بلوچستان ئٹ روچہ نا اولیکو دے ءِ، پاکستانی لشکر نا دو آن بیگواہ مروک بندغ آتا خاہوت آک اولیکو روچہ ءِ روڈ آتیا ملار۔ زوراکی ئٹ بیگواہ بندغ آتا خاہوت آک کیہی دے تیان تینا بندغ آتا یلہ مننگ کن بلوچستان نا اہم بنجائی کوئٹہ، کراچی، کوئٹہ تفتان بھلا کسر تے آ برانز آتا سوب اینو چارمیکو دے بھلا کسرک مُسہ جتا انگا ہند آن بند ءُ۔
شابیتی حوال تا رد ئٹ سوراب نا ہند آ زوراکی ئٹ بیگواہ مروک بندغ آتا خاہوت و بلوچ یکجہتی کمیٹی نا باسک آتا برانز کوئٹہ، کراچی، بھلا کسر آ مُسٹمی دے ہم برجا ءِ، پین اِرا زہمی مروک خاہوت برانز ئٹ اوار مسر۔
یاتی مرے درو کالخواہ خاہوت آتے اِرا بندغ نا یلہ مننگ نا باور کرفیسس واہم خاہوت نا پاننگ ءِ کہ زوراکی ئٹ بیگواہ مروک تیوہ 9 بندغ آتے یلہ کننگے۔
اِرٹمی پارہ غان حب ئٹ زوراکی ئٹ بیگواہی تا برخلاف ہم برانز چارمی دے برجا ءِ، ہراڑے اینو سہب ئنا پولیس برانز کروک زالبول و چنا تیا ظاغت ءِ کارم ئٹ ہیس۔
پولیس برانز کروک آتیا سم کاریم تون اوار لٹ کُٹ کرے و بیگواہ مروک بندغ آتا خاہوت و بلوچ یکجہتی کمیٹی نا باسک آتے دزگیر کننگا۔
برانز کروک آتا پاننگ ءِ کہ پیر انگا زالبول آتون اوار 9 بندغ ءِ پولیس دزگیر کریسہ نادرست ہند آ درینے۔ پولیس نا بیدادی آن گڈ ہم خاہوت آتا برانز برجا ءِ۔
اندا وخت کردگاپ ئٹ ہم اِرٹمی دے زوراکی ئٹ بیگواہی تا برخلاف کوئٹہ تفتان آ برانز برجا ءِ۔ برانز ئٹ اوار مروک آتا پاننگ ءِ کہ ننا علاقہ نا دہ آن زیات بندغ پاکستانی نا لشکر نا دو آن جتا انگا علاقہ آتیان زوراکی ئٹ بیگواہی نا گواچی مسنو ہرافتا یلہ مننگ کن علاقہ آتا اُلس روڈ آتیا برانز کریسہ ءُ۔
ایڑے خضدار ئٹ حب برانز آ فورسز کریک ڈاؤن نا برخلاف ہم برانز نا سوب بھلا کسر ءِ بند کننگانے۔
خاہوت آک دی بلوچستان پوسٹ ءِ پاریر کہ ننا بندغ آتان بیدس ننا خوشیک و زند تہاری ٹی تمانے۔ رمضان المبارک نا پاک انگا تو ئٹ بے اسلامی ملک ئٹ ہم مسلمان آتے کمک تننگک، ولے پاکستان ئٹ بلوچ آتون گندہ ظلم کریسہ ءُ، چنا و زالبول آتیا روچہ مننگ نا حالیت ئٹ بیدادی مریسہ ءِ۔
خاہوت آک بلوچستان نا مخلوق آن خواست کرینو کہ او دا زوراکی نا برخلاف ننتون اوار مریسہ بندغی نا فرض ءِ سر ایتبو۔