حوال تا رد ئٹ واپڈا نا تینے آن لوڈ شیڈنگ برجاہ، جتا فیڈر آتے 24 گھنٹہ ٹی بیرہ 30 منٹ تننگک ولے او ہم سنگل فیز، بجلی مفرنگ آ دیر ئنا نیستی ودی مسونے۔
گیشتر حوال تا رد ئٹ بھاز دے ئنا سے واپڈا لس مخلوق نا زند ء سخت جوڑ کرینے، رباط فیڈر، نانا فیڈر و ایلو فیڈر آتیٹ 24 گھنٹہ بجلی گم مریک ہرا وخت ہم دا فیڈرز آتیا بجلی بریک گڑا بیرہ منہ منٹ کن او ہم سنگل فیز و کم وولٹیج ٹی، ہراڑان نہ دیر ئنا موٹر چلینگک نہ زند ئنا خواست آک پورو مریرا۔
اندن ہندی مخلوق نا پاننگ ء کہ بندغ آک دیر ئنا پُڑی پُڑی کن سکیرا ولے واپڈا بیرہ منہ خاص علاقہ آتے فیڈر آتا مہربان ء اندن درج بالا فیڈر تا مخلوق سخت خواری تا گواچی ء۔
علاقائی مخلوق ڈپٹی کمشنر دکی، ایکس ای این واپڈا و واپڈا نا ایلو بھلا کوالخوا تیان خواست کرینو کہ لس مخلوق نا زیا دا نا انصافی ء بند کبو و مخلوق ءِ دا سختی تیان کشیبو نکہ مخلوق برانز نا کسر ءِ ارفینگ کن بیوس مرو۔