برجاء برانز آک – ٹی بی پی سرگپ
اسہ ہفتہ ئسے آن تیوہ بلوچستان برانز کننگ ءِ و اہم انگا کسر تیا زوراکی ئٹ بیگواہ بندغ تا خاہوت آک و بلوچ یکجہتی کمیٹی نا باسک آک تولوک برانز کننگ ءُ۔ تیوہ بلوچستان بیرہ اندا ہفتہ ٹی پنجاہ غان زیات بندغ پاکستانی لشکر نا دو آن زوراکی ئٹ بیگواہ مسنو، ہرافتیٹ کوسٹل ہائی وے پولیس و بلوچستان لیویز نا کارندہ ہم اوار ءِ۔
روچئی نا توہ ئٹ زوراکی ئٹ بیگواہ بندغ تا خاہوت آک تینا بندغ آتا آجوئی کن کوئٹہ – کراچی کسر ءِ قلات و سوراب نا ہند آ بند کریسہ تولوک برانز کننگ ءُ و کوئٹہ – تفتان کسر آ کردگاپ نا علاقہ ئٹ برانز برجاء ءِ اندن بلوچستان نا متنازعہ حکومت نا سر وزیر سرفراز بگٹی و اقتدار ئٹ تولوک پیپلز پارٹی حکومت نا باسک آک دا بھلا ویل آ زوراکی ئٹ بیگواہ بندغ تا خاہوت آتے انصاف تننگ نا جاگہ غا اوفتا برخلاف اسمبلی ئٹ تران کریسہ مقتدر طاغت آتا بیانیہ ءِ تالان کننگ ءُ۔
ریاست پاکستان پالیسی ساز آک تکرہ کہ بندغ آتے زوراکی ئٹ بیگواہ کریسہ اوفک بلوچ آجوئی نا تحریک ءِ ایسر کننگ کیرہ، واہم اوفتا رد پالیسی تا سوب ءِ کہ بلوچستان نا لس مخلوق بش مننگ ءِ و بلوچ مزاحمت کار تا بھیم بش کروک جلہو تا ترندی ٹی کمبوتی نا جاگہ غا ودکی مننگ ءِ۔
زوراکی نا بیگواہی و ریاستی تادی ئٹ بلوچ تحریک ایسر مننگ کپک، واہم حکومت نا بے سوبری آن دا بھلا ویل گیشتر غنجل مننگ ءِ۔
ریاست پاکستان نا اختیار تخوک کڑدہ تا پالیسی تیان بلوچستان نا ہر اُرا زہمی مننگ ءِ، ولے بلوچستان ئٹ سیاسی بدلی بننگ آن پد بلوچ الس داسہ ریاستی تادی آ چُپ مننگ نا جاگہ غا زوراکی ئٹ بیگواہ بندغ تا آجوئی و انصاف دوئی کننگ کن اندا وڑ برانز نا کسر ءِ ہلیک۔