نوشکے چٹ سفا سینگار ءِ
نوشت: گِدروش بلوچ
دی بلوچستان پوسٹ
سی و یک جنوری نا سہب نا مالو گوربام آ دے ٹک آن مُست تیوہ شار ئٹی اسہ ہندنو خوشبو اس یلہ مس کس پائے گلاب و گواڑخ نا پِر بنا مس، ایہن تو ئس بھلو توار اس، ہر کنڈ دراپ دریپ ئس ولے ہندن لگاکہ کہ اسہ بھاز مُر آن بروک ءُ سیال اس بھلو وخت ئسے آن پد بسونے ہرا نا بننگ تون آہ و دنز اس ہرفینے تینے۔ ایہن آ سہب نا آزان تا وخت اگہ ہمسایہ اس ہم درگہ ءِ ٹکیفہ تو بندغ نا اُست کشکک نوا کہ خراب ءُ حوال اس مف، ولے اینو نا حوال سر مننگ آن مُست مستائی راہی کریسس کہ حوال خیر نا ءِ، بیرہ خیر نا نہ بلکہ خوشی نا ءِ ہم۔
چُناک گلان بال اُرا تیان پیشن مسر، ورنا تا جوزہ غاک ہم آسمان آ سر مسوسر، پیر و کماش آتا ہم سینہ جِک و کاٹم بڑز ئس، لُمہ و ہیڑک ہم یٰسین مون آ کریسہ دعا بنا کریسر۔ خلقی آ چناک پیشن پیشتماسر و ہندنو رش کریسر انتئے کہ اینو اسہ بھلو ایر گوات ئسے آن پد ہورہ نا شنزہ اس ٹیٹ الکوسس، پِر آن پد ڈغار کل نم ئس و کوکراک کشکاسر، دے ہم کپ اسکان پاش کریسس، دے کیہلنگ نا نیمہ غان بی بی نا گندار پاش کریسس، تہو ٹی گہوش ئس و نمب نا گند ہم ئس، پیر انگاک ہم اندن خوش ئسر دنکہ سال آتا ڈکال آن پد اوفتا خشکاوہ و کاویل آک پُر مسوسر، زالبول آک ہم گلان بے ہوش مننگ ئسر کس پائے اوفتا سال آتیان تولوک شیرزال نا سانگ نا آن مسونے، مسڑک ہم گلان بال ئسر دنکہ اوفتا سال آتیان گار و بیگواہ آ ایلم اینو واپس اُرا غا بسونے۔
ساف تمنگ نا وخت آ لُمہ نا چنکا مار پیشن آن حوال ءِ ایس و پارے لُمہ جان مَشیک اینو شار آ بسونو، بھلا ایلم بِننگ تو پارے نہ کہ امبل آک بسونو نہ کہ چوٹ والاک بسونو، اسٹوپ نا ماس آ تولوک پیر انگا پارے او گڑا شکریک بسونو، چنکا مار پارے آخہ اوفتا ہندنو بھلو پژہ ئسر، مری بُر بینوک ئسر بھاز تا مول ئسر بھاز نا مون پاش ئس توفک کل آتا بڈا ئس بھاز آتو کلی ہم ئس کوپہ تا امیل بینوک ئسر موٹسائکل آ بسونو، ولے ہچ کس اوفتا بننگ آن خُلوک ہلو کل اوفتو بغل کشارہ اوفتا پیشانی و دو تیان دروت ہلکرہ کل پاریر بھلا ایلمک بسونو، ہندا بِننگ تون لُمہ تا پارے اَلے خیرات مسوٹ گڑا سرمچار آک بسونو۔
چاشت نا وخت اسکا نوشکے نا شار و خلق خلق ٹی ورناک پترینگاسر و جاگئی بندغ آک کس پائے عید کننگ ئسر، گلی تیٹی مارکوک گنوک آتیان بار دُدینگارہ نوا کہ اوفتے خنن، کس تینا اُرا غان چادان اس مونو چاہ ہرفے کس ڈکو اس تو کس بسکوٹ اس، دکاندار آک تینا دکان تے یلہ ہلار کہ ورناتے گڑاس بکار مرو ولے سنگر ٹی بھلن مروک و جنگ ئٹی ردوک آ مار تینا ہر توشہ ہرفیسس اونا ہوش اونا توفک و میگزین تو ئس، ہر کس اوفتا مونا ہُروک ئس کہ ہرا وخت ورنا تینا مول ءِ شیف کے و نن اونا دیدار ءِ کین یا او گڑاس ہیت کے، بیرہ مارک نہ بلکہ مسڑک ہم لمہ و باوہ آن موکل الکر کہ کان نن ہم مشمار تے خنن و اوفتے کہ موغوک آ مُسہ رنگی بیرک ءِ و گڑاس سُم اوفتے ٹیکی کین، گڑاس مسڑ ہراکہ مُسہ رنگی دو خوار جوڑ کریسر اوفتے ہم کوہزاد آتا دو تیٹی شاغار۔
ورناک بھلو کچ ئسے آ بسوسر، اوفک ہرا گلی آن گدرینگارہ تو مون انگا جھمر آن بار اسہ وار او نیمہ ءِ تارمہ کریرہ، بیرہ جھمر آن بار نہ بلکہ جھمر اتوکا مون انگا تہو اوار ئس دُن چاکہ اسہ توفان اس ئس اوزدے، اسہ ہیروف اس ئس۔ ہیروف آن پد نا پِر ہم خڑک آن خننگاکہ ہرا نوشکے نا مونا مَش تے سِلنگ کن تیار ئس، پوشکنا ریک آتے پالفنگ کن تیار ئس، و ڈاک ءِ آباد کننگ کن تیار ئس، و بٹو جنگل آتے خرن کننگ کن تیار ئس۔ دا تیز انگا تہو نوشکے ءِ سفا کننگ نا ارادہ تو بسوسس، پنچ دے آن بڑز چکوک آ دا ہیروفی تہو نوشکے آن ہر گند و گڑس ءِ سفا کرے، ہر گڑد و پُلک ءِ بال تس و نوشکے ٹی بروکا ہتم نا اومیت ءِ تس۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔