کوئٹہ ٹی پاکستانی فورسز نا کیمپ آ سلہہ بند بندغ آتا جلہو آن گڈ کوزہ کننگا، جلہو کروک آک لشکر نا سلہہ تے تینتون دریر۔ جلہو ئٹ کیہی فورسز کارندہ آتا مرگ ئنا گواچی مننگ نا حوال ءِ اندن فورسز کارندہ آک مسہ جلہو کروک آتا خلنگ نا دعویٰ کرینو ۔
پاکستانی فورسز نا کیمپ آ جلہو کوئٹہ نا ایب کیب نا علاقہ ولی تنگی ٹی تدوکا دے دیگر نا وختا کننگا ۔
ذرائع نا ٹی بی پی ءِ پاننگ ئس کی سلہہ بند بندغ آتا بھلو کچ ئس پوسٹ آ جلہو کریر و رکھوک آ چوکی تے کوزہ کریر۔
جلہو کروک آک فورسز کارندہ آتا سلہہ تیا ہم کوزہ کریر و شام ئنا وخت نا درست پارہ غا ہنار۔
پاکستانی سلہہ بند کوالخواک جلہو نا پک کریسہ پاریر کہ جلہو ٹی صوبیدار قیصر رحیم مرگ ئنا گواچی و مسہ کارندہ ٹپی مسونو واہم آزات ذرائع نا ردئٹ فورسز کارندہ آتے بھلو کچ ئسیٹ جانی نخسان آک رسینگانو۔
کوالخواہ نا دعویٰ ءِ کہ جلہو کروک آتیٹ مسہ بندغ ہم سم کاری ٹی خلنگار ۔
اینو سہب ئنا ولی تنگی و ایب کیب ٹی پاکستان لشکر نا سلہہ بند ہیلی کاپٹر آک جتاء ہند آتیا شیلنگ کریر واہم دا بابت گیشتر معلومداری دوئی کننگ متنے۔
تدوکا وخت ئٹ بلوچ سلہہ بند آزاتی دوست آتا پارہ غان بلوچستان نا جتاء علاقہ آتیٹ پاکستانی فورسز نا کیمپ آتیا جلہو کریسہ کوزہ کننگانے ہرافتیٹ فورسز کارندہ آتے بھلو کچ ئسے آ جانی نسخان رسینگا ۔
پن کروک جلہو نا ذمہ واری ءِ دائسکان کس ارفتنے ۔