بلوچ اسٹوڈنٹس ایکشن کمیٹی نا سروکی ٹی اِرا دے ئی صباء دشتیاری ادبی و علمی مجلس نا بنا عطاشاد ڈگری کالج تربت ئٹ کننگا۔
بنائی مجلس ئٹ تربت یونیورسٹی نا شعبہ بلوچی نا لیکچرار پروفیسر بالاچ بالی صباء دشتیاری نا علمی و ادبی خذمت آتیان نوشت خوانا اندن خواننگ نا سرحال آ پینل ڈسکشن اس اڈ تننگا۔
مجلس ئٹ صباء دشتیاری نا علمی و ادبی زند و اونا خذمت آتیا ڈاکومنٹری اس مونا ہتنگا۔
مجلس ئٹ بلوچی عہدی لبزانک نا سرحال آ پینل ڈسکشن اس اڈ تننگا ہرانا مہماندار ورنا غا نقاد جمال منظور اندن مہمان پنی آ ادیب و قلمکار بلوچستان اکیڈمی کیچ نا کماش ڈاکٹر غفور شاد ئس۔
ڈاکٹر غفور شاد پارے کہ عہدی لبزانک ہر راج ئنا علمی و ادبی مڈی مریک ہراٹی ہر راج ئنا دود و ربیدہ، دیہاڑ، بولی و رواج آتیتون اوار مذہبی عقیدہ غاتا درشانی مریک۔
او پارے کہ بلوچ راج ہم عظیم ادبی مڈی و کلاسیکل شعری میرات نا خواجہ ءِ ہراٹی بلوچ راج ئنا ہزار سالی متکنا دیہاڑ و دود و ربیدہ و چاگڑدی ڈھانچہ نا بشخ اوار ءِ۔
او اسہ سوج ئسے نا ورندی ٹی پارے کہ نن ساڑی آ وخت ئٹ متکنا و کلاسیکل بلوچی ءِ اِلیسہ ایلو راج آتا ادب ءِ خواننگ بناء کرینن و تینا عہدی کلاسیکل آن بیگانہ اُن اندا سوب ءِ کہ ساڑی آ شاعر آتیان بھاز آ شاعر آک تینا بلوچی کلاسیکل شاعری آن نا واخب و بے سماء ءُ اندا سوب ءِ کہ ساڑی آ شاعر آتیٹ کلاسیکل رنگ خننگپک ولے ملا فاضل، سید ھاشمی، عطاشاد و غلام حسین شوہاز نا شاعری ءِ مونا تخن گڑا اوفتیٹ عہدی کلاسیکل شاعری نا رنگ جوان وڑئٹ خننگک۔
اونا ودیک پاننگ ئس کہ ساڑی آ وخت ئٹ ننا ورناک تینا کلاسیکل عہدی شاعری ءِ خوانر و اوڑتون تفوک مریر۔
او پارے کہ اینو آن چِل سال مُست ننا رہی آ اسہ اُرا اس دنو متوکہ ہراڑے پیر ءُ لمہ ئسے کسہ یات مف و ننکان اِرغ آن پد ہر اُرا ٹی بندغ آک مُچ مریسہ ہمو پیر انگا زالبول آن کسہ بِنگرہ۔
مجلس ئٹ کتاب مُچی آن بیدس سائنس نا و عکس آتا اسٹال ہم خلنگانے۔
دا مجلس ئٹ جتا سرحال آتیا پینل ڈسکشنز، مشاعرہ و شئر و باگل نا بشخ آک اوار ءُ۔