ئٹی نا مہر ئنا ارا ہنینا سسُا تما۔ ای تینے اوفتیان جتا کننگ خواہپرہ۔
لمّہ جان! بر داسا ندارہ نا کنڈ آ کان۔
ای، نی و ننا اسٹ آ ایڑکو کاپر نا شیف آ تولوک ئسون۔ چراگ (رزا جان) نا بارث ئٹ سوچنگ ئسون۔ نی ہمو دے آ تینے آن تینٹ حوالکار ئس جوڑ اسوس۔ نی کنے پاریس چراگ نا بارث ئٹ گڑاس پار۔ ای پاریٹ چراگ ءِ ہلے، چراگ ننے جوانو دو ئس خلک۔ اسہ پاس ئسے کن زمانہ سلیس۔ بے تْرک و توار۔ ای، نی و اود، کس ہچ پاننگ الو۔ ناگمان آ ای سما کریٹ کہ نے سر و سوج کروئی ءِ۔ ای پاریٹ ہئو، ولے چراگ ایہن کنا خڑک ئنا سیال ئسے۔ او پین ہیت ئسے کہ ننا اسٹ ایلو نا اُراغا ہن و بر متنے۔
ای اولیکو وار چراگ ءِ تینا اُراٹی خناٹ کہ ملین کنا رہا ہیسس تا۔ ملین کنے اونا بارث ئٹ پارے۔ ای پاریٹ جوانے سنگت ایت حوال تے، امرے سیاست۔ چراگ بناء کرے، او اندنو حساب ئسیٹی بلوچ سیاست و وخت ئنا گرج آ تران کرے کہ ای اولیکو وار آ ماراٹ کہ داسا بلوچ نا بد آ دیک کم ءُ۔ انتئے کہ دا ورنا تینا راج ءِ راجی بد آتیان زیات سرپد ئسک۔ ننا کچاری ہُرے سکان برجاء اسک۔ ای بس اونا ہئو ءِ توریٹ، بے ترک و توار بِننگ ئسوٹ۔ ایسر ئٹ ٹہک ئس تِسک و پارے خواجہ ای نا مغز ءِ کُنگٹ ولے نن بی ایس او والا اُن، ننے برداشت کننگ المی ءِ۔ ای پاریٹ تا، نہ پُھل نی کنا مغز ءِ کنتوس، کنے اُست جم کریس کہ کنا پند بے سواد افک۔ او پدا مخنگ اٹی لگا۔ پدا گڑا چراگ اسک، سیاست اسک، نن اسُن۔ چراگ چِوہ سیالی آن سنگت و سنگتی آن چُنا مسک کنے گمان متو۔
چراگ ءِ کنا ہر گڑا نا گڑتی اسک۔ کنا پُچ، یا کنا پازوار امر مرے، پپیتا نا خواننگ انتئے خراب ءِ، ہر گڑا نا گڑتی۔ او پپیتا ءِ کنے آن پُھلا۔ اودے تینا وڑا خوانفنگ اسک۔ چُنا تا ذمہ واری ہمو نا زیہا اس۔ ہراڑے ہرا وخت امر مرے کنے کاریم الو۔ پدا اسہ دے ای چھٹی آ اُراغا بسوٹ۔ وخت اندا پوتاری تا اسک۔ ای اسہ ہمراہ ئسے تون وتاخ ئٹی تولوک و چلم کشنگ ئسوٹ۔ ٹی وی آ وش نیوز نا چینل خلوک اس۔ ای خناٹ کہ چراگ اسکول ئٹی بی ایس او نا ورنا تتون تران کننگ اس۔ ای ہبّکہ مسوٹ۔ اگہ کنے جوان یات مریک کنا رہا حاکمُ (شہید رحمت خان) تولوک اسک۔ ای پاریٹ دا انت گنوکی کننگ ءِ۔ دادے دیر پارے کیچ آ ہنک۔ گنوک مسنے۔ ای ربڑنگ ئسوٹ۔ ایلو دے کنے واجو کال کرے۔ اونا توار پنوک اس۔ پارے حال آن سئی اُس؟ ای پاریٹ ہئو۔
اسہ وار پدا چانڑدہ اگست نا شوم آ دے ئسک
برجاء۔۔۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔