بلوچستان نا برجاء غا حالیت، سیندک ڈٹ بندی بھیم ئٹی – ٹی بی پی سرگپ
بلوچستان نا ضلع چاغی ٹی چین ئنا کمک ئٹ برجاء غا مس و خیسن نا ڈٹ بندی سیندک میٹلز لمیٹڈ بلوچستان نا خراب انگا حالیت آتا سوب آن بھاز خُلیس نا درشانی کرسا خبڑدار کرینے کہ اگہ حالیت آتیٹی جُوانی بتو گڑا کمپنی تینا کاریم تے سلفنگ آ بیوس مننگ کیک۔
برطانوی اخبار فنانشل ٹائمز نا رپورٹ نا ردئٹ 29 جون آ سیندک میٹلز لمیٹڈ نا منیجنگ ڈائریکٹر وزیر توانائی ءِ رادہ کروک اسہ چِھٹی اسیٹی خبڑدار کرے کہ بلوچستان ئٹ خراب حالیت آتا سوب آن ڈٹ بندی کن المی سامان و پیداواری مواد نا سر مننگ بھاز زہمی مسنے۔ چھٹی ٹی پاننگا کہ اگہ اندا حالیت آک برجاء مسر گڑا بروکا اسہ توو ئٹی ڈٹ بندی نا کاریم تے سلفنگ المی مننگ کیک انتیکہ لاجسٹک کمک و المی سامان نا فراوانی بھاز زہمی مننگ ءِ۔
دا پیش رفت اسہ اندنو وخت ئسے آ مونا بننگ ءِ ہراڑے بلوچستان ئٹ رکھ ئنا خُلیس و کسر تا حالیت وختی آن ملکی و پیشن ملکی سرمایہ کار آتیکن خُلیس نا سوب جوڑ مسنے۔ داڑان مُست مارچ ئٹ Barrick Mining Corporation ریکوڈک ڈٹ بندی نا بابت بھاز آ کاریم و شیڈول تیٹ اُرے مننگ نا پاریسس۔
دا فیصلہ اندنو وخت ئسے آ مونا بسنے ہراتم بلوچستان نا بھلا کسرک سلہہ بند تنظیم آتا دو ٹی ءُ، بلوچ لبریشن آرمی ”معاشی ناکہ بندی“ نا ردئٹ کسر تیا جلہو آتیٹ شابیتی ایسنے۔ بلوچستان ئٹ معدنی مڈی تا بابت ڈٹ بندی و فورسز آتیا مروک جلہو آتیٹ داسہ نا وخت ئٹ ترندی و پوسکنی خننگ ئٹ بسنے۔ برجاء سال جتا تدینی تیٹ مڈی و پین تجارتی سامان دروک سد آ گاڑی تے خاخر تننگ نا حوال آک مونا بسنو، ٹرانسپورٹر آک ہم کیہی وار دا کسر تے بے رکھوک گوندانو و اوفتا خیال ءِ کہ حکومت رکھ ئنا بست و بند آتے باوری جوڑ کننگ ئٹ بے سہب مسنے۔ سیندک کاپر اینڈ گولڈ ڈٹ بندی نا پارہ غان مننگ کروک کاریم تے ایسر کننگ نا خبڑداری اندا شابیت آ منظر نامہ ءِ پاش کرینے کہ بلوچستان نا کسرک اخہ در بے رکھوک جوڑ مسنو۔
کسرک ڈٹ بندی و واپار کن بنداوی حیثیت تخرہ۔ بلوچ سلہہ بند تنظیم آتا پارہ غان دا کسر تیا ناکہ بندی، گاڑی تا پٹنگ، جلہو و ٹرانسپورٹ آتے ٹک کننگ نا تدینیک دا غٹ گڑا تے تورینو۔ کان کنی ڈٹ بندی نا سرسہبی بیرہ معدنی کوڑ آتیا اف بلکہ اوڑکن رکھوک ہن و بر باور نا لائخ سکیورٹی ماحول ہم المی مریک۔ و بلوچستان ئٹ ریاست ہمو غٹ گڑا تا فراوانی کن تیوہ وڑئٹ بے سہب مروک خننگک۔
ایلو پارہ غان بلوچستان ئٹ کاریم کروک سلہہ بند تنظیم آتا پارہ غان ہم جہانی سرمایہ کاری، خاص وڑئٹ چین ءِ کیہی وار خبڑدار کننگانے کہ بلوچستان سرمایہ کاری کن رکھوک ءُ ماحول فراوان کپک۔ ہنوکا وخت ئٹ چینی شاری، انجنیئر و سرمایہ کاری تون تفوک بندغ آتے ٹک کننگ نا تدینیک مونا برسا کرینو، جلہو آتا سوب آن جانی نسخانک ہم مسنو۔ بلوچستان نا داسہ نا حالیت و سرمایہ کاری تون تفوک بندغ آتا خُلیس حالیت ءِ گیشتر پاش کرینے کہ ہراتم اسکان بلوچ راجی ویل آتے سوبری ئٹ ایسر کننگپک، بلوچستان اسہ بے رکھوک و بے یخینی ڈیہہ اس مرو۔ دن انگا حالیت آتیٹ داڑے ہر وڑ ئنا بھلو سرمایہ کاری کننگ عقل مندی نا فیصلہ اس مفرو۔