بلوچستان نا ضلع خضدار نا علاقہ زہری ٹی سلہہ بند بندغ تا جلہو ئٹ اسہ بندغ ئس مرگ ئنا گواچی۔
سم کاری نا تدینی زہری نا علاقہ کہن ئٹ مس ہراڑے سلہہ بند بندغ آک ظہور احمد لوٹانی ولد عبدالسلام آ سم کاری کریر۔
پن کروک بندغ ءِ کاٹم ئٹ سم ئس لگا ہرادے بھاز ٹپی حالیت ئٹ کوئٹہ غا دننگا واہم او ساہ تس۔
جلہو نا ذمہ واری ءِ بلوچ آزاتی خواہوک سلہہ بند تنظیم بلوچ لبریشن آرمی ارفے۔
بلوچ لبریشن آرمی نا ترجمان جیئند بلوچ شینک کروک بیان ئٹ پارے کہ بی ایل اے نا سرمچار آک اینو خضدار نا علاقہ زہری کہن ٹی کوزہ گیر پاکستانی لشکر نا اسہ خاص ہندی کارندہ ظہور لوٹانی ءِ سم کاری کریسہ مرگ ئنا گواچی کریر ۔
او پارے ظہور احمد ولد عبدالسلام لوٹانی تدوک بھلو وخت ئسے آن کوزہ گیر پاکستانی لشکر نا مُخ تفی ئٹ راج دژمن کاریم تیٹ اوار ئس۔ پن کروک کارندہ خضدار تون اوار گْوادر ٹی کوزہ گیر لشکر نا مُخ تفی ٹی مخبری نا کاریم کننگ ئس۔ زہری ٹی بلوچ ورنا تا زوراکی ئٹ بیگواہی، اُرا تیا چھاپہ ٹی پن کروک کارندہ پاش اوار مسونے اندن اونا بدلہ ٹی کوزہ گیر فوج اودے نشہ بہا کننگ نا کاروبار کننگ آ پاش موْکل تسوسس۔
جیئند بلوچ پارے کہ پن کروک کارندہ 2019 ٹی ہمراہ سلہہ بند گل نا اسہ باسک سرمچار ئسے نا مخبری کریسہ زہری بازار آن لیویز فورس نا ذریعت زوراکی ئٹ بیگواہ کرفیسس۔ اودے داکان مالو مسہ وار بی ایل اے پامدار کریسس کہ او تینا بدکڑدار کاریم تے آن مُر مرے ولے او وار وار راج دژمن کاریم کریسہ ئس۔
ترجمان پارے کہ ظہور لوٹانی ءِ راجی غداری و ڈیہہ دژمنی نا ڈوہ کننگ آ بلوچ راجی عدالت سزائے مرک نا پرمان تس ہراڑا عمل کریسہ بلوچ سرمچار آک اودے اونا بد آ ایسری اسکان سر کریر، اندن دا نیٹورک نا دیگر بندغ آک ہم ننا ٹک آ اریر ۔
جیئند بلوچ پارے بلوچ لبریشن آرمی دا جلہو نا ذمہ واری ءِ ارفک۔ راجی غداری نا ڈوہدار مننگ آ اسہ ہم بندغ ءِ بشخنگپرو۔ کوزہ گیر پاکستانی لشکر و اوڑتون اوار مروک آتیا ننا جلہوک برجاء مرور۔