روسی وزارت رکھ دوبہ خلکنے کہ تدوکا تُوہ بحیرہ بالٹک ئٹ نارڈ اسٹریم گیس پیپ لین ءِ برطانوی بحریہ نا کُڑدہ نا کارندہ غاک بُھس کریسر۔ وزارت رکھ تیوہ دعویٰ نا حق اٹ ہچو شاہدی اس مونا ہتنے۔
روس، نارڈ اسٹریم پیپ لائن نا تراک ئٹ بُھس کننگ نا ذمہ واری ءِ برطانوی بحریہ نا کڑدہ نا کارندہ آتیا خلکنے۔ دُن اولیکو وار دنو جلہو ئسے کن نیٹو باسک ملک ئسے آ مون پہ مون دوبہ خلنگانے۔
واہم روسی وزارت رکھ تینا دعویٰ نا حق ئٹ ہچو شاہدی اس مونا ہتئو۔
وزارت رکھ پارے “ساڑی حوال تا ردئٹ برطانوی بحریہ نا کڑدہ نا کارندہ غاک برجاء سال 26 ستمبر آ بحیرہ بالٹک ئٹ دہشت گرد جلہو نا منصوبہ بندی ءِ کریر و اوڑا عمل ئٹ بشخ ہلیسہ نارڈ اسٹریم 1 و نارڈ اسٹریم 2 گیس پیپ لائن آتے تراک ئٹ بُھس کریسر۔”
برطانیہ نا وزارت رکھ دمستی تون دا بابت ہیت کتنے۔
داکان مالو روس تدوکا تُوہ بُھس کروک گیس پیپ لین آتے تراک ئٹ بُھس کننگ نا ذمہ واری ءِ ‘دے کہی’ آ شاغاسس۔
واہم روس دا بابت مالو ہچبر گچین شابیتی حوال تتئو کہ پیپ لین آتے نسخان تننگ نا ذمہ وار دیر ءِ۔ دا پیپ لین روس آن یورپ، گچین وڑئٹ جرمنی ءِ تروک گیس نا الّمی لڑ و بند نا بشخ ئسے۔
دے کہی ملک آک گیس پیپ لین آتے رسینگوک نسخان تیکن روس ءِ ذمہ وار پن کننگ ئسر۔ واہم کریملن وار وار پارے کہ روس آ دا ذمہ واری ءِ شاغنگ نا دوبہ غاک ‘چادی گری’ ئسے ءُ انتیکہ داٹی روس ءِ سواد اف۔
دا ردئٹ کریملن نا پاننگ ئس کہ امریکہ نا سواد داٹی الّمی تفوک ءِ، انتیکہ او یورپ ءِ پین قدرتی گیس (ایل این جی) بہا کننگ خوائک۔