زوراکی ئٹ بیگواہ بندغ تا خاہوت آک کوئٹہ کراچی و تفتان کسر آ تدوکا کیہی دے تیان تولوک برانز کریسہ تینا بندغ آتا آجوئی نا خواست کننگ ءُ۔
بلوچستان آن زوراکی ئٹ بیگواہی نا گواچی مروک کیہی بندغ آتا پارہ غان اینو ہم تولوک برانز آتا لڑ برجاء ءِ، برانز آتا سوب کوئٹہ کراچی و تفتان آ ہِنوک بنجاہی کسرک بند ءُ۔
مستونگ کردگاپ آن تعلق تخوک سرپرہ قبیلہ نا بندغ آک تینا بیگواہ بندغ آتا آجوئی کن تدوکا شش دے آن کوئٹہ آن خڑک کوئٹہ تفتان کسر آ تولوک برانز کننگ ءُ۔
برانز نا سوب کوئٹہ تفتان کسر ہر وڑ نا ہن و بر اکن بند ءِ اندن برانز کروک آک تینا بندغ آتا آجوئی اسکان برانز برجاء تخنگ نا پڑو کرینو۔
ایلو پارہ غان بلوچستان نا ضلع قلات آن مُسہ دے مالو فورسز چھاپہ تا وخت دزگیری آن پد بیگواہ مروک 35 بندغ آتا خاہوت آک قلات آن خڑک بنجاہی کسر آ تولوک برانز کریسہ کوئٹہ آن کراچی کن کسر ءِ بند کرینو۔
قلات آن دزگیر کروک 8 بندغ درو مونا ہتنگاسر واہم ایلو بیگواہ تا خاہوت آک تینا بندغ آتا مونا ہتنگ اسکان برانز برجاء تخنگ نا پڑو کرینو۔ دا وخت آ خاہوت و بلوچ یکجہتی کمیٹی تون ضلعی بست و بند، ڈپٹی کمشنر و ایس پی نا گپ تران مس۔
بیگواہ بندغ تا خاہوت آک کوالخواہ تیتون گپ تران کن شش ٹِک مونا ایسُر ہرافتیٹ، اسہ گھنٹہ اسیٹی ایف سی نا برخلاف ایف آئی آر کننگ، و بیست و چار گھنٹہ ٹی زوراکی ئٹ بیگواہ بندغ تا یلہ کننگ اوار ءِ۔
قلات ئٹ خاہوت آتا گیشتر پاننگ ءِ کہ اگہ 24 گھنٹہ ٹی ننا بندغ آک یلہ کننگتور گڑا برانز آتے شابیت کننگو، ہراڑان مخلوق ءِ سختی تیتون مونتس مننگ کیک، و دانا غٹ زمہ واری حکومت بلوچستان، قلات ضلعی بست و بند و حکومت آ مرو۔
اوفک ایسر ئٹ پاریر کہ نن بلوچ الس آن کمک نا خواست کینہ و نن تینا برانز ءِ گیشتر شابیت کریسہ بلوچستان نا ایلو بنجاہی کسر تے ہم بند کرون۔