گڑتی
نوشت: سنگت الیاس بلوچ
دی بلوچستان پوسٹ
فکر گواڑخ نا تہو ٹی بروکا زباد، ہتم نا زیب ءِ، نور بشخوکا چرک، و مون انگا زندان تیٹی بندی تا روح ءِ جارات تروکا مزاحمت کار آ شیرزال آ گودی و ورنا تا نظریہ و جہد ءِ پارہ۔
تینا کوٹی نا مونا پیشن خاچوک ئسٹ باسنی ئس کس پائے کنے اسٹ اس جنبیڑ ترسا ہلک دوٹی بش کرے، چانڑدہی آ ننک ئسر، ناگمان تغان ہجم کریٹ بش مسٹ، نن ئنا دو نیم بجہ ئس، ہندن گمان مس کنے کس پائے طوبے آ ماگم تینا مون انگا چادر ءِ تالان کرینے، جاگہ غان تینا بش مسٹ توسٹ، چرک چٹ بند گُب ئس، ساہت ئسے آن پد جاگہ غان تینا بش مسٹ چک ءِ ہڑساٹ طوبے نا پارہ غا۔ طوبے ءِ ہکل ترسا پاریٹ ”ہلہ تینے ڈھکانس اینو ارانگ اُس خننگپیسہ؟“
طوبے کنے ورندی ترسا پارے ”تینے ڈھکتنٹ ای کنڈ ئسے آ تولوک نیکن گڑتی ٹی اُٹ نی امر مروس؟ نا زند امر تدو؟ نی تو بے غم خاچانس نے آنبارو بےضمیر اف تیبہ جہان ئٹ، نا ایب کیب ئنا بندغ آتے پیشن آن بروکو ڈُنگس دزانے درینے و نی بے غم تنگان اُس، نے آنبارو بے ضمیر تیوہ جہان ئٹ مروف، نی تینا خن تے پیہن کرسا اراٹی خاچانس نے مچٹ ہم گڑتی اف زندان ئٹی بندی مروکا ورنا تا، نی تو بیرہ تینا نفع و تینا زند ئنا سوچ ئٹی اُس۔
زند دا اف کہ نی گدرینگس تہ بلکن زند دُن مفک کہ ماڑی، گاڑی، پیسہ و غدار انگا میر و سڑدار نا رند ئٹ توفک ءِ بڈ کننگ مرے۔ دا زند ءِ تو ای غلامی پاوہ ہرا وڑ نی زند کننگ اُس، دن انگا زند آ ای لعنت کیوہ ہرا وڑ کہ نا زند ءِ نے مچٹ ہم بیوس و لاچار آتا فکر اف بیرہ تینا نفع نا رند ئٹی اس۔ نہ کہ نے دژمن نا قید ئٹی بندی مروکا شیر زال آ ایڑ تا گڑتی ءِ نہ پین۔ دا کنا زند مسکہ ای خاخر ترسا ہُشاٹہ تہ مچے شرم حیا کر بے غیرت مفہ، نا بے غمی نا گڑتی کنا تجلی ءِ ہشا پتک تس۔“
ای خن تے تینا شیف کریٹ طوبے آن ارفیٹ ”گڑتی انت ئسے؟“
غرُانٹ ترسا پارے ”ای تیوہ جہان ءِ چکر کریٹ ولے بے ضمیر، بے حیا و بے غیرت نا ڈول ئنا ای خنتوٹ ہرا وڑ کہ نی اُس، اگہ کہ نی گڑتی ءِ تپیسہ گڑا نی بندغ نا دروشم ٹی ساہدار ئسے اُس۔“ طوبے نا دا ہیت ءِ بننگ تون کس پائے ای ڈغار ٹی غرک ہناٹ۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔