کیج و ڈیرہ بگٹی ئٹ تراک، اسہ بندغ اس مرگ ئنا گواچی

بلوچستان نا ضلع ڈیرہ بگٹی و کیچ ئٹ اِرا جتا انگا تراک آتا تدینی مون آ بسونو۔ ڈیرہ بگٹی ئٹ بارودی سرنگ ئٹ تراک نا سوب آن اسہ بندغ اس مرگ ئنا گواچی مس، ہندن ضلع کیچ نا علاقہ گیبن ئٹ مروک تراک ئٹ اسہ سرف گاڑی ئسے ٹک کننگ نا حوال آک ءُ۔

ڈیرہ بگٹی ئٹ کچی کینال نا 12 نمبر شاخ نا خڑک بارودی سرنگ نا تراک نا سوب آن اسہ بندغ اس کسک۔

ہندی بندغ آتا رد ئٹ تراک بارودی سرنگ ئٹ مس، واہم تدینی نا بابت ئٹ پین شابیتی حوال دسکان بتنے۔

ارٹمی پارہ غان ضلع کیچ نا علاقہ گیبن ئٹ ہم اسہ ترند ءُ تراک ئسے نا توار بننگ ئٹ بس۔ حوالکار آتا رد ئٹ تراک ئٹ اسہ سرف گاڑی ئسے ٹک کننگانے، ہرا نا بابت ئٹ دعویٰ کننگانے کہ او اسہ سرکاری مخ تف سلہہ بند ٹولی ئسے نا ئس۔

واہم کیچ ئٹ مروک تراک نا سوب ئٹ جانی و مالی نسخان نا بابت ئٹ دسکان ہچ ءُ حوال اس مون آ بتنے۔