بلوچستان ئٹ زوراکی نا بیگواہیک: 4 علاقہ ئٹ بنجاہی کسر آ برانز، کسرک برانز ئٹ بند

بلوچستان نا جتا علاقہ تیٹ بیگواہ بندغ تا خاہوت آک تینا بندغ آتا آجوئی کن تولوک برانز کننگ ءُ۔

شابیتی حوال تا ردئٹ بلوچستان آن زوراکی ئٹ بیگواہی و بیگواہ بندغ تا آجو مفننگ نا برخلاف جتا شاری تیٹ تولوک برانز آتا لڑ برجاء ءِ، بیگواہ بندغ تا خاہوت آک برانز کریسہ کراچی آن کوئٹہ و مکران آ ہنوکا غٹ کسر تے بند کرینو۔

برانز کروک آک کوئٹہ کراچی، کراچی آن مکران تون اوار سی پیک کسر آ تولوک برانز کریسہ کسر تے ہن و بر اکن بند کرینو۔

تدوکا اِرا دے آن کراچی آن خڑک بلوچستان نا صنعتی شار حب چوکی بھوانی نا ہند آ کوئٹہ کراچی بنجاہی کسر آ تولوک برانز برجاء ءِ۔ حب چوکی برانز ئٹ بیگواہ غا اِرا ایلم عبدالحمید نا مار یاسر و جنید سرپرہ، ندیم بلوچ، نصیر بلوچ، احسان بلوچ و امیم بگٹی نا خاہوت آک اوار ءُ۔

ایلو پارہ غان زہری آن زوراکی ئٹ بیگواہی نا گواچی 9 بیگواہ بندغ تا خاہوت آک اینو سوراب آن خڑک اِرا ہند جتا ہند آتیا تولوک برانز کریسہ کراچی آن کوئٹہ و کوئٹہ و کراچی آن مکران آ ہنوک سی پیک کسر ءِ ہر وڑ ئنا ہن و بر اکن بند کرینو۔

ایڑے پسنی آن خڑک بیگواہ بندغ تا خاہوت آک اسہ وار پدا مُچ مریسہ کیچ آ ہنوک کسر ءِ تولوک برانز کریسہ بند کرینو ہرانا سوب آن گوادر تون اوار ایلو علاقہ تیا ہنوک ہر وڑ ئنا ہن و بر بند مسنے۔

اندا وڑ ننکان کوئٹہ ٹی پاکستانی لشکر اسہ اُرا ئسے آ جلہو کریسہ اِرا ایلم ءِ برمتہ کرے ہراڑان پد اوفتا خاہوت نا پارہ غان کوئٹہ دے کہی بائی پاس بند کننگانے۔

دائسکان بلوچستان نا چار جتا شار تیٹ کیہی ہند آتیا تولوک برانز تا لڑ برجاء ءِ اندن بیگواہ بندغ تا خاہوت آک تینا بندغ تا آجوئی اسکان برانز برجاء تخنگ نا پارینو۔

بلوچستان ئٹ زوراکی نا بیگواہیک: 4 علاقہ ئٹ بنجاہی کسر آ برانز، کسرک برانز ئٹ بند

الّمی خوانبو

پُوسکنا حوالک