چلتن
نوشت: سائرہ بلوچ
دی بلوچستان پوسٹ
او چلتن نا پارہ غا گام خلنگ ئسک ہندن اشتاف ہنداخس ترندی ئٹ کہ دم کُشتہ ئسک ہندن گمان مننگ ئس کہ چلتن اودے توار خلسا پاننگ ءِ زو بر۔ اونا سنگت اودے سوج کرے نے انت ءِ دن تیز گام خلنگ اُس مچٹ آرام ئٹ ہن دائسکان بھاز وخت ارے چلتن ہم دن مُر اف داسا دا تو چنکو پند ئسے، او پدی چک خلک بشخندہ اس کرے و پارے کنے چلتن تو بھاز گپ کروئی ءِ، کسہ بنوئی ءِ، وخت کم ءِ کنتو اونا سنگت مچٹ حیران مس کہ دا انت پائک پدا چُپ کرے۔
او ہرا وخت خڑک مسک گڑا ہتم نا ردوکا پھل آتے خنا توس پھل آتے خڑک آن ہُرنگ ئسکہ ہنداڑے او سوچ ئٹی گم مس چلتن اودے پارے ای نے ہندا سوب آن خواہفیٹ کہ بر ہُر قربانیک امر ہتم ٹی بدل مریرہ او پھل اس کشکا اونا رنگ آتے پام ئٹ ہُرنگ ئسک خیسُن و مون آ رنگ آتے ہُرسا پارے مون انگا رنگ غلامی و اونا سوب آن مروکا بھسکاری تا شائدی ترسا کنے پاننگ ءِ نی خنانس نہ غلامی نا بھسکاری تے۔ او ورندی تس ہئو بھاز خڑک آن۔ اونا مونا ہمو کل ندارہ غاک بریسہ ئسر، ہمو کل سنگت آک ہرا زندان تا گواچی مسر، ہرا شہید مسر، ہرا جیل آتیٹ بند کننگار، سڑک آ تموک لاش آک اونا مونا پیری کننگ ئسر، لمہ غاتا چیہانٹ آک، چُپی ٹی وہوکا خڑینک آک ہرا دڑد آتا درشانی کریرہ، ہمو لمہ غاک ہرا گڈی وخت اسکان تینا چُنا تا دیدار کن سکھیسہ دم تسر، ہمو چُناک ہرا چوری کننگار، ہمو زائیفہ غاک ہرا ورنائی ٹی جنوزان مسر، اوفتا ارغ آک یا بیگواہ کننگار یاکہ شہید، پدا ہمو شہید آتا زائیفہ غاتے بیگواہی نا گواچی مننگ نا تدینیک ہم اونا مونا بننگ ئسر۔ او چلتن نا پارہ غا ہُرا و گپ بنا کرے، چلتن زمین نا مہر ہم امر عجیب ءُ گڑا ئسے وا، ہرانا مونا کل سیالیک بے معنہ مریرہ، نہ لمہ باوہ ہُرنگ مریرہ، نہ چُناک، نئے زائیفہ غاک، نہ اَرغ نئے ایڑک بس زمین مریک ہمو آسودہ غا زند آک خواری تا گواچی مریرہ، در پہ دری تا گواچی اسہ بندغ نا ہرفوکا نظریہ نا سزا ءِ دژمن تیوہ غا خاہوت آتے ایتک ولے پدا ہم ای او خاہوت آتے نزور مننگ آ خنتنٹ چلتن نے سما ءِ ای دا کسر ئٹ عیاش پرست فائدہ ہرفوکو بندغ ہم خنانٹ، و کچ آن زیات قربانی تروکو ہم خنانٹ ہمو قربانیک ہرا لوز آتا آئری افس، ای دا جنگ ئٹ سلہہ بٹوک ہم خناٹ و گڈی ساہ اسکان سلوک ءُ بندغ ہم خناٹ زندان ئٹ سوگو سلوک ءُ بندغ ہم خناٹ ای نے انت پاو کہ ای انت انت خنانٹ۔
او پھل ئنا خیسن آ رنگ ءِ ہُرنگ ئسک چلتن توار اس خلک دا ہمو زگر آ دتر تا گواہیک ءُ ہرا دا ڈغار نا رکھ ئکن وہانو، او چلتن ءِ ورندی ترسا پارے چلتن مگہ دا راج پوہ مرو کہ دا انت ئسے نا نشانیک ءُ؟ مگہ دا راج نا و دا پھل آتا کلہو ءِ مارِنگ کننگ کیک؟ چلتن پارے ہئو ہمو بندغ آک پوہ مریرہ ہرافک زمین تون بیدس جوفہ آن مہر کرینو، ہرا دڑد و قربانی تے خڑک آن خنانو، سوگو آ جوزہ تے خنانو۔ او پارے نہ چلتن دا گپ ءِ کل راج ءِ پوہ کروئی ارے ننے کہ قربانی ہرا راج ئنا زندہ سلنگ کن المی ءِ، اوفتے پاروئی ءِ کہ قربانی تے گیرام کروکا راج آک ایسری نا گواچی مریرہ، اوفتے پاروئی ءِ کہ مہر ئنا ہچو کچ اس مفک، قربانی نا ہچو کچ اس مفک، اوفتے پاروئی ءِ سخت آ حالیت آتیٹ ہم سوگو سلنگ مریک چلتن ہمر کہ نی سلوک اس۔
ہندنی ٹی اونا سنگت اوڑا توار اس خلک و پارے کہ اوڑے تنیا انت کننگ اُس بر چاہ کُن شام تمنگ ءِ۔ او ہنا چاہ کُنگ۔ و اوفک واپس مسر، واپسی نا وخت آ او وار وار آ چلتن نا پارہ غا ہُرنگ ئسک، او چلتن ءِ پاننگ ئس کہ سما اف ای و نی پدا گپ کننگ کرون یا نہ، سما اف نن پدا تینے خننگ کرون یا نہ، سما اف غلامی کنے ارا پارہ غا دیک، ولے ای مدام نے و ڈغار ءِ یات تخوٹ، ایسکان دا ساہ ارے مخلصی ئٹ دا است ہندا ڈغار کن درپہ خلو، ای مدام کوشست کروٹ کہ نا وڑ سوگو سلو۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔