شئر و شئر ئنا ودشت | آرچی بالڈمیک لیش

شئر و شئر ئنا ودشت

نوشت : آرچی بالڈمیک لیش

“عمل و گڑاتا بنجاہ ئٹ شاعر تینا ہند ءِ جوڑِک جہان نا راز آتا باروٹ جیڑک،او تینا ذہن و جوزہ غاتے تدوکا وخت ئنا گچینا ادبی کاریم تیان سانبک، و گدرینگوکا مُد آتتون سفر کیک و وخت ئنا تدنگ نا ماتم ءِ کیک۔

او جہان نا بے حساب گِڑاتے خُوڑتی ئٹ ہُرک و جہان نا پوہ مفرنگ ءِ گمان ئٹ ہتیک۔

نرینئیی آ ، زورآور آ سہیل ئٹ تمّوک پَن آتا غم ءِ کیک۔ او زبادی آ ہتم نا مُد ئٹ نازرک آ گوگڑو تے خَنِک خوش مریک، اُست ئٹ بیم و خُلیس ءِ تِخیسہ سیڷ ئنا گمان ءِ کیک۔ گھمبیر آ روح ئتون او جھمر آتیا نظر شاغک۔ او تینے آن مُست ئنا عظیم انگا کاریم تیا خوش مریک و گدرینگوکا لائخ و چاہندار (ادیب) آتا تالان کروکا زباد آتیا شئر ءِ خلیک۔او فن ئنا جنگل آتیا پیری خلیک و جُواننگا فن کاری نا دروشم نا سفت و ستا ءِ کیک۔ ہراتم (دا وڑ) اونا اُست و مِلی سُرِک او تینا کتاب آتے اسہ پارہ غا تخّیسہ قلم ءِ ارفک تانکہ او لوز آتیٹ تینا درشان ءِ کننگ کے۔

(لوچی، چینی شاعر ئس)

لوچی نا خیال ئٹ شئیر ودی کننگ بجلی نا بیرہ اسہ تمبہ اس تینا بندغی نا تیزاپی آ کڑمبی ٹی شاغنگ ئٹ مفک۔ دا کاریم کن ہرا تمبہ غرز مریک اسٹ بندغ، ایلو اونا مون ئنا جہان۔ نظم تنیائی و بےچکاری نا نہ بلکہ سیالی و تعلقداری نا ودشتی ئسے۔ اسہ پارہ غا شاعر ءِ، ایلو پارہ غا جہان نا رازاک، تدینگوکا مُد آک، بے حساب آ گِڑاک، و جہان نا گوڑیفوک مننگ،۔۔۔۔۔۔ لوچی پاہک کہ شاعر نا فن اصل ئٹ معنہ اسکان سر مننگ نا وسیلہ ءِ۔ اسہ ہندنو ءُ وسیلہ اس ہرانا کمک ئٹ جہان (ہرا پاش وڑئٹ گوڑیفوک و بے معنہ ءِ) نا معنہ تے پوہ مننگ مریک۔ فلسفہ بیرہ دا دعویٰ کرینے کہ او جہان نا بے معنہ غا اڑینگوکا کسہ تا جاگہ غا ہندنو خیالی ءُ کسہ جوڑنگ کیک ہرافتے بیرہ خیال ئنا نظر ئٹ خُواننگے تو اوفک معنہ ایترہ او سائنس خل، کڑسی یا اِستار تیٹ معنہ پٹّپَک بلکہ ہمو بریبر اِنگا تول ءِ پَٹک ہرا خَل، کڑسی، میز یا اِستارتا مننگ نا سوب ءِ پائے۔ دانا برخلاف لوچی نا نظم ڈغار، آسمان ءِ تینا ہیئت (Form) نا دام ئٹ ہلیسہ اوفتے ہموفتا بولی ئٹ معنہ غان پُر کیک۔ او مونی پاہک:

” شاعر نیستی (غیر وجود) تون اڑینگک تمک
و اودے بیوس کیک کہ ہستی (وجود) ءِ
ودی کے۔ نن چُپی ٹی ٹَکّیفنہ تانکہ ورندی ٹی
شئر اس بننگ کین۔”