بلوچستان نا جتا انگا ضلع مستونگ، سوراب و خاران ئٹ فوجی کاروائی و کواڈکاپٹر جلہو و زوراکی نا بیگواہی تیتو تفوک حوال رسینگانے۔
احوالکار آتا رد ئٹ ضلع مستونگ نا علاقہ دشت کمبیلا ئٹ پاکستانی لشکر نا پارہ غان اسہ اُرا ئسے کواڈکاپٹر نا وسیلہ ئٹ ٹک کننگا، ہرا نا نتیجہ ئٹ اسہ زالبول اس بھاز ٹپی مس۔
اینگان ضلع سوراب نا علاقہ نغاڑ ئٹ فورسز نا پارہ غان بھلو کچ اسیٹ سرچ آپریشن کننگ نا حوال بننگ ئٹ بسونے۔ ہندی احوالکار آتا پاننگ ءِ کہ آپریشن نا وخت جتا انگا علاقہ تیٹ اُرا اُرا ئٹ پٹ و پول کننگا ہندن کیہی ہن و بر نا کسر تیا نظر ہم تخنگ مننگ ءِ سختی ئٹ۔
ہندا نیام ئٹ سوراب آن خلیل احمد ولد نور محمد تون اوار اِرا بندغ ءِ دزگیری آن گڈ بیگواہ کننگ نا حوال ہم بننگ ئٹ بسونے۔ خاہوت نا پاننگ ءِ کہ ہڑتوم آ بندغ تا دزگیری آن گڈ اوفتا بابت ئٹ ہچو حوال اس بننگ ئٹ بتنے۔
ارٹمی پارہ غان ضلع خاران نا علاقہ تازینہ ئٹ اینو سہب ئنا پاکستانی لشکر نا پارہ غان آپریشن کننگا۔ احوالکار آتا رد ئٹ کاروائی نا وخت مارٹر گولہ خلنگا و کواڈکاپٹر آتے ہم کاریم ئٹ ہتنگا۔
ہندی بندغ آتا دعوی ءِ کہ اسہ کواڈکاپٹر جلہو اسیٹ مُسہ ساہدار کسکر، واہم اسہ بندغی ساہ ئسے نا نسخان مننگ نا حوال بننگ ئٹ بتنے۔
احوالکار آتا رد ئٹ ہندا علاقہ ئٹ سلہہ بند بندغ آک کاروائی نا وخت اسہ کواڈکاپٹر ئسے خلکنو، واہم دا بابت ئٹ سرکار نا پارہ غان ہچس مون آ بتنے۔