بلوچستان نا ضلع قلات نا تحصیل منگچر ٹی ایف سی کیمپ نا چوکی آ مروک چغلی بمب جلہو نا ذمہ واری ءِ بلوچ لبریشن آرمی ارفے۔
حوال تا رد ئٹ استو قلات نا تحصیل منگچر ٹی نادرست بندغ آک ایف سی کیمپ نا چوکی آ چغلی بمب ئٹ جلہو کریر و پیشتمنگ ئٹسرسہب مسر۔
لیویز ذرائع تا رد ئٹ یک شمبے نا نن کم و ود 7:45 نا وخت منگچر ایف سی کیمپ نا خڑک آ نادرست بندغ آک چغلی بمب خسیسہ نرار،چغلی بمب کیمپ نا بنجائی در آ تمیسہ ترخا۔
حوال رسینگ تون اسسٹنٹ کمشنر منگچر محمد حنیف نورزئی و ایس ایچ او لیویز تھانہ علی اصغر نیچاری لیویز فورس جاگہ آ سرمریسہ تدینی نا جاچ ءِ ہلکسر اندن گیشتر پٹ و پول ہندی بست و بند کننگ ءِ۔
بلوچ لبریشن آرمی نا ترجمان جیئند بلوچ میڈیا آ شینک کروک بیان اسیٹ پارے کہ ننا سرمچار آک استو قلات نا علاقہ منگچر ٹی کوزہگیر پاکستانی لشکر نا بنجائی کیمپ نا چوکی آ گھاٹ تروک کارندہ تیا چغلی بمب ئٹ جلہو کریسہ اِرا دژمن کارندہ ٹپی کریر۔
جیئند بلوچ پارے کہ بلوچ لبریشن آرمی دا جلہو نا ذمہ واری ءِ ارفک۔ مسخت نا دوئی کننگ اسکان ننا کاروائیک برجاء مرور۔