سلہہ بند بندغ آک مائننگ کمپنی نا سائٹ ءِ ٹک کریر و کاریم کروک آ ٹولی ءِ تینتون دریر۔
شابیتی حوال آتا رد ئٹ بلوچستان نا ضلع چاغی نا علاقہ ماہیان کور ئٹی سلہہ بند بندغ آک غیر سرکاری مائننگ کمپنی نا مائن تیا جلہو کریسہ سائٹ آ ساڑی لاکھ آ روپئی تا مڈی تے تینا کوزہ ٹی ہلکر۔
حوال آتا رد ئٹ دا وخت سلہہ بند بندغ آک سائٹ آ ساڑی مائننگ کمپنی نا ہفت کاریمی تے ہم دزگیر کریسہ بے ڈس ءُ جاگہ اس دریر۔
برمتہ مروک آ بندغ آتیٹی گلگت ناچار مزور وجاہت، واجد، شاہد و صابر ایلو پارہ غئے ہندی جاگہ نا مسہ مزوردالبندین نا ہندی ضیاالدین ، ماہیان ئٹ تولوک شاہ سلیم و سعید محمد اوار ئسر۔
وسیلہ تا رد ئٹ سلہہ بند بندغ آک کیہی گھنٹہ اسکان سائٹ آ ساڑی ئسر واہم پاکستانی لشکر کاروائی کننگ ئٹ سرسہب متو، سلہہ بند بندغ آک مائن آ ساڑی اسہ زمباد لاری، اسہ فور بائی فور پک اپ، ۲۰ آن ود سولر پلیٹ و موٹر سائیکل تیتون اوار پین مڈی ہم تینا کوزہ ٹی ہلکر۔
چاغئے پولیس نا رد ئٹ تدینی آن پد انتظامیہ نا پارہ غان پین کاروائی و برمتہ مروک آتے یلہ کرفنگ کن کوششست برجا ءِ۔