پاک انگا مہر ئنا خوْن
نوشت: سعدیہ بلوچ
دی بلوچستان پوسٹ
شاہ میر و اونا ہلہ نا مسڑ نازو نا چنکی اوار گدرینگاسس، ورنائی نا درگہ آ او اوار نتے تخاسر۔ ہراتم کہ او چنک ئسر ہڑتوماک زئے دریرہ خوافنگ کن۔ زہ اسہ کنڈا خوائسکہ۔ او ہڑتومکاک خیر ئنا اسہ کنڈ آ توسرہ گوازی کریرہ۔ دے ئس خیال بسکہ تا گڑا ہرارہ کہ زہ کسس نا کشت و کشار ٹی تموک ءِ اوفک گوازی ءِ ہلارہ رمب کریرہ زہ ءِ کشت کشار آن کشارہ۔ بھاز وخت شار والاک اوفتا شکائست ءِ کریرہ کہ دا چناک کشت و کشار آتا خیال ءِ کپسہ۔ اسہ اِرا وار اُراغان اوفتے دڑکو ہم تسر کہ نم زہ آن بے خیال مفبو۔ ولے چنکی نا وخت عجبو وخت ئس مریک۔ دنیا جہان نا غم، فریشانی، جنگ جیڑہ، دھوکہ بے ایمانی، تینا خوئشی کن ایلوفتا ارمان آتا خون ءِ کننگ، تینا اُرا ءِ آبات کننگ کن ایلوفتا اُراتے بھس کننگ۔ و اندا ڈول ئنا ایلو ہیت آتیان بے پرواہ۔ ہندن شاہ میر و نازو آ دا دڑکو و چڑنگ آتا ہچو زیم ئس متوکہ۔ ہڑدے آنبار زہ ءِ خیر ئنا اسہ کنڈ آ جھر اسیٹی یلہ کریرہ و تینٹ پیترک و گواڑخ آتا پھل بننگ ئٹی تمارہ۔ دے ئس سُد کریرہ کہ شام تمانے داسا زو زو زہ ءِ مچ کریرہ مونٹ شاغارہ اُراغا بسرہ۔
ہندا ڈول شاہ میر و نازو نا وخت گوازی ٹی تیر مننگ ئٹی ئس، ہچو غم و گڑتی ئس الو۔ داسا شاہ میر نا سن شش سال و نازو نا سن پنچ سال ئس۔ اسہ دے ئس شاہ میر نا ماما ریکی شار آن اوفتا اراغا سیالی کن تینا ہیڑ آ بسس۔ شام ئنا ارغ کننگ آن گڈ اُرا نا غٹ بھاتیک مہمان تیتون تولوک ئسر ریکی اوفتیتون شاری آ مخلونق نا زند، اوفتا آسراتی، شرحالی و دیمروی نا بابت ہیت کریکہ۔ ہندا وڑ ئٹ ارا نا خواجہ غاک اوڑتون تینا کشت و کشار آتا، تینا مال و پر و آباتی نا ہیت کریرہ۔
ناگمان ریکی تینا ایڑ نا پارہ غا مون ءِ ہڑسا پارے؛ ”ادی ماہناز اگہ نما خوئشی ارے گڑا ای شاہ میر ءِ تینتون شار آ دیو۔ اوڑے اسکول اسیٹی داخل کرفوٹ تہ تانکہ خوانے خن ملے و تینا ڈیہہ و مخلونق نا شرحالی کن گڑاس کننگ کے۔“
”آخہ جی ادا ای چنا ءِ تینا تینے آن مر کننگ کپرہ۔ لمہ ءِ خیرات کرینے زہ ئتون کائک گڑا دے مچ خیال کنا اوٹی سخت ءِ۔ چنا تیان بیدس اُرا کُننگ کن کنا بریک۔ چنا تیان بیدس اُرا ہچ دوست بفک چنا کنا چنکو سے زہیر کرو۔ ای چنا ءِ تینا شار آ ہلیپرہ۔“ ماہناز ایلم ءِ تینا پارے۔
”آخہ ہیڑ است ءِ تینا چنک کپہ۔ اونگا مار نا خوار مفرو۔ ننا اخس ءُ حال ئسے نن اودے خوئش تخون۔ انشاءاللہ منہ وخت آن پد نمے گیرام کرو۔ ہیڑ نی بالکل گڑتی کپہ۔ اگہ نم زہیر کریرے کہ تہ گڑا تُو و کپ آ چھٹی ہلوٹ کہ تہ ہتروٹتہ۔“ ریکی پارے و شاہ میر نا باوہ بائی خان آ توار کرے ”امر بائی خان، نا انت خیال ءِ؟“
”آخہ ریکی جان کنا ہم است کشپک کہ شاہ میر شار آ کائے جغت ئسے نا رند ڈغار آک ننا، دا کھر و مالک ننا، دافتا دیر خیال ءِ تخو۔ اندافک آخر بھلن مرور سمبھالور تا۔“ بائی خان پاریسہ کرے۔ بائی خان نا ورندی ءِ تننگ آن پد ریکی پدا پارے “بائی خان خواجہ اینو سست نا وخت اف۔ داسا دا وخت خوانندہ غاتا ءِ۔ داسا تو ہر گڑا نا علم ارے۔ کشت و شکار دسنگ، باغ خلنگ، کشار و باغ آتے جتاء ناجوڑی تیان رکھ کننگ، مال دھارنگ، کشت و کشار نا ہم علم ارے۔ داسا تو علم آن بیدس اسہ بے خوانندہ ءُ بندغ ئس نہ تو کشت و کشار کننگ کیک، نہ کن جوانو نسل نا میڷ و پین مال سامبنگ کیک۔ اگہ نم خواپیرے کہ شاہ میر بھلن مرے نما ڈغار کُھر و ایلو مال تے سمبھالے گڑا داڑکن المی ءِ کہ شاہ میر خوانے، دا گڑاتا سوہّو مرے۔“
ریکی نا دا ہیت آتے بننگ تو شاہ میر نا پیرہ اونا لمہ و باوہ ءِ پارے۔ ریکی جوان پاننگ ءِ۔ شاہ میر ءِ الیبو سہب نا ماما تون تینا شار آ خواننگ کن کائے۔“ کماش نا ہیت آتے بننگ آن گڈ شاہ میر نا باوہ و لمہ پنوکا با ئٹ ہئو کریر ولے اوفتا است آن خدا ءِ معلوم ئس کہ اوفتا است آتیا انت گدرینگاکہ۔
خیر نن گدرینگا، سہب تما۔ شاہ میر تینا ماما تون شار آ خواننگ کن ہنا۔ ارا نا کل بھاتیک چنک بھلن مونجا ئسر۔ لمہ تہ بھاز مشکل ئٹ تینا خڑینک آتے توریسس۔ ہنداخس کہ کرے کہ مار ءِ رخصت کرے۔ ریکی و شاہ میر شار ئنا کنڈ آ رادہ مسر۔ ولے داسا خڑینک آک ماہناز نا وس آن پیشن ئسر۔ خڑینک آک اونا کلک آتیٹ مون شیف کریر۔ ولے بائی خان نا خلیس آن خڑینک آتے گُد ئنا پلّو ئٹ پھاک کریسہ اراغا مون کرے، و اندن ارا نا کل بھاتیک ہم اراغا بسر۔ ولے اسہ بندغ ئس پین ارا نا کل بھاتی تیان جتا، کل آن زیات مونجا، کل آن مر دیوال نا ماس آ دائسکان سلوک ہننگ ئٹی ئسک تانکہ ریکی و شاہ میر جھل آن شیف دھڑار اندھر مسر۔
شار ٹی بننگ آن گڈ شاہ میر ءِ ماما تہ شار ئنا اسکول اسیٹی داخل کرے۔ شاہ میر سہب نا تینا ماما نا چنا تیتون اوار اسکول آ ہناکہ۔ اسکول آن چھٹی کریکہ بسکہ، پچ بدل کننگ و ارغ کننگ آن گڈ جتا ءُ کوٹھی اسیٹی ہناکہ تینا اسکول نا کاریم تے پورو کریکہ، اودے خواننگ نا سخت بھاز شونق ئس۔ او تینا خواننگ نا سخت خیال ءِ تخاکہ اسکول نا تیوہ استاد آک اوڑان خوئش ئسر۔ تینا شونق و خواری نا سوب آن او ارا سال ئنا کورس ءِ اسہ سال ئٹی خوانیسٹ و دیمروی ہلیسٹ شش سال ئنا نیام ئٹ میٹرک نا امتحان ءِ پاس کرے۔ پدا کالج ئٹی داخلہ ہلک و ارا سال آن گڈ جوانو نمبر آتیٹ انٹر نا امتحان ءِ پاس کرے۔ انٹر نا امتحان ءِ پاس کننگ آن گڈ شاہ میر زرعی یونیورسٹی ٹی داخلہ ہلک۔ اونا است خواہسکہ کہ داکان فارغ مننگ آن گڈ تینا ڈیہہ آ کاو، تینا مخلونق ءِ باغبانی نا کشت و کشار نا پوسکنا وڑ و ڈول آتیان معلوم کیو۔ او خواہسکہ کہ کنا علاقہ نا مخلوق باغبانی و کشت کشار نا پوسکنا وڑ و ڈول آتیان معلومدار مرے۔ اوفتا فصل آک، میوہ غاک دا ڈیہہ اکن پن ئس ودی کیر۔ اونا دا خواہش نا پورو مننگ ئٹی منہ دے سلیسسو۔ او تینا مزل آن خڑک تماسس۔ یونیورسٹی آن اونا فارغ مننگ ئٹی بیرہ اسہ سال ئس بچاسس۔ کہ عئید ئنا ردئٹ یونیورسٹی منہ دے اکن بند مس۔ کل اسٹوڈنٹ آک تینا ارا تیا ہنار۔ شاہ میر ہم تینا اراغا بس۔
شاہ میر ارا ٹی بس ولے جارات الو تہ۔ دے ئس کھر ءِ شیوالہ کن دریکہ گڑا وارس باغ آ دیر توننگ کن ہناکہ۔ شام ئنا میڷ تا بیڑنگ، و خوڑدہ غاتے ہُڑیفنگ کن ہراتم ہناکہ گڑا تینا ہلہ نا مسڑ نازو ءِ ہم تینتون دریکہ۔ اوڑے گڑا او ہڑتماک تینا چنکی ءِ یات شاغارہ زہ ئنا خوائفنگ پیترک و گواڑخ نا پھل آتا بِننگ و ایلو ہیت آتے یات شاغارہ بھاز خوئش مسرہ۔ شار ئٹی داخہ وخت رہینگ، و داخس خواننگ آن پد ہم شاہ میر نا طبیعت ئٹی ہچو بدلی بتویسس۔ ہچو ناز الو تہ نہ فخر کننگ نہ تینے بڑز ہلنگ اوڑکن عیب ئسر دا گڑاک۔ او بھاز مون روشن و خوئش طبیعت ءُ مار ئس ئسک۔ ہر وخت مخہ و مسخرہ اونا عادت ئس۔
اینو عئید نا دے ئس۔ عئید نماز آن گڈ شاہ میر اُرا نا کل ءِ بھاتی تے عئید موارکی تس ولے دانگ اینگ ہُرا نازو آ نظر تہ تمتو۔ او تینا تاتہ غان ہرفے کہ نازو ہراڑے کے۔ تاتی تہ پارے کہ نازو ایمون نا حویلی ٹی ءِ۔ شاہ میر ایلو حویلی نا پارہ غا رادہ مس کہ گڑاس استاتہ بس۔ پدا ہڑسینگا تینا بیگ آن گڑاس کشا رادہ مس۔ اونا دوٹی ربڑ نا پُغٹ اس ئسک ہرادے خاص کر نازو نا خلیفنگ کن شار آن ہلکسس۔ شاہ میر ربڑ نا پغٹ ءِ ہرفے ایلو حویلی ٹی ہنا۔ دانگ اینگ ہرا کہ نازو نیامیکو کوٹھی ٹی بے خبر توسنے۔ شاہ میر تینا نت آ پاڈروشکے توریسٹ مدان مدان درگہ غان پترینگا و پترنگ تون ربڑ نا پغٹ ءِ نازو نا کُٹ ئٹی خسّا۔ نازو ہجم کرے، او پغٹ نا خلیس آن ہنا شاہ میر آ لچا۔ خلیس آن او تینا دوتے شاہ میر نا لخ آ بٹے اودے خمب کریسس اونا دروشم شاہ میر نا دروشم آن مُر الّو۔ نازو اندا حالیت ٹی مون ءِ بڑز کرے گڑا خنک تہ شاہ میر نا خن تیتون اوار مسر، تومکاک اسٹ ایلو نا خن تیٹی اسہ پوسکنو احساس ئس خنار ہرانا پن اوفتے معلوم الّو۔
اوفک تینا است ئٹی اسہ نا درست ءُ جوزہ ئس محسوس کریر۔ ہندنی ٹی نازو نا خن تا پلک آن بے خبر شیف مسر۔ شاید کہ اونا خن تا پلک آک مابت نا دا پوسکنا احساس ءِ دا نا درست جوزہ ءِ حیاء و شرم نا پچ بیرفنگ خواہسرہ۔ دانا احساس چنکی نا مہر و مابت نا ہمو جوزہ ئس ہرا شاہ میر تینا است ئٹی پارے کہ اینو آن گڈ کنا زند ئنا مسخت نہ بیرہ تینا ڈیہہ ئنا مخلونق ءِ باغبانی و کشت و کشار نا پوسکنا وڑ و ڈول آتیان سرپد کننگ و اوفتے دیمروی و شرحالی نا اسہ پوسکنو مزل ئسے آ سر کننگ ءِ بلکن نازو ءِ تینا ارا نا گودی کننگ، و اودے تینا ڈکھ سکھ ئنا سنگت کننگ ہم کنا اسہ مزل ئسے۔ او سوچنگ ٹی ئس کہ شام نا باوہ ءِ پاروٹ ہلہ غان نازو نا سانگ اکن کہ کائے سانگ خوائے۔
نا گمان توفک ئسے نا سم تا توار مس۔ اُرانا کل بھاتیک نت شپاد کاٹم پیشن رمب کریسہ پیشتمار مچ مسر۔ کہ نازو نا باوہ و شاہ میر نا ہلہ زرک توفک دوٹی کوٹھی نا چاؤٹ آ سلوک ءُ، و چاؤٹ نا رہا ارا جون تموک ءُ، او شاہ میر و نازو نا جونک ءُ۔ جون آتیان دترک چاؤٹ نا کنڈ آ وہنگ ئٹی ءُ۔ تینا مخلونق ءِ کشت و کشار و باغبانی وڑ و ڈول آتیان واخف کننگ، تینا ڈیہہ ءِ دیمروی و شرحالی نا اسہ بڑز ءُ مزل ئسے آ سر کننگ، نازو ءِ تینا ارا نا گودی کننگ نا کل خواہش آک کل جوزہ غاک کل ارمانک شاہ میر نا سینہ نا دتر تتون اوار وہیسٹ خاک ئٹی اوڑدہ مننگ ئسر۔ ایلو کنڈ آن زرک توفک دوٹی سلوک کاٹم ءِ فخر آن بڑز کریسس، او دا معصوم آتا پاک انگا مابت نا زیہا بد کرداری، سیاہ کاری و بد چلن نا تہمت خلنگ ئٹی ئس۔
او نازو نا مہر و مابت نا پھدین آ چکل آن گلو ئس دیر کننگ اونا خمب ئنا پھدین آ سیخا ٹی دم ئس آرام کننگ و تینا مخلونق و ڈیہہ ئنا شرحالی و دیمروی نا سہب ئنا دے ئنا، داڑان مست لا شعور نا تارمئی تیٹی اندر ئس۔ ولے اینو دا خمب کننگ آن سینہ نا سینہ تون ملنگ آن لگوکا خاخر نا رژنائی لاشعور نا تہارمئی تے مُر کریسس، اینو مابت نا جوزہ لاشعور نا زمزیر آتے پرغاسس، ولے جوڑ تا زیہا دائسکان لج و حیاء نا، رشتہ غاتا تقدس نا کلف لگوک ئس، توم کنڈان زبان آک چپ ئسر، ولے است آتا کلہو خن تا دریچہ غاتیان کاٹمے کشاسس۔ ٹک تننگ آن مست ملخموت نا ابدی آ تارمئی نا کڈ ئٹی تماسس، و کس ءِ نا فریب نظر نا گواچی مسس۔ زرک اوفتے اسٹ ایلو نا خمب ئٹ خناسس، ولے اونا سوب آن پوہ الو۔ زرک اوفتا خن تا جام ئٹی چھلک ہلوکا مہر و مابت نا شراب آتے خناسس ولے اوفتا است ئنا شرف و ارمان تے خنتویسس۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔